కడసారి కన్నీటి వీడ్కోలు.. అధికార లాంఛనాలతో మురళీనాయక్ అంత్యక్రియలు.. తల్లడిల్లిన తండ్రి గుండె

ఆపరేషన్ సిందూర్‌లో భాగంగా దేశం కోసం ప్రాణాలర్పించిన వీరజవాన్ మురళీనాయక్ అంత్యక్రియలు.. అధికారిక లాంఛనాల నడుమ ముగిశాయి. శ్రీసత్యసాయి జిల్లా గోరంట్ల మండలం కళ్లితండాలో మురళీనాయక్ అంత్యక్రియలు నిర్వహించారు. కళ్లితండాలోని నివాసం వద్ద మురళీ నాయక్ భౌతికకాయాన్ని ప్రముఖులు సందర్శించి.. అశ్రునివాళులు అర్పించారు. మురళీనాయక్ పార్థీవదేహంపై పుష్పగుచ్ఛం ఉంచి సెల్యూట్ చేశారు.

ఓదార్చిన పవన్, లోకేష్..

అగ్నివీర్ మురళీనాయక్ తల్లిదండ్రులను ఉప ముఖ్యమంత్రి పవన్ కళ్యాణ్, నారా లోకేష్ పరామర్శించారు. ధైర్యంగా ఉండాలని వారిని ఓదార్చారు. మురళీ నాయక్ స్నేహితులు, బంధువులను పరామర్శించారు. యుద్ధానికి ముందు వీరజవాన్ మురళీ నాయక్ బంధువు, స్నేహితుడు రాజశేఖర్ తో జరిపిన వాట్సాప్ చాట్ ను లోకేష్ పరిశీలించారు. మురళీనాయక్ జ్ఞాపకాలను ఈ సందర్భంగా బంధువులు పంచుకున్నారు.

అగ్నివీర్‌కు సెల్యూట్..

వీరజవాన్ మురళీ నాయక్‌కు జై, భారత్ మాతాకి జై, వందేమాతరం అంటూ.. ప్రజలు, స్థానికులు పెద్దఎత్తున నినాదాలు చేశారు. అగ్నివీర్ మురళీ నాయక్ భౌతిక కాయానికి నివాళులు అర్పించి, అంత్యక్రియల్లో పాల్గొనేందుకు భారీసంఖ్యలో ప్రజలు తరలివచ్చారు. మురళీ నాయక్ అంతిమ యాత్రలో పాల్గొన్న నారా లోకేష్.. పార్థీవదేహాన్ని మోసారు. ప్రభుత్వ అధికారిక లాంఛనాల మధ్య.. మురళీ నాయక్ వ్యవసాయ క్షేత్రంలో అంత్యక్రియలను పూర్తిచేశారు. ఉదయం నుంచి మురళీ నాయక్ అంత్యక్రియల ఏర్పాట్లను లోకేష్ దుగ్గరుండి పర్యవేక్షించారు.

అండగా ప్రభుత్వం..

మురళీనాయక్ కుటుంబానికి కేంద్ర, రాష్ట్ర ప్రభుత్వాలు అన్ని విధాలుగా అండగా ఉంటాయని.. పవన్ కళ్యాణ్ భరోసా కల్పించారు. వారికి రాష్ట్ర ప్రభుత్వం తరఫున రూ.50 లక్షల ఆర్థిక సాయం ప్రకటించారు. ఆయన స్మారక చిహ్నం ఏర్పాటు చేయాలని నిర్ణయించారు. జిల్లా కేంద్రంలో కాంస్య విగ్రహం ఏర్పాటు చేయనున్నట్లు ప్రకటించారు. మురళీనాయక్‌ కుటుంబానికి ఐదెకరాలతో పాటు 300 గజాల ఇంటి స్థలం ఇవ్వనున్నట్లు వెల్లడించారు. కుటుంబంలో ఒకరికి ఉద్యోగం ఇవ్వాలని నిర్ణయించారు.

పవన్ సాయం..

వీరజవాన్ మురళీ నాయక్ కుటుంబానికి రూ.25 లక్షల వ్యక్తిగత సాయం చేస్తానని ఉప ముఖ్యమంత్రి పవన్‌ కళ్యాణ్ హామీ ఇచ్చారు. ఇంకా ఎలాంటి సాయం కావాలన్నా ఇచ్చేందుకు సిద్ధంగా ఉన్నామన్నారు. మురళీనాయక్‌ కుటుంబానికి భగవంతుడు ధైర్యం ఇవ్వాలని ఆకాంక్షించారు.