Rules for Bhavani Deekshalu: భవానీ దీక్షాధారణలో భక్తులు పాటించాల్సిన నియమాలు ఇవే..

Rules for Bhavani Deekshalu: అమ్మలగన్నయమ్మ ముగురమ్మల మూలపుటమ్మ బెజవాడ దుర్గమ్మను భక్తిశ్రద్దలతో కొలిచే భక్తులు మండలం రోజుల పాటు దీక్షలు చేపట్టడం 45ఏళ్ల క్రితం ప్రారంభమైంది. మొదట్లో కొద్ది మంది భక్తులతో ప్రారంభమైన ఈ దీక్షలు ప్రస్తుతం ఏటా లక్షలాదిమంది చేపడుతుంటారు.

ప్రధానంగా తమిళనాడు, కర్ణాటక, ఒడిశా, ఉత్తరాంధ్ర భక్తులు లక్షలాది ఈ దీక్షలు చేపడతుంటారు. కనకదుర్గ అమ్మవారిని భక్తితో పూజిస్తే కోరిన కోర్కెలు నెరవేరుతాయని వారి విశ్వాసం. దీక్షల విరమణ సమయంలో విజయవాడ నగరం మొత్తం ఎరుపు రంగు వస్త్రధారణలో ఉన్న భక్తులతో కనుచూపు మేర కిటకిటలాడుతుంది. గత కొన్నేళ్లుగా భవానీ దీక్షలను చేపట్టే వారి సంఖ్య గణనీయంగా పెరుగుతోంది.

ఏటా ఐదారు లక్షల మంది ఈ దీక్షలు చేపడతారని అంచనా. దీక్షల్ని విరమించేందుకు వందల కిలోమీటర్లు కాలి నడకన వచ్చే వారు కూడా ఉంటారు. జాతీయ రహదారుల మీదుగా ఒడిశా బరంపురం వైపు నుంచి, తమిళనాడు నుంచి తెలంగాణ వైపు నుంచి వేలాది మంది భక్తులు దీక్షల విరమణకు తరలి వస్తుంటారు. దీక్షాధారణ ఎక్కడ చేపట్టినా విరమణ మాత్రం దుర్గగుడి హోమగుండంలో పూర్తి చేస్తారు.

భవానీ దీక్షల్లో కీలక అంశాలు ఇవే...

• కనకదుర్గ అమ్మవారి దీక్షలు స్త్రీ పురుష భేదాలు లేకుండా ఎవరైనా చేపట్టవచ్చు.
• భవానీ దీక్షలు చేపట్టే భక్తులు ఉదయాన్నే స్నానం చేసి ఎర్రటి వస్త్రాలను ధరించి, చందనం నుదుటిన ధరించి అమ్మవారి ఆలయంలో దీక్షను ప్రారంభించాలి. ఈ దీక్షలను గురుభవానీలు లేదా అర్చకుల సమక్షంలో చేపడతారు. దీక్షను ధరించే వారు 108 పూసలు ఉన్న ఎర్రటి పగడల దండను మెడలో ధరిస్తారు.
• ఈ దీక్షలు 40రోజుల పాటు పాటించాలి. ప్రతి రోజూ రెండు పూటల చల్లటి నీటితో స్నానం చేసి అమ్మవరి అష్టోత్తరశత నామాల్ని చదివి, దీపారాధన చేయాలి. సాయంత్రం పూట అమ్మవారి గీతాలు స్వయంగా, బృందాలుగా భజన చేయాలి.
• దీక్షలో ఉన్న సమయంలో ఒంటిపూట మాత్రమే భోజనం చేయాలి. కటిక నేల మీద పడుకోవాలి. బ్రహ్మచర్యం పాటించాలి.
• దీక్షా సమయంలో పొగత్రాగడం, మత్తుపదార్ధాలకు దూరంగా ఉండాలి. మాంసాహారానికి దూరంగా ఉండాలి. భవానీ దీక్షలు చేపట్టే పురుషులు స్త్రీల మాదిరి కళ్లకు కాటుక పెట్టుకోవడం, పట్టాలు, మట్టెలు పెట్టుకోవడం చేయకూడదు. పురుషులు స్త్రీల మాదిరి వేషాధారణ చేయడం దీక్ష నియామాలకు విరుద్ధం
• భవానీ దీక్షలను మండలదీక్షగా 40రోజుల పాటు, అర్థమండల దీక్షగా 20రోజులు చేపట్టవచ్చు. దీక్షలు చేపట్టిన వారు విజయవాడ ఇంద్రకీలాద్రిపై జరిగే కలశజ్యోతి ఉత్సవంలో పాల్గొనాలి.
• దీక్షల ముగింపు సందర్భంగా దీక్షాధారులు విజయవాడ వచ్చి కనకదుర్గ ఆలయానికి వచ్చి కృష్ణానదిలో పుణ్య స్నానం చేసి ఇరుముళ్లతో ఇంద్రకీలాద్రి చుట్టూ గిరి ప్రదక్షణ చేయాలి.
• దీక్షా ముగింపు రోజులు అమ్మవారి ఆలయంలో నిర్వహించే శతచండీహోమం పూర్ణాహుతి కార్యక్రమంలో పాల్గొని భవానీ దీక్షలను గురుభవానీల సమక్షంలో విరమింపచేయాలి.