CID Lookout Notice: విజయసాయిరెడ్డిపై ఏపీ సీఐడీ లుకౌట్ నోటీసులు, దుష్ప్రచారమంటోన్న వైసీపీ ఎంపీ…

CID Lookout Notice: వైసీపీ ప్రభుత్వ హయంలో బెదిరించి బలవంతంగా కాకినాడ సీ పోర్ట్‌ షేర్లను స్వాధీనం చేసుకున్నారనే ఫిర్యాదుపై వైసీపీ ఎంపీ సాయిరెడ్డితో పాటు పలువురిపై ఏపీసీఐడీ కేసులు నమోదు చేసింది. సీఎంగా జగన్మోహన్ రెడ్డి ఉన్న సమయంలో కాకినాడ సీ పోర్ట్స్ లిమిటెడ్ (కేసీపీఎల్), కాకినాడ స్పెషల్ ఎకనామిక్ జోన్లలో మెజారిటీ వాటాలను ఒరిజినల్ ప్రమోటర్ల నుంచి బలవంతంగా కొనుగోలు చేశారన్న ఆరోపణలపై వైఎస్సార్ కాంగ్రెస్ పార్టీ ప్రధాన కార్యదర్శి, రాజ్యసభ సభ్యుడు వి.విజయసాయిరెడ్డిపై ఆంధ్రప్రదేశ్ పోలీసు నేర దర్యాప్తు విభాగం (సీఐడీ) గురువారం లుకౌట్ సర్క్యులర్ (ఎల్ఓసీ) జారీ చేసింది.

సాయిరెడ్డితో పాటు మరో వైసీపీ ఎంపీ వైవీ సుబ్బారెడ్డి కుమారుడు వై.విక్రాంత్ రెడ్డి, సాయిరెడ్డి సమీప బంధువు అయిన అరబిందో ఫార్మా ప్రమోటర్ పెనకా శరత్చంద్రారెడ్డిలపై కూడా లుకౌట్ సర్క్యులర్లు జారీ అయ్యాయి.

కాకినాడ సీ పోర్ట్స్ లిమిటెడ్, కాకినాడ సెజ్ లలో రూ.3,600 కోట్ల విలువైన షేర్లను కాకినాడ ఇన్ ఫ్రాస్ట్రక్చర్ హోల్డింగ్స్ ప్రైవేట్ లిమిటెడ్ (కేఐహెచ్ పీఎల్) అధినేత కర్నాటి వెంకటేశ్వరరావు (కేవీ రావు) నుంచి బలవంతంగా కొనుగోలు చేశారన్న ఆరోపణలపై దర్యాప్తును తప్పించుకునేందుకు నిందితులు విదేశాలకు పారిపోకుండా ఉండేందుకు లుకౌట్ సర్క్యులర్లు జారీ చేసినట్లు సీఐడీ సీనియర్ అధికారి ఒకరు తెలిపారు.

కాకినాడ సీపోర్ట్స్ లిమిటెడ్ (కేసీపీఎల్)లో 41.12 శాతం వాటాను కేఐహెచ్పీఎల్ నుంచి ఆరో ఇన్ఫ్రా ప్రైవేట్ లిమిటెడ్ (గతంలో అరబిందో రియాలిటీ అండ్ ఇన్ఫ్రాస్ట్రక్చర్ ప్రైవేట్ లిమిటెడ్)కు బలవంతంగా బదలాయించారనే ఆరోపణలపై సాయిరెడ్డి తదితరులపై సీఐడీ బుధవారం కేసు నమోదు చేసింది. ఈ మేరకు ఆయన సోమవారం సీఐడీ చీఫ్ రవిశంకర్ అయ్యన్నార్ ను కలిసి ఫిర్యాదు చేశారు.

ఇన్ ఫ్రా పేరిట షేర్లను బదలాయించాలని సాయిరెడ్డి, ఇతరులు తనను బలవంతం చేశారని ఎఫ్ ఐఆర్ లో పేర్కొన్నారు. తనపై, తన కుటుంబంపై తప్పుడు కేసులు పెడతామని, అరెస్టు చేస్తామని, వ్యాపారాలను మూసివేస్తామని, కాకినాడ సీ పోర్ట్స్ లిమిటెడ్ లో రూ.2,500 కోట్ల విలువైన షేర్లను రూ.494 కోట్లకు, కాకినాడ సెజ్ లో రూ.1,109 కోట్ల విలువైన షేర్లను అరబిందో గ్రూప్ కు రూ.12 కోట్లకు బదలాయిస్తామని నిందితులు బెదిరించారని తెలిపారు.

నిందితులపై క్రిమినల్ బెదిరింపు (506), దోపిడీ (384), మోసం (420), ప్రేరేపణ (109), ఫోర్జరీ (467), నేరపూరిత కుట్ర (120 బి), వ్యవస్థీకృత నేరం (బిఎన్ఎస్ 111) సహా వివిధ సెక్షన్ల కింద సిఐడి కేసు నమోదు చేసింది.

ఈ కేసుతో తమకు ఎలాంటి సంబంధం లేదని అరబిందో గ్రూప్ ఫ్లాగ్ షిప్ కంపెనీ అరబిందో ఫార్మా ఖండించింది. అరబిందో ఫార్మా లిమిటెడ్ లేదా దాని అనుబంధ సంస్థలకు ఆరో ఇన్ఫ్రా ప్రైవేట్ లిమిటెడ్తో సహా కాకినాడ సీపోర్ట్స్ లిమిటెడ్, కాకినాడ సెజ్ లిమిటెడ్ యాజమాన్యం లేదా కార్యకలాపాలతో ఎటువంటి సంబంధం లేదని కంపెనీ ప్రతినిధి బుధవారం స్టాక్ ఎక్స్ఛేంజ్‌కు సమర్పించిన ఫైలింగ్‌లో స్పష్టం చేశారు.

సాయిరెడ్డి తదితరులపై పెట్టిన కేసులను వైయస్సార్ కాంగ్రెసు పార్టీ తీవ్రంగా ఖండించింది. రాష్ట్రంలో టీడీపీ నేతృత్వంలోని సంకీర్ణ ప్రభుత్వ వైఫల్యాల నుంచి ప్రజల దృష్టి మరల్చేందుకే కాకినాడ పోర్టు అంశాన్ని లేవనెత్తుతున్నారని వైఎస్సార్ సీపీ సీనియర్ నేత, మాజీ మంత్రి కాకాణి గోవర్ధన్ రెడ్డి అన్నారు.

రాజకీయ ప్రత్యర్థులను సరిదిద్దుకోవడానికి చంద్రబాబు ప్రభుత్వం పాత కేసులను తవ్వుతోందని, అందుకు కాకినాడ పోర్టు ఉదంతమే ఉదాహరణ అన్నారు. జగన్ తండ్రి వైఎస్ రాజశేఖర్ రెడ్డి హయాంలో ఈ పోర్టును అభివృద్ధి చేశారు. టీడీపీ హయాంలోనే కేవీ రావు దీన్ని స్వాధీనం చేసుకున్నారని గుర్తు చేశారు.

ఒకవేళ రావు వాటాను టేకోవర్ చేస్తే ఆరో ఇన్ఫ్రా కేవలం 41 శాతం వాటా మాత్రమే కాకుండా మొత్తం వాటాను సొంతం చేసుకునేదని వైసీపీ నేత అన్నారు. అరబిందో గ్రూపును సీఐడీ కేసులో ఇరికించేందుకు సంకీర్ణ ప్రభుత్వం కుట్ర చేస్తోందన్నారు.

చంద్రబాబు, కేవీరావులపై పరువు నష్టం దావా వేస్తున్నా

లుకౌట్‌ నోటీసులు జారీ చేయడంపై వైసీపీ ఎంపీ సాయిరెడ్డి స్పందించారు. కేవీరావుతో చంద్రబాబు తప్పుడు కేసు పెట్టించాడని ఆరోపించారు. కేవీ రావు అనే వ్యక్తి చంద్రబాబు బినామీ అని సాయిరెడ్డి ఆరోపించారు. కేవీరావుకు పోర్టును పూర్తిగా కట్టబెట్టడమే చంద్రబాబు లక్ష్యమన్నారు. కక్ష పూరితంగానే నాపై లుకౌట్‌ నోటీసులు జారీ చేశారన్నారు. సీబీఐ అనుమతి లేకుండా నేను దేశం దాటనని బాబుకి తెలుసని, అయినా తన పరువుకి భంగం కలిగించాలనే లుకౌట్‌ నోటీసులిచ్చారన్నారు.

పవన్‌కళ్యాణ్‌ను సముదాయించుకునేందుకు పీడీఎస్‌ బియ్యం అక్రమ రవాణా విషయాన్ని చంద్రబాబు పక్కదారి పట్టిస్తున్నాడని, కేవీ రావు అనే వ్యక్తి అబద్ధాలకోరని తనకు నిజంగా అన్యాయం జరిగి ఉంటే నాలుగున్నరేళ్లు ఏం చేస్తున్నట్లు?. కోర్టులను ఆశ్రయించకుండా ఈరోజు ఎందుకు కేసులు పెడుతున్నారని ఆరోపించారు. కేవీ రావు వెనుక చంద్రబాబు ఉండి ఈ కథను నడిపిస్తున్నాడని ఖచ్చితంగా చెబుతున్నానని అన్నారు.

2018లో కేవీరావుపై పవన్‌ కళ్యాణ్‌ చేసిన ఆరోపణలు చూస్తే కేవీ రావు ఎంత బ్రోకరో స్పష్టంగా తెలుస్తుందిన్నారు. కేవీ రావు ఏడాదిలో ఏడెనిమిది నెలలు అమెరికాలో ఉంటాడని సింగపూర్‌ కేంద్రంగా ప్రపంచ వ్యాప్తంగా బ్రోకర్‌ పనులు చేయడం కేవీ రావు పని అన్నారు. అలాంటి వ్యక్తిని విక్రాంత్ రెడ్డి బెదిరించాడని చెప్పడం పచ్చి అబద్ధమన్నారు. ఎలాగైనా కాకినాడ పోర్టును తన బినామీ కేవీ రావుకి పూర్తిగా అప్పగించాలనే లక్ష్యంగా చంద్రబాబు పని చేస్తున్నారని సాయిరెడ్డి ఆరోపించారు.