AP Govt : కాంట్రాక్ట్ ఉద్యోగుల‌కు మినిమం టైమ్ స్కేల్‌.. ఆర్థిక శాఖ అనుమ‌తి త‌ప‌నిస‌రి.. ఏపీ ప్ర‌భుత్వం ఉత్త‌ర్వులు

కాంట్రాక్ట్ ఉద్యోగుల‌కు మినిమం టైమ్ స్కేల్ అమ‌లుకు సంబంధించి.. రాష్ట్ర ప్రిన్సిప‌ల్ సెక్ర‌ట‌రీ పియూష్ కుమార్ జీవోఎంఎస్ నెంబ‌ర్ 2ను ద్వారా ఉత్త‌ర్వులు జారీ చేశారు. ఆర్థిక శాఖ అనుమ‌తి ఉన్న పోస్టుల‌కు మాత్ర‌మే.. మినిమం టైమ్ స్కేల్ అమ‌లు చేయ‌ల‌ని ప్ర‌భుత్వం నిర్ణ‌యిచింది. అయితే 2018లో ఏర్పాటు చేసిన 11వ వేత‌న స‌వ‌ర‌ణ క‌మిష‌న్ సిఫార్సుల‌పై 2021లో నిర్ణ‌యం తీసుకున్నారు.

అందులో భాగంగానే కాంట్రాక్ట్ ఉద్యోగులకు జ‌న‌వ‌రి 2022 నుంచి మినిమం టైమ్ స్కేల్ అమ‌లు చేయాల‌ని నిర్ణ‌యం తీసుకున్నారు. అయితే ఈ నిర్ణ‌యం కాంట్రాక్ట్ ఉద్యోగులంద‌రికీ అమ‌లు కాలేదు. నియామకం స‌మ‌యంలో నిబంధ‌న‌లు ప‌ట్టించుకోలేదు. ఫలితంగా చాలా మందికి మినిమం టైమ్ స్కేల్ వ‌ర్తించ‌లేదు.

అప్ప‌టి నుండి కాంట్రాక్ట్ ఉద్యోగులు మినిమం టైమ్ స్కేల్ అమ‌లు చేయాల‌ని డిమాండ్ చేస్తున్నారు. పోరాటాలు చేస్తూ వ‌స్తున్నారు. ప్ర‌భుత్వానికి కూడా ప‌లు సంద‌ర్భాల్లో విజ్ఞ‌ప్తులు చేసుకున్నారు. కాంట్రాక్ట్ ఉద్యోగుల విజ్ఞ‌ప్తుల‌ను ప‌రిశీలించిన రాష్ట్ర ప్ర‌భుత్వం.. జీవోఎంఎస్ నెంబ‌ర్ 2 పేరుతో ఉత్తర్వులను విడుద‌ల చేసింది.

ప్రభుత్వ శాఖల్లో కాంట్రాక్ట్ ఉద్యోగులకు సంబంధించి తాజా మార్గదర్శకాలను ప్రభుత్వం జారీ చేసింది. ఈ ఆదేశాలు 2025 జనవరి 6న అమల్లోకి వచ్చాయి. ఈ ఉత్తర్వుల్లో కాంట్రాక్ట్ ఉద్యోగుల వేతనాలు, మాతృత్వ సెలవులు, ఎక్స్‌గ్రేషియా వంటి అంశాల గురించి వివరించారు. ఈ ఆదేశాల్లో ముఖ్యాంశాలు ఇలా ఉన్నాయి.

ముఖ్యాంశాలు:

1.మినిమం టైమ్ స్కేల్ (ఎంటీఎస్‌): ప్రభుత్వ శాఖలు, యూనివర్శిటీలు, ఖాళీగా ఉన్న పోస్టుల్లో నియమితులైన కాంట్రాక్ట్ ఉద్యోగులకు మాత్రమే మినిమం టైమ్ స్కేల్ వర్తిస్తుంది. ఎంటీఎస్‌ ద్వారా నెలవారీ చెల్లింపులు కలిపి ఒకే రూపంలో అందిస్తారు. ఈ పేమెంట్‌లో అదనపు అలవెన్స్‌లు, వార్షిక పెంపులు ఉండవు.

2.మాతృత్వ సెలవులు: వివాహిత మహిళా ఉద్యోగులకు రెండు ప్రసవాలకు 180 రోజుల చెల్లింపు మాతృత్వ సెలవు కల్పిస్తారు. ఈ కాలంలో ఈపీఎఫ్‌, ఈఎస్ఐ వంటి అన్ని ప్రయోజనాలు అందుబాటులో ఉంటాయి.

3.ఎక్స్‌గ్రేషియా: ప్ర‌మాదాల్లో మృతి చెందిన కాంట్రాక్ట్ ఉద్యోగుల కుటుంబాలకు రూ.5 లక్షల ఎక్స్‌గ్రేషియా, సహజ మృతికి రూ.2 లక్షల ఎక్స్‌గ్రేషియా అందిస్తారు. దీనికి సంబంధించి మృతి చెందిన మూడు నెలలలోగా దరఖాస్తు చేయాలి.

4.నియామకాలపై నియంత్రణలు: కొత్త కాంట్రాక్ట్ నియామకాలకు ప్రభుత్వ అనుమతి అవసరం. నియమ నిబంధనలు పాటించకుండా నియామకాలు చేస్తే ఆడిట్‌లో వారి వేతనాల బిల్లులు తిరస్కరిస్తారు.

5. మినహాయింపులు: ప్రాజెక్టు/యోజన ఆధారిత ఉద్యోగులు, అవుట్‌సోర్సింగ్ ఉద్యోగులు ఈ ఉత్తర్వుల పరిధిలోకి రారు.

నెగటివ్ అంశాలు:

1. పరిమిత వర్తింపు: ప్రాజెక్ట్-ఆధారిత, అవుట్‌సోర్సింగ్ ఉద్యోగులు ఈ ఉత్తర్వుల ద్వారా ప్రయోజనాలను పొందలేరు.

2. వృద్ధి లేమి: కాంట్రాక్ట్ ఉద్యోగులకు వార్షిక పెరుగుదలలు లేకపోవడం ఆర్థిక ప్రగతిని నెమ్మదింపజేస్తుంది.

3. కఠిన నియామకాల నిబంధనలు: కొత్త నియామకాలపై కఠినమైన నియమాలు ఉండడం ఉద్యోగావకాశాలపై ప్రభావం చూపిస్తుంది.

ఏపీ ప్రభుత్వం కాంట్రాక్ట్ ఉద్యోగుల కోసం తీసుకొచ్చిన ఈ ఉత్త‌ర్వుల వ‌ల్ల‌ పాజిటివ్ అంశాలు కొందరికే వర్తిస్తాయి. మరికొందరు ఉద్యోగులు ఈ ప్రయోజనాలను అందుకోలేని పరిస్థితి ఉంది. ఈ ఉత్తర్వులపై అన్ని ఉద్యోగ వర్గాల అవసరాలను పరిగణనలోకి తీసుకుని.. మరింత సమగ్ర విధానాన్ని తీసుకురావాల్సిన అవసరం ఉందని కాంట్రాక్ట్ ఉద్యోగ సంఘాలు డిమాండ్ చేస్తున్నాయి.

(రిపోర్టింగ్- జ‌గ‌దీశ్వ‌ర‌రావు జ‌ర‌జాపు, హిందుస్తాన్ టైమ్స్ తెలుగు)