AP Rains : బంగాళాఖాతంలో అల్పపీడనం, ఈ నెల 12-14 మధ్య ఏపీలో వర్షాలు-వచ్చే 4 రోజుల వెదర్ రిపోర్ట్ ఇలా
AP Rains : రైతులను కంగారు పెట్టే హెచ్చరికలు చేసింది వాతావరణ శాఖ. రానున్న 36 గంటల్లో నైరుతి బంగాళాఖాతంలో అల్పపీడనం ఏర్పడే అవకాశం ఉందని వాతావరణ శాఖ తెలిపింది. అలాగే ద్రోణి ప్రభావంతో ఈ నెల 12 నుంచి 14 వరకు ఏపీలో మోస్తరు వర్షాలు కురిసే అవకాశం ఉందని తెలిపింది.
నైరుతి బంగాళాఖాతంలో ఆవర్తనం కొనసాగుతుందని, దీని ప్రభావంతో రానున్న 36 గంటల్లో అదే ప్రాంతంలో అల్పపీడనం ఏర్పడే అవకాశం ఉందని భారత వాతావరణ శాఖ తెలిపింది. తదుపరి రెండు రోజుల్లో అల్పపీడనం పశ్చిమ దిశగా నెమ్మదిగా తమిళనాడు/శ్రీలంక తీరాల వైపు కదులుతుందని పేర్కొంది. నైరుతి బంగాళాఖాతం మీదుగా తూర్పుమధ్య బంగాళాఖాతం వరకు ద్రోణి విస్తరించి ఉందని ఐఎండీ ప్రకటించింది. ద్రోణి ప్రభావంతో ఈనెల 12 నుంచి 14 వరకు భారీ నుంచి మోస్తరు వర్షాలు కురిసే అవకాశం ఉందని ఏపీ విపత్తుల నిర్వహణ సంస్థ మేనేజింగ్ డైరెక్టర్ రోణంకి కూర్మనాథ్ ఓ ప్రకటనలో తెలిపారు. భారీ వర్షాల నేపథ్యంలో వరి కోతలు, ఇతర వ్యవసాయ పనుల్లో రైతులు తగిన జాగ్రత్తలు తీసుకోవాలని సూచించారు. రాబోయే నాలుగు రోజులు అప్రమత్తంగా ఉండాలని రైతులు, ప్రజలకు సూచించారు.
ఏపీలో ఖరీఫ్ వరి కోతలు మొదలయ్యాయి. ముందుగా నాట్లు వేసిన ప్రాంతాల్లో కోతలు రావడంతో..రైతులు కోతలు చేపట్టారు. ఇప్పటికే చాలా ప్రాంతాల్లో కోతలు కోసి ధాన్యాన్ని ఆరబెడుతున్నారు. ఏపీ, తెలంగాణలో ధాన్యం కొనుగోళ్లు అంతంత మాత్రంగా మొదలుకావడంతో రైతులు ధాన్యాన్ని కల్లాల్లోనే ఆరబెడుతున్నారు. ఈ నేపథ్యంలో అల్పపీడనం హెచ్చరికలు రైతులను ఆందోళనకు గురిచేస్తున్నాయి.
రానున్న నాలుగు రోజుల వెదర్ రిపోర్ట్
నవంబర్ 11, సోమవారం :
కాకినాడ, కోనసీమ, నెల్లూరు, అన్నమయ్య, చిత్తూరు, తిరుపతి జిల్లాల్లోని కొన్ని ప్రాంతాల్లో తేలికపాటి వర్షాలు కురిసే అవకాశం ఉంది.
నవంబర్ 12, మంగళవారం :
నెల్లూరు, శ్రీ సత్యసాయి, వైఎస్ఆర్, అన్నమయ్య, చిత్తూరు, తిరుపతి జిల్లాల్లోని పలు ప్రాంతాల్లో మోస్తరు నుంచి భారీ వర్షాలు కురిసే అవకాశం ఉంది. విశాఖపట్నం, కాకినాడ, కోనసీమ, పశ్చిమ గోదావరి, కృష్ణా, బాపట్ల, ప్రకాశం జిల్లాల్లోని కొన్ని ప్రాంతాల్లో తేలికపాటి నుంచి మోస్తరు వర్షాలు కురిసే అవకాశం ఉంది. అన్నమయ్య, చిత్తూరు, తిరుపతి జిల్లాల్లోని కొన్ని ప్రాంతాల్లో తేలికపాటి వర్షాలు కురిసే అవకాశం ఉంది.
నవంబర్ 13 బుధవారం :
కాకినాడ, కోనసీమ, తూర్పుగోదావరి, పశ్చిమగోదావరి, ఏలూరు, కృష్ణా, గుంటూరు, బాపట్ల, ప్రకాశం, నెల్లూరు, కర్నూలు, నంద్యాల, వైఎస్ఆర్, తిరుపతి జిల్లాల్లోని కొన్ని ప్రాంతాల్లో మోస్తరు నుంచి భారీ వర్షాలు కురిసే అవకాశం ఉంది. ఎన్టీఆర్, పల్నాడు, అనంతపురం, శ్రీ సత్యసాయి, అన్నమయ్య, చిత్తూరు జిల్లాల్లోని కొన్ని ప్రాంతాల్లో తేలికపాటి నండి మోస్తరు వర్షాలు కురిసే అవకాశం ఉంది.
నవంబర్ 14 గురువారం :
తూర్పుగోదావరి, పశ్చిమగోదావరి, ఏలూరు, కృష్ణా, ఎన్టీఆర్, గుంటూరు, బాపట్ల, పల్నాడు, ప్రకాశం, నెల్లూరు, కర్నూలు, నంద్యాల, అనంతపురం, శ్రీ సత్యసాయి, తిరుపతి జిల్లాల్లోని కొన్ని ప్రాంతాల్లో మోస్తరు నుంచి భారీ వర్షాలు కురిసే అవకాశం ఉంది. కాకినాడ, కోనసీమ, వైఎస్ఆర్, అన్నమయ్య, చిత్తూరు జిల్లాల్లో కొన్ని ప్రాంతాల్లో తేలికపాటి నుంచి మోస్తరు వర్షాలు కురిసే అవకాశం ఉంది.
సంబంధిత కథనం