రతన్ టాటా ఇన్నోవేషన్ హబ్లను ప్రారంభించిన ముఖ్యమంత్రి చంద్రబాబు నాయుడు
టాటా గ్రూప్ మాజీ ఛైర్మన్ రతన్ టాటా పేరు మీదుగా ఏర్పాటు చేసిన ఇన్నోవేషన్ హబ్లను ముఖ్యమంత్రి ఎన్.చంద్రబాబు నాయుడు ప్రారంభించారు.
అమరావతి: ఆంధ్రప్రదేశ్ ముఖ్యమంత్రి నారా చంద్రబాబు నాయుడు బుధవారం అమరావతిలో రతన్ టాటా ఇన్నోవేషన్ హబ్లను (RTIH) ప్రారంభించారు. రాష్ట్రవ్యాప్తంగా 5 ఇతర కేంద్రాలను కూడా ఆయన వర్చువల్గా ప్రారంభించారు. ఈ కార్యక్రమానికి టాటా గ్రూప్ చైర్మన్ ఎన్. చంద్రశేఖరన్ కూడా హాజరయ్యారు.
టాటా గ్రూప్ మాజీ ఛైర్మన్ రతన్ టాటా పేరు మీదుగా ఏర్పాటు చేసిన ఈ హబ్లు, ఆవిష్కరణలను, వ్యవస్థాపకతను ప్రోత్సహించడం, స్టార్టప్లకు మార్గదర్శకత్వం వహించడం వంటివి చేస్తాయి.
ఈ సందర్భంగా ముఖ్యమంత్రి మాట్లాడుతూ.. "రతన్ టాటా ఆలోచనలను సజీవంగా ఉంచడానికి మేం ఏదైనా చేయాలనుకున్నాం. ఆ ఆలోచన నుంచే ఈ రతన్ టాటా ఇన్నోవేషన్ హబ్ వచ్చింది" అని అన్నారు.
చంద్రశేఖరన్తో తాను ఫోన్లో ఈ ఆలోచనను పంచుకున్నప్పుడు ఆయన అంగీకరించారని నాయుడు తెలిపారు. "ఈ దేశానికి ఆయన చేసిన గొప్ప సేవలకు గౌరవ సూచకంగా మేం ఆయన బ్రాండ్ను ప్రోత్సహించాలని అనుకుంటున్నాం" అని అన్నారు.
రతన్ టాటా తన చివరి రోజుల్లోనూ సమాజానికి ఎంతో సేవ చేశారని, "ఈ దేశానికి ఆయన చేసిన సేవలకు మనం గౌరవం ఇవ్వాలి" అని ముఖ్యమంత్రి అన్నారు.
ఐదు జోనల్ కేంద్రాలు:
ఈ ఐదు జోనల్ కేంద్రాలకు ప్రముఖ వ్యాపార సంస్థలు మార్గదర్శకత్వం వహిస్తాయని ముఖ్యమంత్రి తెలిపారు. విశాఖపట్నం ఆర్టీఐహెచ్కు జీఎంఆర్ గ్రూప్, రాజమండ్రి ఆర్టీఐహెచ్కు గ్రీన్కో, విజయవాడ ఆర్టీఐహెచ్కు ఎంఈఐఎల్ (MEIL), తిరుపతి ఆర్టీఐహెచ్కు అదానీ గ్రూప్, అనంతపురం ఆర్టీఐహెచ్కు జిందాల్ సంస్థలు నాయకత్వం వహిస్తాయని నాయుడు చెప్పారు.
ఆవిష్కరణలో ఆంధ్రప్రదేశ్ నెం.1
భారతదేశం 1991 సంస్కరణల తర్వాత చాలా మెరుగైన స్థితిలో ఉందని ముఖ్యమంత్రి అన్నారు. భారతదేశం డెమోగ్రాఫిక్ డివిడెండ్ (యువ జనాభా) కలిగి ఉందని, అదే సమయంలో చాలా దేశాలు వృద్ధాప్య సమస్యలతో సతమతమవుతున్నాయని ఆయన తెలిపారు. "యువత రిస్క్ తీసుకోవచ్చు. జనాభాను సరిగ్గా నిర్వహించగలిగితే ఏ దేశం కూడా భారతదేశాన్ని ఓడించలేదు" అని అన్నారు.
ఆంధ్రప్రదేశ్ను ఆవిష్కరణ, వ్యవస్థాపకతకు నెంబర్ వన్ రాష్ట్రంగా తీర్చిదిద్దుతామని నాయుడు అన్నారు. 'ఆవిష్కరణ ఆంధ్ర' అనే కార్యక్రమాన్ని ప్రారంభించామని, దీని ద్వారా ఒక్కో కుటుంబంలో ఒక్కో వ్యవస్థాపకుడిని తయారు చేస్తామని చెప్పారు. ఇప్పటికే ఈ కార్యక్రమం కింద 24 గంటల్లో 1.64 లక్షల మంది ఆన్లైన్ ఎంటర్ప్రెన్యూర్షిప్ ప్రోగ్రామ్లో నమోదు చేసుకొని గిన్నిస్ ప్రపంచ రికార్డు సృష్టించారని ఆయన తెలిపారు.
రాష్ట్రంలోని మొత్తం 175 అసెంబ్లీ నియోజకవర్గాల్లో 175 పారిశ్రామిక హబ్లను ఏర్పాటు చేస్తామని ఆయన హామీ ఇచ్చారు. ఒకవైపు సంపదను సృష్టించడం, మరోవైపు పేదలను ఆదుకోవడం తమ లక్ష్యమని పేర్కొన్నారు. చివరిగా, ఆర్టీఐహెచ్ను విజయవంతం చేయడానికి తోడ్పడాలని పారిశ్రామికవేత్తలను కోరారు.
