Vlogging। మీరు వ్లాగ్స్ చేయాలనుకుంటున్నారా? మంచి వ్లాగర్ అవ్వడానికి ఇవిగో టిప్స్!

paragraph

<p>Vlogging Day: మీరు YouTube స్టార్ అవ్వాలనుకుంటున్నారా? లేదా సోషల్ మీడియా ఇన్‌ఫ్లుయెన్సర్ కావాలనుకుంటున్నారా? లేకపోతే ప్రపంచంతో ముఖ్యమైన జ్ఞానాన్ని పంచుకోవాలనుకుంటున్నారా? అలాంటప్పుడు మీరు మీ స్వంత వ్లాగ్‌ను ఎందుకు ప్రారంభించకూడదు? మీరు వ్లాగ్స్ చేస్తూ మీకంటూ కొంతమంది అభిమానులను సంపాదించుకోవచ్చు, సమాచారాన్ని అందరితో పంచుకోవచ్చు, అంతేకాదు మీ వ్లాగ్స్ కు వీక్షకులు పెరిగితే దానితో కొంత ఆదాయాన్ని అందుకోవచ్చు. ఇంతకీ అసలు వ్లాగ్ అంటే ఏమిటి? వ్లాగ్స్ ఎలా చేస్తారు, మీ వ్లాగ్ ఛానెల్ విజయవంతం కావడానికి ఏం చేయాలి? దీనికి సంబంధించి మీకు కావలసిన సమాచారం, వ్లాగ్ చేయడానికి ఉపయోగపడే కొన్ని చిట్కాలను ఇక్కడ తెలుసుకోండి.</p>

<h3>వ్లాగ్ అంటే ఏమిటి?</h3><p>బ్లాగ్ లేదా బ్లాగింగ్ అంటే మీకు తెలుసా? ఏదైనా రచనను పబ్లిష్ చేయడం బ్లాగ్ అనిపించుకుంటుంది, అది వీడియో రూపంలో పబ్లిష్ చేస్తే బ్లాగ్ అవుతుంది. వ్లాగ్ అనేది వీడియో రూపంలో ఉన్న బ్లాగ్. వీడియో బ్లాగ్ లేదా వీడియో లాగ్ కోసం చెప్పే సంక్షిప్త పదమే వ్లాగింగ్. దీన్ని మీ స్వంత టీవీ షో లేదా స్వంత ఛానెల్‌గా భావించండి, అయితే వ్లాగ్ అనేది వెబ్‌కు మాత్రమే పరిమితం.</p>

<p>మీరు వ్లాగింగ్ ఛానెల్‌ని సృష్టించడానికి, వీడియో కంటెంట్‌ను ప్రచురించడానికి అనేక ప్లాట్‌ఫారమ్‌లు ఉన్నాయి. అయితే అత్యధికంగా వీక్షించబడే, విజయవంతమైన వ్లాగ్‌లు యూట్యూబ్ వ్లాగ్‌లు. యూట్యూబ్ కాకుండా మీరు ఇన్‌స్టాగ్రామ్, షేర్‌చాట్, జోష్ వంటి ఇతర ప్లాట్‌ఫారమ్‌లలోనూ వ్లాగ్స్ పబ్లిష్ చేయవచ్చు.</p>

<h3>వ్లాగ్‌ చేయడానికి కంటెంట్ ఏం ఉండాలి?</h3><p>మీరు దేనినైనా వ్లాగ్‌ రూపంలో చేయవచ్చు కానీ మీరు చేసే వ్లాగ్‌కు వీక్షకులు, ప్రేక్షకులు కావాలి. కాబట్టి ఎక్కువ మందిని ఆకర్షించగల విషయాన్ని వ్లాగ్ చేయడం ఉత్తమం. మీరు ఇప్పటికే ఒక సెలబ్రిటీ అయితే మిమ్మల్ని అనుసరించే ఫాలోవర్స్ మీ వ్లాగ్స్ చూస్తారు. మీరు సెలబ్రిటీ కారు, అయినప్పటికీ వ్లాగ్స్ చేయాలనుకుంటే ఎక్కువ మందికి నచ్చేలా, మెచ్చేలా మంచి వీడియో క్వాలిటీతో వ్లాగ్స్ చేస్తూ ఉండాలి. ఇలా చేసినా కూడా మీకు వీక్షకులు వస్తారని, మీరు స్టార్ అయిపోతారని చెప్పడం లేదు. ఒక్కరోజులోనే ఏదీ జరిగిపోదు, నిరంతరమైన కృషి అవసరం. కొంతమంది ఏదైనా వైరల్ వీడియోతో ఓవర్ నైట్ స్టార్ అయిపోవచ్చు, కానీ సబ్జెక్ట్ తెలిసిన వారు, మంచి కంటెంట్ ను వీక్షకులకు అందించే వారే వ్లాగ్ స్టార్లుగా కొనసాగగలరు.</p>

<p>వ్లాగ్ చేయడానికి మీరు ఎంచుకునే సబ్జెక్ట్ ఏమిటి? మీరు దేనిలో మేటి అనేది మీకు తెలిసి ఉండాలి. ట్రావెల్ వ్లాగ్‌లు చేయవచ్చు, వంటలు నేర్పించవచ్చు, ట్యూషన్లు చెప్పవచ్చు, డ్యాన్స్ - యాక్టింగ్ వంటివి ఏదైనా కళాత్మకంగా చూపించగలగాలి.</p>

<h3>వ్లాగింగ్ చేయడానికి కావలసిన పరికరాలు, నైపుణ్యాలు</h3><p>వ్లాగ్‌ను రూపొందించడానికి మీరు ఒక గొప్ప సినిమా డైరెక్టర్, సినిమటోగ్రఫర్ లేదా ప్రొడ్యూసర్ కానవసరం లేదు. ప్రత్యేకమైన కోర్సులు చేయాల్సిన అవసరం లేదు. మీ చేతిలో నాణ్యమైన స్మార్ట్‌ఫోన్ కెమెరా ఉంటే, దానితో అందంగా, కళాత్మకంగా వీడియో చిత్రీకరించి పబ్లిష్ చేయవచ్చు. మీకు వీక్షకులు పెరుగుతున్నారంటే, ఒక మంచి కెమెరా, ట్రైపాడ్, అప్ లోడ్ చేయడానికి కంప్యూటర్, ఇంటర్నెట్ సదుపాయం అవసరం. వీడియో రికార్డింగ్, వీడియో ఎడిటింగ్, బ్యాక్ గ్రౌండ్ మ్యూజిక్ చేర్చడం వంటి వాటిలో నైపుణ్యాలను పెంచుకుంటూ పోవాలి, వీటన్నింటితో పాటు కొంత సృజనాత్మకత ఉండాలి. అప్పుడు మీరే గొప్ప వ్లాగర్, సోషల్ మీడియా స్టార్ అయిపోవచ్చు.</p>

<p>మరి ఇంకే మీరు మీ వ్లాగ్ ఛానల్ ప్రారంభించండి. అన్నట్టూ ఈరోజు వ్లాగింగ్ దినోత్సవం. ప్రతీ ఏడాది ఆగష్టు 10న వ్లాగింగ్ డేగా పాటిస్తారు. మంచి మంచి వీడియోలను రూపొందించడం కోసం, వ్లాగర్లను ప్రోత్సహించడానికి ఈరోజు అంకితం.</p>

Allam Pachadi: ఆంధ్ర స్టైల్‌లో అల్లం నిల్వ పచ్చడి, ఒక్కసారి చేసుకుంటే మూడు నెలలు తినవచ్చు

<ul><li>Allam Pachadi: ఆంధ్ర స్టైల్ లో అల్లం నిల్వ పచ్చడి చేసి చూడండి. ఇడ్లీ, దోశెల్లోకి అదిరిపోతుంది. స్పైసీగా చేసుకుంటే ఆ రుచి వేరు. దీని రెసిపీ చాలా సులువు.</li></ul>

Mango Peel Tea: ప్రతిరోజూ మామిడి తొక్కతో టీ కాచుకుని తాగండి, మధుమేహం అదుపులోకి రావడం ఖాయం

<ul><li>Mango Peel Tea: మధుమేహంతో ఇబ్బంది పడుతున్న వారు మామిడి తొక్క టీను ప్రయత్నించండి. ఇది రక్తంలో చక్కెర స్థాయిలను అదుపులో ఉంచుతుంది. ఆరోగ్యానికి కూడా మేలు చేస్తుంది.</li></ul>

Sweetcorn Pakodi: పిల్లలకు ఇలా సులువుగా స్వీట్ కార్న్ పకోడీ ట్రై చేయండి, పది నిమిషాల్లో వండేయచ్చు

<ul><li>Sweetcorn Pakodi: స్వీట్ కార్న్ పకోడీ అనగానే కొంతమంది స్వీట్ కార్న్‌ను రుబ్బి చేస్తూ ఉంటారు. అలా కాకుండా నేరుగా గింజలతోనే కూడా చేయొచ్చు. ఈ స్వీట్ కార్న్ పకోడీ రెసిపీ ఎలాగో ఇప్పుడు చూద్దాం.</li></ul>

New Study: తండ్రి ఆహారపు అలవాట్లు అతని కొడుకు, కూతుళ్ళపై ఎంతటి ప్రభావాన్ని చూపిస్తాయో తెలుసుకోండి

<ul><li>New Study: తండ్రి ఆహారపు అలవాట్లు అతనికి పుట్టిన పిల్లలపై చాలా ప్రభావాన్ని చూపిస్తాయని కొత్త అధ్యయనం తేల్చింది. కొడుకుపై ఎలాంటి ప్రభావాన్ని చూపిస్తాయో, కూతురుపై ఎలాంటి ప్రభావానికి కారణం అవుతాయో పరిశోధనకర్తలు చెబుతున్నారు.</li></ul>

<ul><li>Vlogging Day: వ్లాగ్ అంటే ఏమిటి? వ్లాగ్స్ ఎలా చేస్తారు, మీ వ్లాగ్ ఛానెల్ విజయవంతం కావడానికి ఏం చేయాలి? &nbsp;కొన్ని చిట్కాలను ఇక్కడ తెలుసుకోండి.</li></ul>

World Lion Day। సింహం పేరులోనే ఉంది రాజసం, సింహగర్జన ఎంతో భీకరం, ఈ కథనం చాలా ఆసక్తికరం!

<p>World Lion Day 2023: సింహం దీని పేరులోనే ఉంది ఒక రాజసం. సింహాలు ధైర్యం, బలం, శక్తికి చిహ్నాలు. సింహాన్ని 'అడవికి రారాజు' గా వర్ణిస్తారు. ఇవి క్రూర జంతువుల జాబితాలో వర్గీకరింపబడినప్పటికీ మానవులతో వీటికి ముప్పు పొంచి ఉంది. అందుకే అపురూపమైన జంతువుల సంరక్షణపై అవగాహన కల్పించడానికి ఏటా ఆగష్టు 10న 'ప్రపంచ సింహాల దినోత్సవం' గా పాటిస్తున్నారు. ఈ ప్రత్యేకమైన సందర్భాన్ని పురస్కరించుకొని సింహం గురించి కొన్ని ఆసక్తికర విషయాలను ఇక్కడ తెలియజేస్తున్నాం. అవేంటో మీరూ తెలుసుకుంటారా మరి?</p>

<h3>సింహం చాలా సోమరి</h3><p>సింహాలు చాలా సోమరితనాన్ని ప్రదర్శిస్తాయి. ఇవి రోజులో సుమారు 20 గంటల వరకు ఏకధాటిగా నిద్రపోవడం లేదా విశ్రాంతి తీసుకోవడం చేస్తాయి, వాటికి ఆకలేసినపుడే వేటకు వెళ్తాయి. ఇవి బద్ధకంగా ఉన్నప్పుడు వీపుపై పడుకుని పాదాలు పైకి లేపడం లేదా నీడలో కునుకు చేయడం వంటివి చూడవచ్చు. అలాగే వాటి సహచర సింహాలతో ఆప్యాయంగా మెలగడం, తలలు రుద్దడం, ఆటలాడటం చేస్తాయి.</p>

<h3>సింహాలు సామాజికమైనవి</h3><p>సింహాలు అన్ని పెద్ద పిల్లులలో అత్యంత స్నేహశీలియైనవి. ఇవి తమ సహచర సింహాల గుంపుతో జీవిస్తాయి. సింహాల సమూహాన్ని ప్రైడ్ అని పిలుస్తారు, ఈ సమూహంలో సాధారణంగా మగసింహం, ఆడ సింహాలు, వాటి సంతానం ఉంటాయి. సాధారణంగా ఒక ప్రైడ్ లో పది నుండి పదిహేను సింహాలను కలిగి ఉంటుంది, అనేక ఎక్కువ ఆడ సింహాలు, వాటి పిల్లలు, వాటికి రక్షణగా నాలుగు మగ సింహాల వరకు ఉంటాయి. కొన్ని సింహాల ప్రైడ్‌లలో 40 సభ్యులతో పెద్ద కుటుంబంలా జీవిస్తాయి.</p>

<h3>సింహాలకు దాహం తక్కువ</h3><p>సింహాలు నీరు త్రాగకుండా నాలుగు రోజుల వరకు ఉంటాయి, కానీ అందుబాటులో ఉంటే, అవి ప్రతిరోజూ నీరు త్రాగుతాయి. నీరు లేకపోయినా సింహాలు ప్రతిరోజూ ఆహారం అవసరం. ఒక సాధారణ సింహానికి ప్రతిరోజు కనీసం 5 కేజీల మాంసం తినవలసిన అవసరం. మగసింహాలు 7 కిలోల కంటే ఎక్కువే తింటాయి. సింహాలు ప్రధానంగా జీబ్రా, వైల్డ్‌బీస్ట్ , గేదె వంటి పెద్ద శాకాహారులను తినేందుకు ఇష్టపడతాయి. అప్పుడప్పుడూ ఎలుకలు, పక్షులు, కుందేళ్ళు, బల్లులు, తాబేళ్లు వంటి చిన్న జంతువులను తినేస్తాయి.</p>

<h3>సింహాలు టీమ్ వర్క్ చేస్తాయి</h3><p>సింహం ఒంటరిగా వేటాడే సామర్థ్యం కలిగి ఉన్నప్పటికీ, అవి తరచుగా గుంపుగా వేటాడతాయి. వేటాడే జంతువును అన్ని వైపుల నుంచి చుట్టుముట్టి దానిని పడగొట్టేందుకు జట్టుగా కృషి చేస్తాయి. విజయవంతమైన వేట తర్వాత, గర్వంతో ఉన్న సింహాలన్నీ భోజనాన్ని కలిసి పంచుకుంటాయి. ఇందులోనూ ఒక ఆర్డర్ ఉంది, మగ సింహాలు మొదట తింటాయి, తరువాత ఆడ సింహాలు , చివరకు పిల్లలు తింటాయి.</p>

<h3>సింహాలు అద్భుతమైన వేటగాళ్ళు</h3><p>సింహాలు ఆకస్మికంగా వేటాడతాయి. అందులోనూ ఒక ప్లాన్ ఉంటుంది. వేటాడే ముందు అవి ఒక అర్ధ వృత్తాన్ని ఏర్పరుస్తాయి, చిన్న సింహాలు ఎరను దాని కేంద్రం వైపుకు వెంబడిస్తాయి. పెద్ద సింహాలు ఎటాక్ చేస్తాయి. సింహం కళ్లు కాంతికి సున్నితత్వం ప్రదర్శిస్తాయి. మానవుల కంటే దాదాపు ఆరు రెట్లు ఎక్కువ సున్నితంగా ఉంటుంది, ఇదే వాటికి రాత్రి వేటాడేటప్పుడు ప్రత్యేక ప్రయోజనాన్ని ఇస్తుంది. సింహం పంజాలు ముడుచుకుని ఉంటాయి, తెరిచినపుడు 1 ½ అంగుళాల పొడవు వరకు చేరుకుంటాయి. సింహాలు గంటకు 50 నుంచి 80 కిమీ వేగంతో పరుగెత్తగలవు, 36 అడుగుల ఎత్తు వరకు దూకగలవు.</p>

<h3>సింహగర్జన ఎంతో భీకరం</h3><p>సింహాలు అనేక విధాలుగా కమ్యూనికేట్ చేస్తాయి. గర్జిస్తాయి, కేకలు వేస్తాయి, మూలుగుతాయి, గుసగుసలు వంటి శబ్దాలను ఉపయోగించి వివిధ మార్గాల్లో కమ్యూనికేట్ చేస్తాయి. అలాగే, సువాసన గుర్తులను వదిలివేయడం ద్వారా చీకట్లో సంకేతాలను పంపుతాయి. తమ "కుటుంబ పరిమళాన్ని" వ్యాప్తి చేయడానికి అవి తమ తలలను ఒకదానికొకటి రుద్దుకుంటాయి. సింహం గర్జన భీకరంగా ఉంటుంది. ఆ గర్జన శబ్దం సుమారు 8 కిమీ దూరం వరకు వినబడుతుంది. ఇది ఇతర మాంసాహార జీవులకు ఒక హెచ్చరికలా, ఇతర సింహాల గుంపుకు తమ భూభాగం అని చెప్పుకోవటానికి సంకేతంలా పనిచేస్తుంది. సంభోగం కోసం తమ భాగస్వాములను ఆకర్షించడానికి కూడా సింహాలు గర్జన చేస్తాయి.</p>

<ul><li>World Lion Day 2023: ఈరోజు 'ప్రపంచ సింహాల దినోత్సవం'. ఈ ప్రత్యేకమైన సందర్భాన్ని పురస్కరించుకొని సింహం గురించి కొన్ని ఆసక్తికర విషయాలను ఇక్కడ తెలియజేస్తున్నాం.</li></ul>

Tiger Day। అడవికి రాజు సింహం అయితే మరి పులి? పులి గురించి కొన్ని ఆసక్తికర విషయాలు చూడండి!

<p>International Tiger Day: సాధారణంగా అడవికి రాజు ఏది అంటే సింహం అని చెబుతారు? మరి సింహంతో సమానమైన, అంతకు మించిన సామర్థ్యం కలిగిన పులిని ఏం అనాలి? నిజానికి పులి మాత్రమే అడవిలో జీవించే ప్రాణి, సింహం సాధారణంగా గడ్డి భూములు, సవన్నాలలో నివసించే ప్రాణి. మరి అడవికి అసలైన రాజు ఏదో మీరే అర్థం చేసుకోండి. పులి చాలా అందమైనది, అలాగే క్రూరమైనది కూడా. దీనిని క్రూర మృగాల జాబితాలో చేర్చారు. అయితే మనిషి కంటే క్రూరమైనది కాదు అనే వాదన ఉంది. ఎందుకంటే మానవ చర్యలతో నేడు పులులు అనేవి అంతరించిపోతున్నాయి. అందుకే, ఈ భూమి మీద అందమైన, గంభీరమైన జీవులు అయినటువంటి పులల సంరక్షణ కోసం ప్రతీ ఏడాది జూలై 29న 'అంతర్జాతీయ పులుల దినోత్సవం' గా ప్రపంచవ్యాప్తంగా నిర్వహిస్తారు. పులుల సంరక్షణ ఆవశ్యకత గురించి అవగాహన కల్పించడం ఈరోజుకు ఉన్న ప్రత్యేకత.</p>

<p>ఈరోజు పులుల దినోత్సవం సందర్భంగా పెద్దపులి గురించి కొన్ని ఆసక్తికర విషయాలను (interesting facts about tiger) ఇక్కడ తెలుసుకోండి.</p>

<h3>రాయల్ బెంగాల్ టైగర్ చాలా పెద్దది</h3><p>ఇతర పులుల కంటే రాయల్ బెంగాల్ టైగర్లు అతి పెద్దవి. వీటిలో మగ పులులు 300 కిలోగ్రాముల వరకు బరువును. ఇంతటి బరువుతో అది ఏ మామూలు జీవి మీదనైనా కూర్చుంటే దీని బరువుకే అది ఊపిరి ఆడకుండా చనిపోతుంది.</p>

<h3>పులి ఒక్క పంజాతో చంపేయగలదు</h3><p>పులుల శరీర పరిమాణాన్ని పక్కన పెడితే, వాటి ముందు కాళ్లను చూడండి, పులి ఎప్పుడూ దాని పంజా దెబ్బతో దాడి చేస్తుంది. పులి పంజా దెబ్బ చాలా బలంగా ఉంటుంది. దాని ఒక్క పంజా దెబ్బతోనే ఒక వ్యక్తిని లేదా జంతువును చంపేయగలదు. ఒక వేళ చావు మిస్ అయితే ఎముకలు విరగటం ఖాయం, చావు భయంతోనే చచ్చిపోవచ్చు కూడా.</p>

<h3>సైలైంట్ కిల్లర్</h3><p>పులులను సైలెంట్ కిల్లర్లుగా వర్ణిస్తారు, ఎందుకంటే చాటు నుంచి వచ్చి ఆకస్మికంగా దాడి చేస్తుంది. వేటాడేటపుడు పులులు చాలా నిశ్శబ్దంగా నడుస్తాయి. ఇందుకోసం మృదువైన కాలి ప్యాడ్‌లను కలిగి ఉంటాయి. పులి చారలు దాని చుట్టూ ఉన్న పరిసరాలతో కలిసిపోయేలా మభ్యపెట్టేలా పనిచేస్తాయి, ఇలా నెమ్మదిగా ఎరను వెంబడించి, మెరుపుదాడి చేస్తాయి. పులులు నిశాచర జీవులు కూడా ఎక్కువగా రాత్రి వేళలోనే వేటకు వెళ్తుంది. ఈ వేటలో భాగంగా సుమారు 10- 20 కిమీ ప్రయాణిస్తుంది.</p>

<h3>పులులు 25 సంవత్సరాలు జీవిస్తాయి</h3><p>పులుల ఆయుర్దాయం 20-25 సంవత్సరాల మధ్య ఉంటుంది, అయినప్పటికీ, చాలా పులులు 20 ఏళ్లలోపే మరణిస్తాయి. మరో విచారకరమైన విషయం ఏమిటంటే, పులి పిల్లలు గుడ్డిగా పుడతాయి, పుట్టిన వాటిలో కొన్ని మాత్రమే జీవించి ఉంటాయి. పులి పిల్లలు కేవలం తమ తల్లి సువాసనను మాత్రమే అనుసరిస్తాయి. చాలా పులి పిల్లలు ఆకలితో లేదా చలికి చనిపోతాయి. కొన్నిసార్లు ఆడపులి, మగపులికి సంభోగానికి అనుమతిని ఇవ్వకపోతే అవి దాని పిల్లలను తినేసి ఆడపులిని లోబర్చుకుంటాయి. ఇలా కూడా పులి పిల్లలు చనిపోతాయి.</p>

<h3>పులి మూత్రం వాసన- ఘుమఘుమ</h3><p>ఆసక్తికరమైన విషయం ఏమిటంటే, పులుల మూత్రం వాసన, అచ్ఛంగా వెన్న పూసిన పాప్‌కార్న్ వాసన లాగా ఉంటుందట, అయితే ఈ వాసన చూడటాని ప్రయత్నించవద్దు. ఎందుకంటే పులులు తమకోసం ప్రత్యేకమైన టెరిటరీలను ఏర్పర్చుకొని జీవిస్తాయి. తమ భూభాగంలోకి ఏదైనా వస్తే, ఇక అంతే.</p>

<h3>పులుల సమతుల్య ఆహారం</h3><p>పులులు వైవిధ్యమైన ఆహారాన్ని తింటాయి, ఎప్పుడూ ఒకేరకమైన ఆహారాన్ని తినవు. అన్ని రుచులను ఆస్వాదిస్తాయి. అడవి పంది, జింక, ఎలుకలు, ఎలుగుబంటి, పక్షుకు, ఖడ్గమృగం, మొసలి, గేదె, చిరుతపులి వంటి వాటిలో దేనితో అయినా విందు చేసుకోగలవు. అలాగే దాని మార్గంలో వచ్చే ఏ జీవినైనా చంపి తింటాయి. చేపలను కూడా తింటుంది. , ఎందుకంటే పులులకు ఈతకొట్టడం ఇష్టం సుమారు 30 కిమీ దూరం వరకు ఈతకొట్టగలవు, ఈ క్రమంలో ఆకలి వేస్తే చేపలను తినేస్తాయి.</p>

<h3>పులులకు మనిషి ఆహారం కాదు</h3><p>పులులు సాధారణంగా మనుషులను ఆహారంగా పరిగణించవు. కానీ, మనిషి వాటికి ముప్పు అని అనిపించినపుడు చంపి తినేందుకు వెనకాడవు. అయితే ఇలా ఒకసారి మనిషి రక్తం మరిగిన పులి, మళ్లీ మళ్లీ మనిషి మాంసం కోసం నోరూరుతాయి. అయినప్పటికీ వాటి భూభాగంలోకి మనిషి చొరబడకపోతే ఏం చేయవు. పొరపాటున ఒకవేళ మనిషికి పులి ఎదురైతే భయంతో పరుగెత్తకుండా, పులిని కన్నార్పకుండా చేస్తూ వెనకకు నడుచుకుంటూ కనుమరుగవడం సరైన చర్య.</p>

<h2>ఇవీ చదవండి:</h2><p><a class="manualbacklink" target="_blank" href="https://telugu.hindustantimes.com/lifestyle/this-is-why-the-lion-considered-as-the-king-of-the-jungle-121637665083123.html">నాన్నా..సింహం సింగిల్‌గా రాదు, అయినా అది అడవికి రారాజు!</a></p>

<p><a class="manualbacklink" target="_blank" href="https://telugu.hindustantimes.com/lifestyle/get-to-know-a-few-interesting-facts-about-liger-121637665637611.html">క్రాస్ బ్రీడ్ లైగర్ గురించి కొన్ని ఆసక్తికరమైన విశేషాలు!</a></p>

<ul><li>International Tiger Day 2023: ఈరోజు పులుల దినోత్సవం సందర్భంగా పెద్దపులి గురించి కొన్ని ఆసక్తికర విషయాలను (interesting facts about tiger) ఇక్కడ తెలుసుకోండి.</li></ul>

Buddha's Hand Fruit Benefits। బుద్ధుని చేతి ఫలం.. ఈ పండు నిజంగా ఓ అద్భుతం!

<p>Buddha's Hand Fruit Benefits: బుద్ధుని చేతి ఫలం పేరును ఎంతమంది విన్నారు? మనలో చాలా మంది ఈ ప్రత్యేకమైన పండు పేరు విని ఉండరు. మీరు మొదటసారిగా ఈ పండును చూస్తే గనక ఆశ్చర్యపోవచ్చు. కానీ, ఈ పండు ఎక్కడిదో కాదు, ఇది మన భారతదేశంలోనూ లభ్యమవుతుంది. ప్రత్యేకంగా భారతదేశంలోని ఈశాన్య ప్రాంతంలో కనిపిస్తుంది. భారత్ అలాగే చైనాలోని కొన్ని ప్రాంతాలలోనూ ఈ పండు దొరుకుతుంది.</p>

<p>ఈ ప్రత్యేకమైన పండు ధ్యాన భంగిమలో ఉన్న <a class="manualbacklink" target="_blank" href="https://telugu.hindustantimes.com/lifestyle/happy-buddha-purnima-2023-motivational-and-inspirational-quotes-by-gautama-buddha-121683203662326.html">బుద్ధ భగవానుడి</a> చేతిని పోలి ఉంటుంది, అందుకే దీనిని బుద్ధుని చేతి ఫలం అనే పేరు వచ్చింది. బుద్ధుని చేతి ఫలంను బుషుకన్, ఫింగర్ సిట్రాన్ అనే పేర్లతోనూ పిలుస్తారు.</p>

<p>ఇది ఒక సుగంధభరితమైన పండు. దీని చర్మం నిమ్మ, నారింజ తొక్కలను పోలి ఉంటుంది. ఇది కూడా ఒక సిట్రస్ పండు, అయితే ఇది పుల్లగా కాకుండా కొంచెం తీపిగా, ఒక ప్రత్యేకమైన రుచిని కలిగి ఉంటుంది. ఈ పండులోని తొక్కను, గుజ్జును రెండింటిని తినేయవచ్చు, విత్తనాలు కూడా ఉండవు. ఇందులో విటమిన్ సి పుష్కలంగా ఉంటుంది.</p>

<p>బుద్ధుని చేతి ఫలంతో సాధారణంగా జామ్‌లు, పెర్ఫ్యూమ్‌లు, సుగంధ నూనెలను తయారు చేస్తారు. బుద్ధుని చేతి ఫలం అనేక వ్యాధులకు దివ్యౌషధంలా కూడా పనిచేస్తుందని వివిధ నివేదికలు వెల్లడించాయి. ఈ పండుతో ఎలాంటి ప్రయోజనాలు ఉంటాయో ఇప్పుడు తెలుసుకుందాం.</p>

<h3>నొప్పి నివారిణి</h3><p>బుద్ధుని చేతి ఫలంను వివిధ రకాల నొప్పులకు చికిత్స కోసం ఉపయోగిస్తారు. ఈశాన్య భారతదేశంలో ఈ పండును శతాబ్దాలుగా నొప్పి నివారిణిగా ఉపయోగిస్తూ వస్తున్నారు. బుద్ధుని చేతి పండులో కొమారిన్, లిమోనిన్, డయోస్మిన్‌ అనే సమ్మేళనాలు ఉన్నాయి. ఇవి నొప్పి నివారణ ఏజెంట్లుగా పనిచేస్తాయి. గాయాలు అయినపుడు, శస్త్రచికిత్స అనంతర అసౌకర్యం, కోతలు, వాపుల నుంచి ఉపశమనం కోసం అద్భుతమైనది.</p>

<h3>జీర్ణ సమస్యలు ఉండవు</h3><p>కడుపు నొప్పి, విరేచనాలు, తిమ్మిరి, ఉబ్బరం, మలబద్ధకం వంటి వివిధ జీర్ణ సమస్యలకు బుద్ధుని చేతి ఫలం శక్తివంతమైన నివారణగా పని చేస్తుంది. దాని శోథ నిరోధక లక్షణాలు కడుపు లైనింగ్ లోపల మంటను శాంతపరచడంలో, పేగు కండరాలను సడలించడంలో అద్భుతాలు చేస్తాయి. తద్వారా జీర్ణక్రియ మృదువుగా, మలమూత్ర విసర్జనలను సాఫీగా జరిగేలా ఉపకరిస్తాయి.</p>

<h3>రోగనిరోధక శక్తికి</h3><p>బుద్ధుని చేతి ఫలంలో ఒక విలక్షణమైన పాలీశాకరైడ్ ఉంటుంది, ఇది మాక్రోఫేజ్ కార్యకలాపాలను ప్రేరేపించడానికి ఉత్ప్రేరకంగా పనిచేస్తుంది, రోగనిరోధక శక్తిని మరింత పెంచుతుంది. ఈ పండు రికవరీ ప్రక్రియను వేగవంతం చేస్తుంది, త్వరగా ఆరోగ్యవంతులుగా మారడానికి వీలు కల్పిస్తుంది. జలుబు లేదా ఫ్లూతో బాధపడుతున్నప్పుడు ఈ పండు తింటే త్వరగా కోలుకోవచ్చు.</p>

<h3>శ్వాసకోశ సమస్యలు దూరం</h3><p>అనేక సిట్రస్ పండ్ల వలె, బుద్ధ హ్యాండ్ కూడా అసాధారణమైన చికిత్స లక్షణాలను కలిగి ఉంది, ఇది శ్వాసకోశ వ్యాధులకు దివ్యౌషధంగా చేస్తుంది. దీని ఎక్స్‌పెక్టరెంట్ లక్షణాలు అధిక దగ్గు, కఫం, జలుబు లక్షణాలను తగ్గించడంలో సహాయపడతాయి. ఈ పండ్లను నీటిలో, పంచదారలో నానబెట్టడం వల్ల దాని ప్రయోజనాలను మెరుగుపరుస్తుంది. బుద్ధుని చేతి ఫలం శ్వాసకోశ అసౌకర్యానికి సంపూర్ణ పరిష్కారాన్ని అందిస్తుంది.</p>

<h3>రక్తపోటును నియంత్రిస్తుంది</h3><p>బుద్ధుని చేతి ఫలం వాసోడైలేటర్ లక్షణాలకు ప్రసిద్ధి చెందింది, ఇది కరోనరీ రక్త నాళాలను విశ్రాంతి తీసుకోవడానికి సహాయపడుతుంది. రక్త నాళాలలో ఏదైనా మలినాలను క్లియర్ చేయడంలో చురుకుగా సహాయపడుతుంది. ఈ పండు రక్త ప్రసరణను మెరుగుపరుస్తుంది, అధిక రక్తపోటును నియంత్రిస్తుంది. తద్వారా స్ట్రోకులు, గుండెపోటుల సంభావ్యతను తగ్గిస్తుంది.</p>

<ul><li>Buddha's Hand Fruit Benefits: బుద్ధుని చేతి ఫలం పేరును ఎంతమంది విన్నారు? ఈ పండు అనేక వ్యాధులకు దివ్యౌషధం.&nbsp;</li></ul>

International Chess Day। చదరంగం చరిత్ర మనదే.. చెస్ ఆడితే కలిగే ప్రయోజనాలు తెలుసుకోండి!

<p>International Chess Day 2023: ప్రజలు అత్యంత ఇష్టపడే బోర్డ్ గేమ్‌లలో చదరంగం కూడా ఒకటి. ప్రపంచంలోని ప్రతిమూలలో చెస్ ఆడే వారు ఉంటారు. చెస్ ఆటను నిజ జీవితానికి సూచికగా తరచూ చెప్తారు, 'జీవితమే ఒక చదరంగం' అంటూ ప్రస్తావించడం తెలిసిందే. ఈ చెస్ అనేది ఇద్దరు కలిసి ఆడే ఆట. దీనిని ఆడటానికి మంచి ఏకాగ్రత, చురుకైన మెదడు, అద్భుతమైన వ్యూహాలు, అంకితభావం అవసరం. ఆటలో గెలవాలంటే ఎత్తుకు పైఎత్తులు వేయడం తెలిసుండాలి. ఈ ఆటలో ఒక రాజసం ఉంది, అందుకే మామూలు వ్యక్తులే కాకుండా రాజకీయంలో ఉండే వారూ ఈ ఆటను ఎక్కువ ఇష్టపడతారు.</p>

<p>ఈరోజు అంతర్జాతీయ చదరంగం దినోత్సవం. ప్రతి సంవత్సరం, జూలై 20న అంతర్జాతీయ చదరంగం దినోత్సవాన్ని చాలా వైభవంగా జరుపుకుంటారు. ఈ సంవత్సరం కూడా, జూలై 20, గురువారం నాడు ప్రత్యేక దినోత్సవాన్ని జరుపుకుంటారు. ఈ మేధోపరమైన, సాంస్కృతిక, చారిత్రక ఆటకు గుర్తింపు తీసుకురావడం కోసం జూలై 20న ప్రపంచ చదరంగా దినోత్సవంగా ఐక్యరాజ్య సమితి గుర్తించింది.</p>

<h3>చదరంగం ఆట మూలాలు భారతదేశంలోనే</h3><p>చరిత్ర ప్రకారం, చదరంగం ఆట మూలాలు భారతదేశంలోనే ఉన్నట్లు అర్థమవుతుంది. గుప్తుల కాలంలో ఉత్తర భారత ఉపఖండంలో ఆడిన చతురంగ ఆటలో భాగంగానే చదరంగం మూలాలు ఉన్నాయని నమ్ముతారు. వివిధ దేశాల మధ్య వాణిజ్యం ప్రారంభమైనపుడు వర్తకుల ద్వారా భరతఖండం నుంచి పశ్చిమాన పర్షియా వరకు ఈ చదరంగం ఆట వ్యాపించింది. అక్కడ వారు ఈ ఆటను చత్రంగ్ లేదా షత్రంజ్ అనే పేరుతో పిలిచేవారు. చదరంగం ఆట ప్రారంభ సూచనలు 600 CE నాటి పర్షియన్ మాన్యుస్క్రిప్ట్‌లో గుర్తించడం జరిగింది, దీనిని భారత ఉపఖండంకు చెందిన రాయబారి ద్వారా నాటి పర్షియన్ రాజు ఖోస్రో Iకి బహుమతిగా అందించారు. కాలక్రమేణా, ఇది ఐరోపా, రష్యాలోనూ ప్రజాదరణ పొందింది, ఈక్రమంలో ఈ ఆట 2,000 కంటే ఎక్కువ వేరియంట్‌లుగా రూపాంతరం చెందింది. ఈ రోజు మనకు తెలిసిన ఆధునిక చెస్‌గా పరిణామం చెందింది.</p>

<h3>చెస్ ఆడితే కలిగే ప్రయోజనాలు</h3><ul><li>మీ IQని పెంచుతుంది</li><li>అల్జీమర్స్ రాకుండా సహాయపడుతుంది</li><li>మెదడుకు రెండు వైపులా వ్యాయామం చేస్తుంది</li><li>మీ సృజనాత్మకతను పెంచుతుంది</li><li>మీ జ్ఞాపకశక్తిని మెరుగుపరుస్తుంది</li><li>మీలో సమస్య పరిష్కార నైపుణ్యాలను పెంచుతుంది</li><li>ఇది మీ పఠన నైపుణ్యాలను మెరుగుపరుస్తుంది</li><li>మీ ఏకాగ్రతను మెరుగుపరుస్తుంది</li><li>ఒత్తిడిలోనూ మెరుగ్గా, చురుగ్గా ఆలోచింపజేస్తుంది</li><li>ఆత్మవిశ్వాసాన్ని పెంపొందిస్తుంది</li><li>జీవితంలో ఓటమి, గెలుపులు సహజమని నేర్పుతుంది.</li></ul><p>మరెందుకు ఆలస్యం, మీరు <a class="manualbacklink" target="_blank" href="https://telugu.hindustantimes.com/lifestyle/benefits-of-playing-chess-may-helpful-for-alzheimers-and-dementia-121686568319640.html">చెస్</a> ఆడటం ప్రారంభించండి, మానసికంగా మెరుగ్గా అవ్వండి.</p>

<ul><li>International Chess Day 2023: ఈరోజు అంతర్జాతీయ చదరంగం దినోత్సవం. చదరంగం ఆట మూలాలు, చరిత్ర, చెస్ ఆడితే కలిగే ప్రయోజనాలు ఇక్కడ తెలుసుకోండి.</li></ul>

Chanakya Niti | జీవితంలో ఈ నాలుగు విషయాలను రహస్యంగా ఉంచాలి!

<p>Chanakya Niti: భారతీయ తత్వవేత్త ఆచార్య చాణక్యడు తన విలువైన ఆలోచనలను భావితరాలకు అందించారు. ప్రతీ ఒక్కరు తమ జీవితంలో అనుసరించాల్సిన నీతిని తన నీతిశాస్త్రంలో సవివరంగా పొందుపరిచారు, ఇదే చాణక్య నీతిగా నేటికి ఎంతో ప్రాచుర్యంలో ఉంది. ఇందులో మానవ జీవితానికి సంబంధించిన అన్ని అంశాలపై, అన్ని కోణాలలో వివరణ ఉంది. మెరుగైన జీవితం కోసం ఈ విధానాలు నేటికీ ఆచరించదగినవి. చాణక్యుడి నీతిని పాటించడం వల్ల ఆ వ్యక్తుల జీవితం మెరుగుపడుతుంది. సంబంధాలు బాగుంటాయి, సమాజంలో గౌరవం ఉంటుంది. అంటే ఆ వ్యక్తి ప్రతి దశలో విజయాన్ని అందుకుంటాడు.</p>

<p>ఆచార్య చాణక్యుడు తన నీతిశాస్త్రంలో ఏ వ్యక్తి అయినా తన జీవితానికి సంబంధించి నాలుగు విషయాలను రహస్యంగా ఉంచాలని చెప్పారు. ఈ 4 విషయాలు బహిరంగంగా వెల్లడిస్తే ఆ వ్యక్తి తన గౌరవం కోల్పోవడమే కాకుండా జీవితంలో ప్రతి మలుపులోనూ ఇబ్బంది పడాల్సి వస్తుందని స్పష్టం చేశారు. మరి ఆ నాలుగు కీలక రహస్యాలు ఏమిటి? ఇక్కడ తెలుసుకోండి.</p>

<h3>1. దానధర్మాలు</h3><p>దానధర్మాలు అనేవి నిజాయితీ గల హృదయంతో చేయాలి, దానధర్మాలు చేసి వాటికి ప్రతిఫలం ఎప్పటికీ ఆశించకూడదు. అలాగే తాము చేసిన దానధర్మాల గురించి ఎవరికీ చెప్పుకోకూడదు. దానం చేశామని, ధర్మం చేశామని ఇతరులకు గొప్పగా చెప్పుకోవడం ద్వారా మీ విలువ తగ్గుతుంది కానీ పెరగదని చాణక్యుడు తెలిపారు. చాణక్యుడి ప్రకారం, దాతృత్వం అనేది ఒక గొప్ప కార్యం. అది ఇతరులకు వివరించడం ద్వారా, దాని ప్రభావం తగ్గుతుంది. తత్ఫలితంగా, వారికి ఎలాంటి అదృష్ట ఫలాలు లభించవు. గుప్తదానాలు బహుళ ఫలితాలను ఇస్తుందని చెప్పారు. అంటే మనం దానం చేసేటప్పుడు రహస్యంగా చేయాలి. ఇతరులకు తెలియజేయకూడదు.</p>

<h3>2. ఇంటి సమస్యలు</h3><p>ప్రతీ ఇంట్లోనూ సమస్యలు ఉంటాయి, అయితే ఈ సమస్యలను గుట్టుగా ఉంచుకోవాలని చాణక్యుడు తెలిపారు. తమ ఇంటి సమస్యలను, కుటుంబ సభ్యుల లోపాలను ఇతరుల వద్ద ఎత్తి చూపకూడదు, కుటుంబానికి కళంకం తెస్తుంది, కాబట్టి ఎల్లప్పుడూ ఇంటి సమస్యలను తమలో తాము పరిష్కరించుకోవాలి. ఇంట్లో ఏం జరిగిందో ఇతరులకు చెప్పకండి. మీ ఇంటి సమస్యలను ఇతరులకు చెప్పడం ద్వారా వారి మీకు శత్రువులు తయారై, మీ పరువు ప్రతిష్టలను దెబ్బతీయడానికి ఉపయోగించుకోవచ్చు.</p>

<h3>3. శారీరక సంబంధాలు</h3><p>మీరు మీ వైవాహిక జీవితంలో ఆనందాన్ని కొనసాగించాలనుకుంటే, మీ శారీరక సంబంధాన్ని ఎప్పుడూ బహిరంగపరచవద్దు. భార్యాభర్తల మధ్య బంధం గురించిన ఏ చర్చ కూడా తృతీయ పక్షం వద్దకు రాకూడదని చాణక్యుడు అన్నారు, లేకుంటే ఆ బంధం విచ్ఛిన్నమై, ఆ వ్యక్తి సమాజంలో చెడు గుర్తింపు పొందుతాడని చాణక్యుడు చెప్పాడు. అందుకే భార్యాభర్తల మధ్య నాలుగు గోడల మధ్య జరిగినవి ఇతరులతో పంచుకోకూడదు. అలాగే మీ శారీరక సంబంధాలు బయటకు చెబితే మీ గౌరవం పోతుందని చెప్పారు.</p>

<h3>4. వైద్యం- ఔషధం</h3><p>చాణక్యుడు ప్రకారం, వ్యక్తులు తమకు తెలిసిన వైద్యం గురించి గానీ, ఔషధాల గురించిన పూర్తి సమాచారాన్ని ఎల్లప్పుడూ గోప్యంగా ఉంచాలి. ఇవి ఇతరుల అనారోగ్యానికి చికిత్స చేయడానికి సహాయపడుతున్నప్పటికీ, చాలా మంది దుర్వినియోగం చేసే అవకాశం ఉంది. చెడ్డ అవసరాలకు వాడుకునే అవకాశం ఉంది. కాబట్టి, వైద్య సమాచారం, ఔషధాల సమాచారం కొద్దిమందికే తెలిసి ఉండాలి. అది తెలిసిన వారు తమ జ్ఞానాన్ని రహస్యంగా ఉంచాలని <a class="manualbacklink" target="_blank" href="https://telugu.hindustantimes.com/lifestyle/chanakya-niti-insulting-them-is-greater-sin-ever-in-life-says-niti-shastra-121689245340096.html">ఆచార్య చాణక్య</a> పేర్కొన్నారు.</p>

<ul><li>Chanakya Niti: ఆచార్య చాణక్యుడు తన నీతిశాస్త్రంలో ఏ వ్యక్తి అయినా తన జీవితానికి సంబంధించి నాలుగు విషయాలను రహస్యంగా ఉంచాలని చెప్పారు. ఆ నాలుగు కీలక రహస్యాలు ఏమిటి? ఇక్కడ తెలుసుకోండి.</li></ul>

Improve Your Skills। నైపుణ్యం కలవాడే విజేత, మీ నైపుణ్యాలు మెరుగుపరుచుకునేందుకు చిట్కాలు!

<p>Tips To Improve Your Skills: చదువు పూర్తవగానే ఇక మనం నేర్చుకోవాల్సింది ఏం లేదు అని అనుకోవద్దు. నేర్చుకోవడం అనేది నిరంతర ప్రక్రియ, నేటి పోటీ ప్రపంచంలో ఎంత నేర్చుకున్నా, ఏం నేర్చుకున్నా తక్కువే అవుతుంది. జీవితంలో వ్యక్తిగతంగా, వృత్తిగతంగా పురోభివృద్ధి సాధించాలంటే ఎప్పటికప్పుడు మన నైపుణ్యాలను మెరుగుపరుచుకోవాలి, కొత్త నైపుణ్యాలను నేర్చుకుంటూ ఉండాలి.</p>

<p>మీ నైపుణ్యాలను మెరుగుపరచుకోవడానికి మార్గాలను వెతకడం వ్యక్తిగత వృద్ధికి మొదటి మెట్టు. మిమ్మల్ని మీరు నవీకరించుకుంటూ ఉంటే మీ లక్ష్యాలను సులభంగా చేరుకోవచ్చు, ఉన్నత లక్ష్యాలను ఏర్పరుచుకోవచ్చు, కెరీర్‌లో పురోగతి సాధించవచ్చు, జీవితంలో ఉన్నత స్థితికి చేరుకోవచ్చు. మీరు కూడా మీ నైపుణ్యాలను మెరుగుపరుచుకోవాలని భావిస్తుంటే ఆ ప్రక్రియకు సాధారణమైన కొన్ని దశలు ఉన్నాయి, అవేమిటో ఇక్కడ తెలుసుకోండి.</p>

<h3>1. మీ బలాలు, బలహీనతలను గుర్తించండి</h3><p>మీరు మీ అభివృద్ధి దిశగా ప్రయాణాన్ని ప్రారంభించడానికి, ముందుగా బలాలు, బలహీనతలను గుర్తించండి. మీరు వేటిలో మెరుగ్గా ఉన్నారు, ఎక్కడ వెనకబడి ఉన్నారో ఆత్మపరిశీలన చేసుకోండి. ఎక్కడైతే మీరు లోటుగా ఉన్నట్లు భావిస్తున్నారో, ఏయే రంగాలలో ఇంకా మెరుగుపడాలని భావిస్తున్నారో వాటిపై దృష్టి సారించండి.</p>

<h3>2. సరైన నైపుణ్యాలను ఎంచుకోండి</h3><p>నైపుణ్యాల ఎంపిక కూడా చాలా కీలకం. మీరు మీ బలాలు, బలహీనతల గురించి సరైన అవగాహన కలిగి ఉంటే, మీరు అభివృద్ధి చేయాలనుకుంటున్న నైపుణ్యాలను ఎంచుకోవడంపై ఆలోచన చేయండి. మీరు మీ బలమైన నైపుణ్యాలపై పనిచేస్తూ వాటిని తదుపరి స్థాయికి తీసుకెళ్లాలనుకుంటున్నారా? లేక, బలహీనంగా ఉన్న నైపుణ్యాలను సానపెట్టాలనుకుంటున్నారా? లేక కొత్త నైపుణ్యాలు నేర్చుకోవాలనుకుంటున్నారా? అనేది నిర్ణయించుకోండి. మీరు ఏ నైపుణ్యాన్ని మెరుగుపరుచుకోవాలని ఎంచుకున్నా, అది మీరు మరింత ప్రభావవంతంగా పనిచేయడానికి, మీరు మీ లక్ష్యాన్ని సాధించడానికి, మీ కెరీర్‌లో ముందుకు సాగడానికి సహాయపడేదై ఉండాలి.</p>

<h3>3. ఇతరుల అభిప్రాయాన్ని అడగండి</h3><p>మీరు ఎంచుకున్న నైపుణ్యాలపై మీ అంచనా అంత కచ్చితమైనది కాకపోవచ్చు. కాబట్టి ఈ మార్గంలో మీ సందేహాలు తీర్చడానికి, అపోహలను తొలగించడానికి మీ స్నేహితులు, కుటుంబ సభ్యులు, సహోద్యోగులతో మాట్లాడండి, వారు మీకు ఏ నైపుణ్యాలను మెరుగుపరచాలని సిఫార్సు చేస్తారో అభిప్రాయాన్ని అడగండి</p>

<h3>4. విమర్శలను స్వీకరించండి</h3><p>మీ పనితీరు బాగాలేదని మీపై ఎవరైనా విమర్శలు చేస్తే వాటిని వ్యక్తిగత దాడిగా తీసుకోకండి, వారికి విరుద్ధంగా ప్రవర్తించకండి. బదులుగా, ఇతరులు వారు చెప్పేది వినండి, దానిపై చర్చించండి. ఇతరుల విమర్శలు, సూచనలను తార్కిక దృక్కోణం నుండి విశ్లేషించడానికి ప్రయత్నించండి. అవి సరైన పాయింట్‌ని హైలైట్ చేస్తున్నాయో లేదో చూడండి. మీరు నిజమేనని భావిస్తే ఆ విమర్శలను స్వీకరించి మీ నైపుణ్యాలను మెరుగుపరుచుకోడానికి సిద్ధం కండి.</p>

<h3>5. మీ నైపుణ్యాలకు శిక్షణ ఇవ్వండి</h3><p>నైపుణ్యాలను నేర్చుకోవడమే కాదు, వీటిని సాధన చేయడం కూడా ముఖ్యమే. ఏ వస్తువునైనా ఉపయోగించకుండా ఉంటే అది కొంతకాలానికి తుప్పుపట్టడం, పనిచేయకుండా పోతుంది. నైపుణ్యం అయినా అంతే, మీరు వాడకుండా ఉంచే నైపుణ్యం సాధన చేయకపోతే కొంతకాలానికి నిరుపయోగంగా మారుతుంది. అప్పుడు నేర్చుకుని కూడా లాభం లేదు. కాబట్టి మీరు ఏదైనా ఒక నిర్దిష్ట నైపుణ్యంలో నైపుణ్యం సాధించాలనుకుంటే, నిరంతరం శిక్షణ పొందాలి. ఉదాహరణకు మీరు కమ్యూనికేషన్ స్కిల్స్ మెరుగుపరుచుకున్నారు, అప్పుడు ఎవరితో అయినా మాట్లాడితేనే, మీ భావాలను వ్యక్తపరిస్తేనే మీ స్కిల్స్ మరింత మెరుగుపడతాయి, ప్రాక్టీస్ లేకుంటే ఉన్న స్కిల్స్ కూడా పోతాయి.</p>

<h3>ప్రపంచ యువజన నైపుణ్యాల దినోత్సవం</h3><p>ఈరోజు ప్రపంచ యువజన నైపుణ్యాల దినోత్సవం (World Youth Skills Day 2023). ప్రపంచంలోని యువతలో నైపుణ్యాల అభివృద్ధిని ప్రోత్సహించడానికి ఐక్యరాజ్యసమితి ప్రారంభించిన కార్యక్రమం ఇది. ఈ వేడుకను ప్రతీ సంవత్సరం జూలై 15న జరుపుతారు. యువత తమ నైపుణ్యాలను మెరుగుపరుచుకొని సమాజంలో ఉన్నత వ్యక్తులుగా ఎదగాలని, భవిష్యత్తు కోసం గొప్ప సమాజాన్ని తీర్చిదిద్దాలనే ఉద్దేశ్యంతో వరల్డ్ యూత్ స్కిల్స్ డేను నిర్వహిస్తున్నారు.</p>

<ul><li>World Youth Skills Day 2023: ఈరోజు ప్రపంచ యువజన నైపుణ్యాల దినోత్సవం. మీరు మీ నైపుణ్యాలను మెరుగుపరుచుకోవాలని భావిస్తుంటే ఇక్కడ కొన్ని చిట్కాలు తెలుసుకోండి.</li></ul>

Letting Go: ఆరోగ్యంగా, ఆనందంగా జీవించాలంటే.. వీటిని వదులుకోవాలి!

<ul><li>how to let go: జీవితం అనేది ఎవరికైనా ఒక్కటే ఉంటుంది. ఈ ఉన్న ఒక్క జీవితంలో ఆరోగ్యంగా, ఆనందంగా జీవించాలంటే మీరు కొన్నింటిని వదులుకోవాలి, అవేంటంటే...</li></ul>

Chandra Effects On Health। మనిషి ఆరోగ్యంపై చంద్రుడి ప్రభావం ఉంటుందా? కొన్ని ఆసక్తికర విషయాలు ఇవిగో!

<p>Chandra Effects On Health: సూర్యుడు మనకు వెలుగునిస్తాడు, సూర్యుడి ప్రభావం మనుషుల ఆరోగ్యంపై చాలా ఉంటుంది. ఎందుకంటే సూర్యరశ్మిని గ్రహించడం ద్వారా మన శరీరం సహజంగా 'విటమిన్ డి' ని పొందుతుంది. ఇది రోగనిరోధక వ్యవస్థ నియంత్రణకు, శరీరంలో కాల్షియం శోషణకు, మెరుగైన నిద్రకు ఇలా అనేక రకాలుగా ప్రయోజనం చేకూరుస్తుంది. సూర్యుడు సరే, మన భూమిపై చంద్రుడి ప్రభావం కూడా ఉంటుంది. మరి చంద్రుడు మనుషుల ఆరోగ్యంపై ప్రభావం చూపుతాడా అంటే? పౌర్ణమి నాటి చంద్రుడు ప్రభావం మనుషుల ఆరోగ్యంపై కచ్చితంగా ఉంటుందని వివిధ అధ్యయనాలు పేర్కొన్నాయి. పౌర్ణమి చంద్రుడు, మానవ ఆరోగ్యంపై దాని ప్రభావాలకు సంబంధించి పరిశోధకులు కనుగొన్న కొన్ని ఆసక్తికరమైన విషయాలు ఇక్కడ చూడండి.</p>

<h3>హృదయ స్పందన పెరుగుతుంది</h3><p>ఇండియన్ జర్నల్ ఆఫ్ బేసిక్ అండ్ అప్లైడ్ మెడికల్ రీసెర్చ్‌లో ప్రచురితమైన ఒక అధ్యయనం ప్రకారం, చంద్రుని చక్రాలు మనిషి హృదయ స్పందనలపై ప్రభావం చూపుతాయి. పౌర్ణమి లేదా అమావాస్య రోజుల్లో వ్యాయామాలు చేస్తున్నప్పుడు హృదయ స్పందనలు సాధారణం కంటే మరింత హెచ్చుగా ఉంటాయి. కాబట్టి ఎప్పుడైనా వ్యాయామాలు చేసేటపుడు అమావాస్య లేదా పౌర్ణమి రోజు వ్యాయామ తీవ్రత తగ్గించుకోవాలనేది ఆ అధ్యయన ఫలితాల సారాంశం.</p>

<h3>మూడ్ స్వింగ్స్‌కి కారణం</h3><p>భూమిపైన సముద్రాలలో కలిగే ఆటుపోట్లకు చంద్రుడు కారణమైనట్లే, మనిషి మెదడులో ఆటుపోట్లకు కూడా చంద్రుడు కారణం కావచ్చు. మెదడులో నీటి శాతం ఎక్కువ ఉన్నందున, చంద్రుని గురుత్వాకర్షణ శక్తి మీ మెదడుపై కూడా ప్రభావం చూపుతుందని డచ్ పరిశోధకులు ఊహించారు, ఈ కారణంగా పౌర్ణమి లేదా అమావాస్య రోజున మూడ్ స్వింగ్స్ ఎక్కువ ఉంటాయనేది డచ్ పరిశోధకుల అభిప్రాయం.</p>

<p>బ్రిటీష్ శాస్త్రవేత్తలు చేసిన ఇతర అధ్యయనాల ప్రకారం నిండు పౌర్ణమి , మూర్ఛ వ్యాధిగ్రస్తులలో మూర్ఛలు వచ్చే అవకాశాలను తగ్గించవచ్చని వెల్లడిస్తున్నాయి. చంద్రుడు ప్రకాశవంతంగా ఉన్నప్పుడు, మూర్చ రోగుల్లో ఎపిలెప్టిక్ మూర్ఛలు తక్కువ ఉన్నట్లు వారు గమనించారు. సూర్యుడు అస్తమించినప్పుడు మీ మెదడులో సహజంగా స్రవించే మెలటోనిన్ అనే హార్మోన్ దీనికి కారణమని వారు చెబుతున్నారు, పౌర్ణమ్ రోజు ఈ హార్మోన్ శాంత ప్రభావాలు ఎక్కువ ఉంటాయని తెలిపారు.</p>

<h3>కిడ్నీ నొప్పిలో హెచ్చుతగ్గులు</h3><p>యూరాలజీ జర్నల్‌లో ప్రచురించిన ఒక అధ్యయనం ప్రకారం, పౌర్ణమి సమయంలో కిడ్నీ స్టోన్ నొప్పి గణనీయంగా పెరిగింది. ఈ సమయంలో ఎక్కువ మంది రోగులు ఆసుపత్రులలో చేరారని కనుగొన్నారు. దీనికి విరుద్ధంగా, అమావాస్య రోజున కిడ్నీలలో నొప్పి నుంచి ఉపశమన ప్రభావాలు ఉన్నట్లు గుర్తించారు. అయితే, కిడ్నీ నొప్పిలో హెచ్చుతగ్గులకు <a class="manualbacklink" target="_blank" href="https://telugu.hindustantimes.com/lifestyle/moon-salutation-know-cool-benefits-of-chandra-namaskar-during-the-hot-summer-season-121685107313519.html">చంద్రుని</a> ప్రభావాలే కారణం అని కచ్చితమైన ఋజువు లేదు, దీనిపై మరిన్ని పరిశోధనలు జరగాల్సిన అవసరం ఉంది.</p>

<h3>నిద్ర చక్రంలో మార్పులు</h3><p>కరెంట్ బయాలజీలో ప్రచురించిన ఒక అధ్యయనం ప్రకారం, చంద్రకాంతి మనిషి నిద్ర విధానాలపై ప్రభావం చూపుతుంది. ప్రకాశవంతమైన చంద్రుడు ఉన్నప్పుడు మెలటోనిన్ స్థాయిలు తక్కువగా ఉండటమే కాకుండా, నిద్రపోవడానికి 5 నిమిషాలు ఎక్కువ సమయం పట్టిందని, అలాగే సాధారణం కంటే 20 నిమిషాలు తక్కువ నిద్రపోతారని పరిశోధకులు గుర్తించారు. రోజూవారీగా కంటే 30 శాతం తక్కువ REM ఉందని పరిశోధకులు నిర్ధారించారు. <a class="manualbacklink" target="_blank" href="https://telugu.hindustantimes.com/lifestyle/sleep-deprivation-causes-and-dangerous-side-effects-of-lack-of-sleep-121689304648116.html">నిద్రలేమి</a>తో మీ ఆరోగ్యం దెబ్బతింటుంది. మంచి నిద్ర పొందడానికి మార్గాలను అన్వేషించాలని సూచిస్తున్నారు.</p>

<h3>స్త్రీలలో ఋతుచక్రంపై ప్రభావం</h3><p>స్త్రీలలో సగటు <a class="manualbacklink" target="_blank" href="https://telugu.hindustantimes.com/lifestyle/menstrual-hygiene-day-2023-date-history-significance-and-tips-for-periods-hygiene-121685175896513.html">ఋతు చక్రం</a> 28 రోజులు, ఇది 29+ రోజుల చంద్ర చక్రంతో సమానంగా ఉంటుంది. చైనీస్ పరిశోధకుల ప్రకారం ఈ సమయం యాదృచ్చికం కాకపొవచ్చు, వారి పరిశోధనల్లో భాగంగా కొంతమంది స్త్రీల ఋతుచక్రాలను పర్యవేక్షించారు. దాదాపు వారందరిలో పౌర్ణమి దగ్గరలో అండోత్సర్గము, అమావాస్య సమయంలో ఋతుస్రావం అవుతుందని కనుగొన్నారు. ఈ దృగ్విషయానికి వైట్ మూన్ సైకిల్ అని పేరు కూడా ఉంది. భూమిపైన సంతానోత్పత్తికి చంద్రుడి ప్రభావానికి ఇది అద్దం పడుతుందని చెబుతారు.</p>

<ul><li>Chandra Effects On Health: పౌర్ణమి చంద్రుడు, మానవ ఆరోగ్యంపై దాని ప్రభావాలకు సంబంధించి పరిశోధకులు కనుగొన్న కొన్ని ఆసక్తికరమైన విషయాలు ఇక్కడ చూడండి.</li></ul>

How To Forget a Bad Memory। మీ జీవితంలోని ఆ చేదు జ్ఞాపకాన్ని మరిచిపోలేకపోతున్నారా? ఈ పని చేయండి!

<p>How To Forget a Bad Memory: జీవితంలో ప్రతీ ఒక్కరికి చేదు జ్ఞాపకాలు అనేవి ఉంటాయి. కొందరికి డబ్బు, హోదా, అంతస్తు అన్నీ ఉన్నప్పటికీ జీవితంలో ఏదో ఒక బాధ, ఏదో ఒక చేదు జ్ఞాపకం వెంటాడవచ్చు. బంధాలు విడిపోవడం, నమ్మకద్రోహం జరగడం, అవమానాల పాలవడం ఇలా ఏవైనా ఉండవచ్చు. చేదు జ్ఞాపకాలను అందరూ ఒకేలా స్వీకరించకపోవచ్చు. కొందరు సులభంగా మరిచిపోయి, కొత్త జీవితాన్ని ప్రారంభిస్తే, మరికొందరు అవే జ్ఞాపకాల్లో బ్రతుకుతూ కుమిలిపోతూ ఉంటారు.</p>

<p>ఎందుకంటే మరచిపోవడానికి అదేమి వస్తువు కాదు, జ్ఞాపకం. జ్ఞాపకాలను వదిలేయడం అనుకున్నంత సులభం కాదు. మనం ఎన్ని ప్రయత్నాలు చేసినప్పటికీ, గతానికి సంబంధించిన ఫ్లాష్‌బ్యాక్‌లు మళ్లీ మన మెదడును తడతాయి. గుండె పగిలిన నాటి జ్ఞాపకం గుర్తుకు వచ్చిన ప్రతీసారి మన మనశ్శాంతిని దోచుకుంటున్నట్లు అనిపిస్తుంది. మరి ఆ చేదు జ్ఞాపకాలను మరచిపోవడానికి ఏదైనా మార్గం, మందు ఉందా అంటే? నిపుణులు కొన్ని సలహాలు, సూచనలు అందించారు. అవి ఎలా ఉన్నాయో ఇక్కడ తెలుసుకోండి.</p>

<h3>అనుభవం నుండి నేర్చుకోవడానికి ప్రయత్నించండి</h3><p>మీకు ఏదైనా నేర్పడానికి జీవితంలో ఒక చెడ్డ రోజు వస్తుంది కావచ్చు. ఆ అసహ్యకరమైన సంఘటనను మరిచిపోవడం అంత సులభం కాకపోవచ్చు. బదులుగా, అది మీ మంచికే జరిగింది అని భావించండి. ఆ అనుభవం నుంచి ఏదైనా నేర్చుకోవడానికి ప్రయత్నించండి. చాలా మందికి చేదు అనుభవాలే తమను ఒక స్థాయిలో నిలబెట్టాయి అని చెబుతారు. కాబట్టి మీరు భరించిన ఆ అనుభవం మిమ్మల్ని మీరు ఒక ఉన్నత వ్యక్తిగా తీర్చిదిద్దుకోవడానికి ఒక ప్రేరణగా ఉపయోగించుకోండి.</p>

<h3>ఈ రోజుపై దృష్టి పెట్టండి</h3><p>నిన్నటి గురించి కాకుండా ఈరోజుపై మీ దృష్టి పెట్టండి. మీ పని మీరు యధావిధిగా చేసుకుంటూపోండి, గతం గురించి ఆలోచిస్తూ ఈరోజు మీ విలువైన సమయాన్ని వృధా చేసుకోకండి. ప్రస్తుతం మీ జీవితంలోని మంచి విషయాల వైపు మీ దృష్టిని మళ్లించండి. మీకు అండగా నిలిచి మీకు మద్దతుగా నిలిచిన వ్యక్తులతో కాలం గడపండి. కాలం గడిచేకొద్దీ, మీ జీవితంలో కొత్త అనుభవాలు వెలుగులోకి వస్తాయి, ఆ చెడ్డ జ్ఞాపకాలు మసకబారడం ప్రారంభిస్తాయి.</p>

<h3>మీ భావోద్వేగాలను గుర్తించండి</h3><p>చెడు జ్ఞాపకాలకు సంబంధించిన భావోద్వేగాలు తరచూ మీలో కలగవచ్చు. వాటి గురించి కలత చెందడం, కోపం రావడం లేదా బాధించడం సహజం. అయినప్పటికీ, దానికి కారణాలు వెతకకండి, మీపైనా గానీ, ఇంకెవరిపైన గానీ నిందలు మోపకండి. అప్పటి కాలం మనది కాదని అనుకోండి. మీ భావోద్వేగాలు గుర్తిస్తూ వాటిని అనుభూతి చెందడం కూడా మంచిదే, ఇది మీరు ఆ జ్ఞాపకాల నుంచి ఊరట పొందటానికి సహాయపడుతుంది.</p>

<h3>మద్దతు కోరండి</h3><p>మీరు చేదు జ్ఞాపకాల నుంచి బయటపడలేకపోతుంటే, మీకు మంచి స్నేహితులు, కుటుంబ సభ్యులు లేదా మీరు మీ భావాలను అర్థం చేసుకునే వారి మద్ధతు కోరండి. వారి మాటలు, సాన్నిహిత్యం మిమ్మల్ని తేలికపరుస్తాయి. ఎవరూ లేకపోతే ఎవరైనా మనస్తత్వ నిపుణులను సంప్రదించండి. వారి మార్గదర్శకత్వంతో మీరు సానుకూల దృక్పథంతో ముందుకు వెళ్లగలరు.</p>

<p>చివరగా చెప్పేదేమిటంటే.. అన్నింటికీ కాలమే సమాధానం చెబుతుంది, అప్పటివరకు మిమ్మల్ని పరీక్షిస్తూనే ఉంటుంది. కాబట్టి ఈ సమయంలో మీకు కావాల్సింది ఓపిక, సహనం.</p>

<ul><li>How To Forget a Bad Memory: చేదు జ్ఞాపకాలను మరచిపోవడానికి ఏదైనా మార్గం, మందు ఉందా అంటే? నిపుణులు కొన్ని సలహాలు, సూచనలు అందించారు. అవి ఎలా ఉన్నాయో ఇక్కడ తెలుసుకోండి.</li></ul>

Manda Vikas