NMMS Scholarship : ప్రభుత్వ పాఠశాల విద్యార్థులకు ఎన్ఎంఎంఎస్ స్కాలర్ షిప్ లు, దరఖాస్తు గ‌డువు ఈ నెల 15 వరకు పొడిగింపు
NMMS Scholarship : కేంద్ర ప్రభుత్వ ఎన్ఎంఎంఎస్ స్కాలర్ షిప్ దరఖాస్తు గడువును నవంబర్ 15 వరకు పొడిగించారు. ఎన్ఎంఎంఎస్ పరీక్షలో ఉత్తీర్ణత సాధించిన విద్యార్థులకు నాలుగేళ్ల పాటు ఏడాదికి రూ.12 వేలు చొప్పున మొత్తం రూ.48 వేలు స్కాలర్ షిప్ అందిస్తారు.
ప్రభుత్వ పాఠ‌శాల‌ల్లో చ‌దివే విద్యార్థుల‌ను ప్రోత్సహించేందుకు కేంద్ర ప్రభుత్వం తీసుకొచ్చిన నేషనల్ మీన్స్ కమ్ మెరిట్ (ఎన్ఎంఎంఎస్) స్కాలర్ షిప్స్ పరీక్ష (2024-25) దరఖాస్తు చేసుకునేందుకు గడువును నవంబర్ 15 వరకు పొడిగించారు. ఈ మేర‌కు కేంద్ర విద్యా మంత్రిత్వ శాఖ ఆదేశాలు జారీ చేసింది. ఎన్ఎంఎంఎస్ పరీక్షలో ఉత్తీర్ణత సాధించిన విద్యార్థులకు నాలుగేళ్ల పాటు ఏడాదికి రూ.12 వేలు చొప్పున మొత్తం రూ.48 వేలు స్కాలర్ షిప్ అందిస్తారు.
2024 డిసెంబ‌ర్ 8న జరుగనున్న నేషనల్ మీన్స్ కమ్ మెరిట్ స్కాలర్ షిప్స్ (ఎన్ఎంఎంఎస్) పరీక్ష కోసం దరఖాస్తు చేసుకొనుటకు ఆన్‌లైన్‌ అప్లికేషన్‌ను ప్రభుత్వ పరీక్షల కార్యాలయ వెబ్‌సైట్ డైరెక్ట లింక్ https://scholarships.gov.in/studentFAQs లో 2024 ఆగ‌స్టు 5 నుంచి అందుబాటులో ఉంచిన‌ట్లు తెలిపింది. ఈ పరీక్షకు దరఖాస్తు చేసుకునేందుకు చివరి తేదీని తొలిత సెప్టెంబ‌ర్ 17గా నిర్ణ‌యించ‌గా, మళ్లీ గడువును 2024 అక్టోబ‌ర్ 3 వరకు పొడిగించారు. తాజాగా నవంబర్ 15 వరకు గడువును పొడించారు. ప్రింటెడ్ నామినల్ రోల్, ఒరిజినల్ ఎస్‌బీఐ కలెక్ట్ రశీదును సంబంధిత జిల్లా విద్యా శాఖాధికారి వారి కార్యాలయంలో సమర్పించుటకు చివరి తేదీ 2024 నవంబర్ 30గా నిర్ణయించారు.
ఆంధ్రప్రదేశ్ రాష్ట్రంలోని ప్రభుత్వ, జిల్లా పరిషత్, మునిసిపల్, ఎయిడెడ్, మండల పరిషత్ ప్రాథమికోన్నత పాఠశాలలు, వ‌సతి సౌకర్యం లేని ఆంధ్రప్రదేశ్ ఆదర్శ పాఠశాలలలో 8వ తరగతి చదువుతూ కుటుంబ సంవత్సర ఆదాయం రూ. 3,50,000 లోపు ఉన్న విద్యార్థులు అలాగే ఏడో త‌ర‌గ‌తిలో 55 శాతం మార్కులు వ‌చ్చిన విద్యార్థులందరూ ఈ పరీక్ష రాసేందుకు అర్హులు. ఎస్సీ, ఎస్టీ విద్యార్థులకు 5 శాతం మార్కులు స‌డ‌లింపు ఉంటుంది. నమోదు చేసే సమయంలో విద్యార్థి ఆధార్ కార్డ్‌లో ఉన్న విధంగానే విద్యార్థి పేరు నమోదు చేయాలి.
దరఖాస్తు చేసుకొనుటకు ఎటువంటి ధృవపత్రాలు అవసరం లేదు. అయితే పరీక్ష రాసే సమ‌యానికి అన్ని ధృవపత్రాలు సిద్ధం చేసుకోవాలి. పరీక్ష రుసుము ఓసీ, బీసీ విద్యార్దులకు రూ.100, ఎస్సీ, ఎస్టీ విద్యార్థులకు రూ. 50గా నిర్ణయించారు. పూర్తి వివరముల కోసం ప్రభుత్వ పరీక్షల సంచాలకుల కార్యాలయపు వెబ్‌సైటు www.bse.ap.gov.in నందు గానీ లేదా సంబంధిత జిల్లా విద్యాశాఖాధికారి కార్యాలయంలో గాని తెలుసుకోవాలి.
ప్రభుత్వ పాఠ‌శాల‌ల్లో చ‌దివే విద్యార్థుల‌ను ప్రోత్సహించేందుకు కేంద్ర ప్రభుత్వం ఉప‌కార వేత‌నాలు అందిస్తోంది. ఎన్ఎంఎంఎస్ పరీక్షలో ఉత్తీర్ణత సాధించిన విద్యార్థులకు నాలుగేళ్ల పాటు ఏడాదికి రూ.12 వేలు చొప్పున మొత్తం రూ.48 వేలు స్కాలర్ షిప్ అందిస్తారు. 7, 8 తరగతి పాఠ్యాంశాల ఆధారంగా పరీక్ష నిర్వహిస్తారు. ప్రశ్నప‌త్రం తెలుగు, ఇంగ్లీష్ మాధ్యమాల్లో రెండు విభాగాల్లో పరీక్ష ఉంటుంది. మొద‌టి విభాగంలో మానసిక సామర్థ్య పరీక్ష, రెండో పేప‌ర్ విష‌య సామ‌ర్థ్యంపై బహుళ ఐచ్చిక ప్రశ్నలు (మ‌ల్టిపుల్ ఛాయిస్ క్వశ్చన్స్‌) అడుగుతారు.
ఒక్కో విభాగానికి 90 మార్కులు ఉంటాయి. మొత్తం 180 మార్కుల‌తో ప్రశ్నప‌త్రం ఉంటుంది. ఈ పరీక్ష రాసేందుకు విద్యార్థులకు మూడు గంట‌ల స‌మ‌యం ఉంటుంది. అర్హత సాధించిన వారికి నాలుగేళ్ల పాటు (9,10 త‌ర‌గ‌తులు, రెండేళ్ల ఇంట‌ర్మీడియ‌ట్) ప్రతి ఏటా రూ.12 వేలు స్కాలర్ షిప్ అందిస్తారు. అయితే తొమ్మిదో త‌ర‌గ‌తిలో 55 శాతం మార్కులు, ప‌దో త‌ర‌గ‌తిలో 60 శాతం మార్కులు, ఇంట‌ర్మీడియ‌ట్ మొద‌టి సంవ‌త్సరంలో 55 శాతం శాతం మార్కులు సాధిస్తేనే స్కాలర్ షిప్ అందుతుంది. నవంబర్ 1 నాటికి 86,323 కొత్త అప్లికేషన్లు, 1,62,175 రెన్యువల్ అప్లికేషన్లు అందినట్లు కేంద్ర విద్యా శాఖ తెలిపింది.
రిపోర్టింగ్ : జ‌గ‌దీశ్వర‌రావు జ‌ర‌జాపు, హిందుస్తాన్ టైమ్స్ తెలుగు
