UCO Bank Fraud : బ్యాంకుకే కన్నం వేసిన గోల్డ్ అప్రైజర్….

UCO Bank Fraud కాకినాడ యూకో బ్యాంకులో భారీ మోసం వెలుగు చూసింది. బంగారు ఆభరణాలకు విలువ కట్టే గోల్డ్‌ అప్రైజర్‌ తాను పనిచేస్తున్న బ్యాంకును రూ.2.45 కోట్లకు టోకరా వేశాడు. ఎవరికి అనుమానం రాకుండా నకిలీ బంగారాన్ని తాకట్టు పెట్టేసి కోట్లలో కొట్టేశాడు.

కాకినాడ యూకో బ్యాంక్‌లో గోల్డ్‌ అప్రైజర్‌గా పని చేస్తున్న రామకృష్ణారావు పేటకు చెందిన తాడోజు శ్రీనివాసరావు 8.316 కిలోల నకిలీ బంగారు నగలను కుదువ పెట్టి రూ.2,45,84,000 మొత్తాన్ని రుణాలుగా తీసుకున్నాడు. గత 15 నెలలుగా 60 విడతల్లో 30 మంది పేర్ల మీద రుణాలు పొందినట్లు గుర్తించారు.

కాకినాడ UCO బ్యాంక్ లో నకిలీ బంగారం తనఖా పెట్టి 60 బంగారు రుణాలను పొందడంపై బ్యాంకు అధికారులు పోలీసులకు ఫిర్యాదు చేశారు. నకిలీ బంగారాన్ని తాకట్టు పెట్టి 2,45,84,000- రూపాయలు పొందడం ద్వారా బ్యాంకును మోసం చేసినట్లు అధికారులు పోలీసులకు ఫిర్యాదు చేశారు. నకిలీ బంగారాన్ని తాకట్టు పెట్టిన 31 మందిపై UCO బ్యాంక్ జోనల్ మేనేజర్ ఇచ్చిన ఫిర్యాదుపై కాకినాడ టూటౌన్ పోలీస్‌ స్టేషన్‌లో కేసు నమోదైంది.

బ్యాంకు అధికారులు ఫిర్యాదు చేయక ముందే గోల్డ్ అప్రైజర్ పరారవ్వడంతో అతడిని పట్టుకోవడానికి పోలీసులు 4 ప్రత్యేక బృందాలను ఏర్పాటు చేశారు. గోల్డ్ అప్రయిజర్ తాడోజు శ్రీనివాసరావు ఏడాదిన్నరగా UCO బ్యాంకు లో బంగారు నగలను తనఖా పెడుతున్నట్లు గుర్తించారు. మొత్తం 30 మంది పేరిట 60 సార్లు 8 కేజీ ల 316 గ్రాముల నకిలీ బంగారాన్ని తాకట్టు పెట్టి రుణాలను తీసుకొన్నట్లుగా గుర్తించినట్లు కాకినాడ పోలీసులు వెల్లడించారు. .

కేసులో ప్రధాన నిందితుడు తాడోజు శ్రీనివాసరావుతో పాటు అతనికి సహకరించిన అతని బంధువులు అయిన కాకినాడకు చెందిన కొత్తల రాంబాబు, కొండేపూడి కొండరాజు లను అరెస్టు చేశారు. నిందితులను రిమాండ్‌కు తరలించారు.