సీఎం చంద్రబాబుకు బిల్ గేట్స్ ధన్యవాదాలు, గేట్స్ ఫౌండేషన్ ఒప్పందాన్ని ప్రస్తావిస్తూ లేఖ

ఏపీ సీఎం చంద్రబాబుకు మైక్రోసాఫ్ట్ సహ వ్యవస్థాపకుడు బిల్ గేట్స్ లేఖ రాశారు. దిల్లీలో గేట్స్‌ ఫౌండేషన్‌తో జరిగిన ఒప్పంద సమావేశాన్ని ప్రస్తావిస్తూ బిల్ గేట్స్ లేఖ రాశారు. ఈ ఒప్పందం కోసం సీఎం చంద్రబాబు చూపిన చొరవను అభినందించారు.

సీఎం చంద్రబాబుకు ధన్యవాదాలు

సీఎం చంద్రబాబు తన బృందంతో దిల్లీకి వచ్చినందుకు ధన్యవాదాలు చెప్పారు. మంచి వాతావరణంలో చంద్రబాబుతో సంప్రదింపులు జరిపామన్నారు. వ్యవసాయ ఉత్పత్తుల అభివృద్ధికి, పేదల విద్య, ఆరోగ్యంపై ఒప్పందం చేసుకోవడాన్ని అభినందిస్తున్నానని బిల్‌గేట్స్‌ తన లేఖలో ప్రస్తావించారు.

ఏఐ, సాంకేతిక పరిజ్ఞానంపై చర్చలు

సీఎం చంద్రబాబు ఇటీవల దిల్లీలో బిల్‌గేట్స్‌తో సమావేశమయ్యారు. ఏపీ అభివృద్ధి, సంక్షేమానికి గేట్స్‌ ఫౌండేషన్‌ సహకారంపై చర్చించారు. ఆరోగ్య సంరక్షణ, విద్య, వ్యవసాయం, ఉపాధి కల్పన వంటి కీలక రంగాల్లో ఏఐ, అధునాతన సాంకేతిక పరిజ్ఞానం వినియోగంపై చర్చించినట్లు అప్పట్లో సీఎం చంద్రబాబు ఎక్స్‌ వేదికగా తెలిపారు.

బిల్ గేట్స్ లేఖలో ఇంకా ఏమన్నారంటే

• ఆరోగ్యరంగాన్ని పటిష్ట పరచడం, హెల్త్ రికార్డుల డిజిటలైజేషన్, ఏఐ అసిస్టెడ్ క్లినికల్ డిసిషన్ మేకింగ్, మెడ్‌టెక్ మాన్యుఫాక్చరింగ్ హబ్‌గా ఏపీని తీర్చిదిద్దడం, వ్యవసాయంలో నాణ్యమైన విత్తనాల తయారీ, సాయిల్ హెల్త్ మోనిటరింగ్, తల్లీబిడ్డల ఆరోగ్యానికి మైక్రోన్యూట్రీయంట్లు అందించే అంశాలపై ఇరువురం చర్చించాం
• పాలనలో టెక్నాలజీ, ఇన్నోవేషన్‌ను బలోపేతం చేసేందుకు, మెరుగైన సేవలు అందించేందుకు మీరు చూపిన ఆసక్తి మీ చిత్తశుద్ధికి, విజన్‌కు నిదర్శనం. ఆశించే ఏఐ డ్రివెన్ డిసిషన్ మేకింగ్, రియల్ టైమ్ డేటా సిస్టమ్, హ్యూమన్ క్యాపిటల్ డెవలప్మెంట్ వంటివి మీ నాయకత్వ ప్రతిభను ప్రస్ఫుటం చేస్తున్నాయి
• గేట్స్ ఫౌండేషన్ సహకారంతో... ప్రభుత్వ సేవల్లో ఉత్తమ ఫలితాలు రాబట్టేందుకు మీరు చేస్తున్న కృషి ఆంధ్రప్రదేశ్‌కే కాదు భారత్ సహా, అల్పాదాయ దేశాలకు ఉపయోగపడుతుంది
• ఈసారి భారతదేశ పర్యటనలో ఆంధ్రప్రదేశ్‌కు వచ్చేనాటికి... మీ నాయకత్వం-మన భాగస్వామ్యంలో అనుకున్న లక్ష్యాలను చేరుకోవడంలో అద్భుతమైన పురోగతి సాధించగలమని చెప్పగలను
• గేట్స్ ఫౌండేషన్-ఏపీ ప్రభుత్వ భాగస్వామ్యం మున్ముందు కొనసాగాలని, కలిసికట్టుగా పనిచేసి రాష్ట్ర భవిష్యత్‌పై సానుకూల ప్రభావాన్ని చూపాలని ఆశిస్తున్నాను.