Financial Tips : మిమ్మల్ని భవిష్యత్తులో ధనవంతులుగా చేసే 4 ఆర్థిక చిట్కాలు.. చిన్న విషయాలే కానీ పెద్ద ప్రయోజనం
Financial Tips : సరైన ఆర్థిక ప్రణాళిక లేకుంటే జీవితంలో చాలా సమస్యలు చూడాల్సి వస్తుంది. భవిష్యత్తు బాగుండాలంటే కచ్చితంగా డబ్బులు ఎలా ఉపయోగించాలో తెలిసి ఉండాలి. మీ కోసం 4 సింపుల్ ఆర్థిక చిట్కాలు తీసుకొచ్చాం. ఒక్కసారి చదివేయండి.
ఆర్థిక అక్షరాస్యత అనేది ఇటీవలి కాలంలో చాలా ముఖ్యం. ఎందుకంటే డబ్బులు లేకుంటే భవిష్యత్తులో మిమ్మల్ని ఎవరూ పట్టించుకోరు. మీరు అనుభవం లేని పెట్టుబడిదారుడైనా లేదా అనుభవజ్ఞుడైన పెట్టుబడిదారుడైనా చాలా విషయాలు తెలుసుకోవాలి. మీరు సరైన ఆర్థిక ఎంపికలు చేసేందుకు సాయపడుతుంది. మీ పెట్టుబడి రాబడులు తెచ్చే విధంగా ఉండాలి. మిమ్మల్ని మరింత ఆర్థిక ఇబ్బందుల్లోకి నెట్టేవిధంగా ఉండకూడదు. మీ డబ్బులను ఎలా ఉపయోగించుకోవాలో తెలిపే 4 సింపుల్ చిట్కాలు చూద్దాం..
- మీ పెట్టుబడులన్నింటినీ ఒకే చోట ఉంచడం మానుకోండి. బంగారం, మ్యూచువల్ ఫండ్స్, స్టాక్స్, ఫిక్స్‌డ్ డిపాజిట్లు, ప్రభుత్వ పథకాలు వంటి వివిధ వాటిల్లో పెట్టుబడిని విస్తరించడం తెలివైన పని. ఈ విధానం ప్రమాదాన్ని తగ్గిస్తుంది. రాబడిని పెంచుతుంది. ఒకే దాంట్లో పెట్టుబడి పెడితే మీరు మెుత్తం డబ్బును కోల్పోయే ప్రమాదం కూడా ఉంటుంది. అదే వివిధ రకాల ఇన్వెస్ట్‌మెంట్స్ చేస్తే.. ఒకదాంట్లో పోయినా.. మరోదాంట్లో మీకు ప్రయోజనం దక్కుతుంది.
- మీ పెట్టుబడులను సరైన పద్ధతిలో పెంచుకోవడం ముఖ్యం. మీ పెట్టుబడులను ఎప్పటికప్పుడు పెంచుకోవడానికి చూడాలి. మీరు సిస్టమాటిక్ ఇన్వెస్ట్‌మెంట్ ప్లాన్(SIP) ఉపయోగిస్తుంటే, షెడ్యూల్ చేసిన వ్యవధిలో సిప్ టాప్-అప్‌ల ద్వారా మీ ఇన్వెస్ట్‌మెంట్ పెంచుకోవచ్చు. ఈ వ్యూహం ఆదాయాన్ని పెంచడానికి, ఆర్థిక ఇబ్బందులను ఎదుర్కోవడానికి, పెట్టుబడి లక్ష్యాలను సకాలంలో చేరుకోవడానికి సహాయపడుతుంది.
- సాంకేతిక పురోగతితో ఆర్థిక నిర్వహణ సులభతరం అయింది. యుటిలిటీ బిల్లులు, క్రెడిట్ కార్డ్ బకాయిలు వంటి చెల్లింపులను ఆటోమేట్ చేయడం ఒక తెలివైన పని. ఇది ఆలస్య రుసుములను నివారిస్తుంది. సకాలంలో చెల్లింపులు చేస్తే.. మీకు ఫైన్ పడదు. దీంతో చిన్న మెుత్తంలో అయినా మీ ఖర్చును తగ్గించుకున్నవారు అవుతారు.
- మీ పెట్టుబడి వ్యూహంలో దీర్ఘకాలిక ప్రణాళికలను చేర్చడం ప్రయోజనకరంగా ఉంటుంది. దీర్ఘకాలిక పెట్టుబడులు అధిక రాబడులు ఇస్తాయి. స్వల్పకాలిక పెట్టుబడులకంటే దీర్ఘకాలిక పెట్టుబడి మీకు మంచి ఆదాయం తెస్తుంది. మీరు ఎంత ఎక్కువ కాలం పెట్టుబడి పెడితే అంత పెద్ద మొత్తాన్ని ఏర్పాటు చేసుకుంటారు. సిప్, పబ్లిక్ ప్రావిడెంట్ ఫండ్ వంటి పథకాలు దీర్ఘకాలిక ప్రయోజనాలను అందిస్తాయి.
ఆర్థిక అక్షరాస్యత పెంచుకోవడం, పెట్టుబడులను వైవిధ్యపరచడం, దీర్ఘకాలిక ప్రణాళిక, క్రమం తప్పకుండా ఇన్వెస్ట్‌మెంట్ పెంచడం, చెల్లింపులను ఆటోమేట్ చేయడం అనేవి ఆర్థిక క్రమశిక్షణకు ఎంతగానో ఉపయోగపడతాయి. మీ ఆర్థిక లక్ష్యాలు చేరుకునేందుకు సాయపడతాయి. ఇవి చిన్న విషయాలే కదా అనుకోవద్దు.. ఫాలో అయితే భవిష్యత్తులో పెద్ద ప్రయోజనాలు పొందుతారు.
