రూ.49వేల కోట్ల అమరావతి ప్రాజెక్టులు, రూ.57వేల కోట్ల జాతీయ ప్రాజెక్టులకు శంకుస్థాపన చేయనున్న ప్రధాని

మే2వ తేదీన అమరావతికి ప్రధాని మోదీ రానున్నారు. అమరావతి పునఃప్రారంభ పనులను ప్రధాని మోదీ పున: ప్రారంభిస్తారు. ఈ నేపథ్యంలో రూ.49,040 కోట్ల అమరావతి ప్రాజెక్టులకు శంకుస్థాపన చేయనున్నారు. వీటితో పాటు రూ.57వేల కోట్లతో చేపట్టిన పలు జాతీయ ప్రాజెక్టులకు శంకుస్థాపనలు, ప్రారంభోత్సవాలను వర్చువల్‌గా చేస్తారు.

ప్రధాని మోదీ శంకుస్థాపన చేసే ప్రాజెక్టులు ఇవే..

• అమరావతి శాశ్వత హైకోర్టు, సచివాలయం, అసెంబ్లీ భవనాలకు శంకుస్థాపన చేస్తారు.
• న్యాయమూర్తుల నివాస సముదాయానికి ప్రధాని శంకుస్థాపన చేస్తారు.
• ఎమ్మెల్యేలు, మంత్రులు గృహ సముదాయం నిర్మాణాలకు శంకుస్థాపన చేస్తారు.
• ఆలిండియా సర్వీసెస్ అధికారుల సముదాయం నిర్మాణాలకు శంకుస్థాపన చేస్తారు.
• రాజధాని ప్రాజెక్టులతో పాటు పెద్దఎత్తున కేంద్ర ప్రాజెక్టులకు శంకుస్థాపనలు, ప్రారంభోత్సవాలు చేస్తారు.
• డీఆర్‍డీఏ, డీపీఐఐటీ, ఎన్‍హెచ్‍ఏఐ, రైల్వేకు సంబంధించిన ప్రాజెక్టులకు శంకుస్థాపనలు చేస్తారు.
• రూ.57, 962 కోట్లతో జాతీయ ప్రాజెక్టులకు శంకుస్థాపనలు, ప్రారంభోత్సవాలు చేయనున్నారు.
• నాగాయలంకలో దాదాపు రూ.1500 కోట్లతో మిసైల్ టెస్ట్ రేంజ్‍కు ప్రధాని శంకుస్థాపన చేస్తారు.
• విశాఖలో కేంద్ర ప్రభుత్వం నిర్మించే యూనిటీ మాల్‍కు శంకుస్థాపన చేయనున్నారు.
• రూ.293 కోట్లతో గుంతకల్ వెస్ట్ నుంచి మల్లప్ప గేట్ వరకు చేపట్టిన రైల్వే ప్రాజెక్టుకు శంకుస్థాపన చేస్తారు.
• మరో రూ.3,176 కోట్ల విలువైన నేషనల్ హైవే ప్రాజెక్టులకు కూడా వర్చువల్‍గా శంకుస్థాపన చేస్తారు.
• రూ.3,680 కోట్ల విలువైన పలు నేషనల్ హైవే పనులను ప్రారంభించనున్నారు.
• రూ.254 కోట్లతో పూర్తిచేసిన ఖాజీపేట - విజయవాడ 3వ లైన్‍ను ప్రధాని ప్రారంభిస్తారు.
• గుంటూరు-గుంతకల్ డబ్లింగ్ ప్రాజెక్టులో బుగ్గనపల్లి, పాణ్యం లైన్లకు ప్రారంభోత్సవం నిర్వహిస్తారు.