Chandrababu Oath Ceremony : 'చంద్రబాబు అనే నేను' - ఏపీ సీఎంగా ప్రమాణస్వీకారం పూర్తి-chandrababu took oath as ap chief minister ,ఆంధ్ర ప్రదేశ్ న్యూస్
తెలుగు న్యూస్  /  ఆంధ్ర ప్రదేశ్  /  Chandrababu Oath Ceremony : 'చంద్రబాబు అనే నేను' - ఏపీ సీఎంగా ప్రమాణస్వీకారం పూర్తి

Chandrababu Oath Ceremony : 'చంద్రబాబు అనే నేను' - ఏపీ సీఎంగా ప్రమాణస్వీకారం పూర్తి

Maheshwaram Mahendra Chary HT Telugu
Jun 12, 2024 11:40 AM IST

AP Chief Minister Chandrababu : ఆంధ్రప్రదేశ్ ముఖ్యమంత్రిగా చంద్రబాబు ప్రమాణస్వీకారం చేశారు. ఉదయం 11.30 నిమిషాల సమయంలో చంద్రబాబుతో గవర్నర్ ప్రమాణం చేయించారు. ఈ కార్యక్రమానికి ప్రధాని మోదీతో పాటు రజినీకాంత్, చిరంజీవి హాజరయ్యారు.

ఏపీ సీఎంగా చంద్రబాబు ప్రమాణస్వీకారం
ఏపీ సీఎంగా చంద్రబాబు ప్రమాణస్వీకారం

AP Chief Minister Chandrababu : ఆంధ్రప్రదేశ్ ముఖ్యమంత్రిగా చంద్రబాబు ప్రమాణస్వీకారం చేశారు. ఉదయం 11.30 తర్వాత చంద్రబాబుతో రాష్ట్ర గవర్నర్ అబ్దుల్ నజీర్ ప్రమాణం చేయించారు. ఈ కార్యక్రమానికి ప్రధానమంత్రిగా నరేంద్ర మోదీతో పాటు అమిషా హాజరయ్యారు. చంద్రబాబు ప్రమాణం తర్వాత… పవన్ కల్యాణ్ డిప్యూటీ సీఎంగా ప్రమాణం చేశారు. ఇప్పటి వరకు కలిపి నాలుగుసార్లు చంద్రబాబు ముఖ్యమంత్రి అయ్యారు.

ప్రమాణస్వీకార వేడుకకు విశిష్ట అతిథులుగా మెగాస్టార్ చిరంజీవి, తమిళ సూపర్ స్టార్ రజినీకాంత్ హాజరయ్యారు. చంద్రబాబుతో పాటు 24 మంది ఎమ్మెల్యేలు మంత్రులుగా ప్రమాణస్వీకారం చేశారు. 

టీడీపీకి 21….

టీడీపీకి 21, జ‌న‌సేన‌కు 3, బీజేపీ 1 మంత్రి ప‌దువుల కేటాయించారు. ఆయా పార్టీల నుంచి మంత్రులుగా ఎంపికైన వారు ప్ర‌మాణ స్వీకారం చేశారు.  టీడీపీ నుంచి నారా చంద్రబాబు నాయుడు (ముఖ్య‌మంత్రి ), నారా లోకేష్ (క‌మ్మ‌), కింజరాపు అచ్చెన్నాయుడు (బీసీ), కొల్లు రవీంద్ర (బీసీ), పి.నారాయణ (కాపు), వంగలపూడి అనిత (ఎస్సీ), నిమ్మల రామానాయుడు (క‌మ్మ‌), ఎన్ఎండీ ఫరూక్ (ముస్లీం), ఆనం రామనారాయణరెడ్డి (రెడ్డి), పయ్యావుల కేశవ్ (క‌మ్మ‌), అనగాని సత్యప్రసాద్ (బీసీ), కొలుసు పార్థసారధి (బీసీ), డోలా బాలవీరాంజనేయస్వామి (ఎస్సీ), గొట్టిపాటి రవి (క‌మ్మ‌), గుమ్మడి సంధ్యారాణి (ఎస్టీ), బీసీ జనార్థన్ రెడ్డి (రెడ్డి), టీజీ భరత్ (వైశ్య‌), ఎస్.సవిత (బీసీ), వాసంశెట్టి సుభాష్ (బీసీ), కొండపల్లి శ్రీనివాస్ (బీసీ), మండిపల్లి రామ్ ప్రసాద్ రెడ్డి (రెడ్డి) మంత్రులుగా ప్ర‌మాణ స్వీకారం చేశారు.

టీడీపీలో సామాజిక కూర్పు చూస్తే 21 మందిలో ఐదుగురు క‌మ్మ‌, ఒక‌రు కాపు, ఒక‌రు వైశ్య‌, ఒక‌రు ఎస్టీ, ఒక‌రు మైనార్టీ, ఇద్ద‌రు ఎస్సీ, ముగ్గురు రెడ్డి, ఏడుగురు బీసీ సామాజిక‌వర్గాల‌కు చెందిన వారికి మంత్రులుగా అవకాశం దక్కింది .

చంద్రబాబు రాజకీయం ప్రస్థానం,...

  • చిత్తూరు జిల్లా నారావారిపల్లిలో ఓ సాధారణ రైతు ఇంట జన్మించారు. డిగ్రీ చదివే రోజుల్లోనే సామాజిక సేవా కార్యక్రమాల్లో చురుకుగా పాల్గొనేవారు. పీజీ చేసే రోజుల్లోనే రాజకీయంగా క్రియాశీలక అడుగులు వేశారు.
  • చంద్రబాబు మొదటగా యూత్ కాంగ్రెస్‌లో చేరారు. 1978 ఎన్నికల్లో ఇందిరా కాంగ్రెస్ పార్టీ నుంచి ఎమ్మెల్యే అభ్యర్థిగా బరిలో నిలిచారు చంద్రబాబు. జనతా పార్టీ నుంచి బలమైన అభ్యర్థిగా ఉన్న పట్టాభి చౌదరిని ఓడించి 26 ఏళ్ల ప్రాయంలోనే ఎమ్మెల్యేగా గెలిచి చంద్రబాబు చరిత్ర సృష్టించారు.
  • కాంగ్రెస్ ప్రభుత్వంలో మంత్రిగా పని చేశారు. NTR కుమార్తె భువనేశ్వరిని చంద్రబాబు పెళ్లి చేసుకున్నారు.
  • తెలుగువారి ఆత్మగౌరవం నినాదంతో 1982లో ఎన్టీఆర్ తెలుగు దేశం పార్టీని స్థాపించారు. ఈ సమయంలో చంద్రబాబు కాంగ్రెస్ లోనే కొనసాగారు.
  • 1983 అసెంబ్లీ ఎన్నికల్లో కాంగ్రెస్ అభ్యర్థిగా మరోసారి చంద్రబాబు పోటీచేసి ఓడిపోయారు. ఆ తరువాత ఏడాదిలోనే ఆయన తెలుగుదేశం పార్టీలో చేరారు. పార్టీలో అత్యంత క్రియాశీలకంగా మారారు.
  • తెలుగుదేశం పార్టీ ఎదుర్కొన్న అనేక రాజకీయ సంక్షోభాలను తిప్పికొట్టడంలో చంద్రబాబు తన మార్క్ ను చూపించారు.
  • 1995లో మొదటిసారిగా ముఖ్యమంత్రిగా చంద్రబాబు బాధ్యతలు చేపట్టారు. పరిపాలనలో సరికొత్త సంస్కరణలకు శ్రీకారం చుట్టారు. ప్రభుత్వ కార్యాలయాలకే పరిమితమైన ఉద్యోగులను ప్రజల వద్దకు పాలన పేరుతో క్షేత్రస్థాయిలోకి తీసుకెళ్లారు. జన్మభూమి, శ్రమధానం వంటి వినూత్న నిర్ణయాలతో పాలనలోనూ ప్రత్యేక గుర్తింపు సాధించారు.
  • 1996లో యునైటెడ్ ఫ్రంట్‌ను ఏర్పాటు చేయడంలో చంద్రబాబు కీలకంగా పనిచేశారు. ఈ సమయంలో కేంద్రంలో టీడీపీ కీలకంగా పని చేసింది. దేవెగౌడను ప్రధాని కావడంలో చంద్రబాబు కీలక పాత్ర పోషించారు. ఆ తర్వాత ఎన్డీయేలో చేరారు. ఎన్డీయే కన్వీనర్ గా కూడా చంద్రబాబు పని చేశారు.
  • 1995 నుంచి 2004వ సంవత్సరం వరకు 9 సంవత్సరముల పాటు ముఖ్యమంత్రిగా చంద్రబాబు కొనసాగారు. అత్యధిక కాలం ఉమ్మడి ఆంధ్ర ప్రదేశ్ ముఖ్యమంత్రిగా పనిచేసిన రాజకీయ నాయకునిగా చరిత్ర సృష్టించారు.
  • 2004లో పార్టీ ఓటమితో చంద్రబాబు ఎన్డీయే కూటమి నుంచి బయటికి వచ్చారు.
  • 2004 నుంచి 2014 వరకు పదేళ్ల పాటు ప్రతిపక్షంలో ఉన్నారు . 2009 తర్వాత రాష్ట్ర విభజన అంశం తెరపైకి రావటంతో తెలంగాణలో తీవ్రమైన ఇబ్బందులు ఎదుర్కొవాల్సి వచ్చింది.
  • 2014లో రాష్ట్ర విభజన జరగటంతో నవ్యాంధ్రలో జరిగిన ఎన్నికల్లో చంద్రబాబు మరోసారి విజయం సాధించారు. ఈ ఎన్నికల ముందు ప్రజాసమస్యలు తెలుసుకునేందుకు 208 రోజులు, 2817 కిలోమీటర్ల మేర 'వస్తున్నా మీ కోసం' పాదయాత్రతో ప్రజల చెంతకు వెళ్లారు.
  • 2014లో బీజేపీతో కలిసి ఏపీలో పోటీ చేశారు. మరోవైపు ఎన్డీయే కూటమిలో కూడా భాగస్వామ్యం అయ్యారు.
  • ప్రత్యేక హోదాతో పాటు విభజన సమస్యలపై బీజేపీని విభేదిస్తూ 2018 మార్చిలో ఎన్డీయే నుంచి వైదొలిగారు. మోదీకి వ్యతిరేకంగా పోరాటం చేశారు. ఓ దశలో జాతీయస్థాయిలో కాంగ్రెస్ కు దగ్గర అయ్యారు.
  • 2019 ఎన్నికల్లో ఒంటరిగా పోటీ చేసిన టీడీపీ ఘోరంగా ఓటమి చెందింది. కేవలం 23 స్థానాలకే పరిమితమైంది. ఈ ఎన్నికల్లో వైసీపీ విజయం సాధించటంతో జగన్ సీఎం అయ్యారు. మరోసారి చంద్రబాబు ప్రతిపక్ష నాయకుడిగా పని చేశారు.
  • 2024 ఎన్నికల వేళ మళ్లీ బీజేపీతో జట్టు కట్టారు. ఎన్డీయేలో చేరటమే కాకుండా... ఈ ఎన్నికల్లో భారీ విజయాన్ని చంద్రబాబు సొంతం చేసుకున్నారు. కేంద్రంలో మరోసారి తెలుగుదేశం పార్టీ క్రియాశీలకంగా మారింది. సొంతంగా 16 ఎంపీ స్థానాలు సాధించి… ఎన్డీయే కూటమిలో రెండో అతిపెద్ద పార్టీగా అవతరించింది.
  • జూన్ 12, 2024వ తేదీన నవ్యాంధ్ర ముఖ్యమంత్రిగా చంద్రబాబు ప్రమాణస్వీకారం చేశారు.

WhatsApp channel