Donald Trump: ‘‘అధికారంలోకి వస్తే, అమెరికన్లు అందరికీ ఆదాయపన్ను రద్దు చేస్తా’’: ట్రంప్

Donald Trump: అమెరికాలో పన్ను సంస్కరణలకు సంబంధించి మాజీ అధ్యక్షుడు, అమెరికా అధ్యక్ష ఎన్నికల్లో రిపబ్లికన్ పార్టీ అభ్యర్థిగా బరిలో ఉన్న డొనాల్డ్ ట్రంప్ మరోసారి తన అసాధారణ పన్ను సంస్కరణ ప్రణాళికను ముందుకు తెచ్చారు. అమెరికన్లు అందరికీ ఫెడరల్ ఆదాయపు పన్నును తొలగిస్తానని, అందుకు మార్గం ఉందని తెలిపారు.

ఆదాయ పన్ను స్థానంలో టారిఫ్స్

ఆదాయ పన్నును రద్దు చేయడం ద్వారా కోల్పోయిన ఆదాయాన్ని సుంకాల ద్వారా తిరిగి పొందవచ్చని మాజీ అధ్యక్షుడు డొనాల్డ్ ట్రంప్ వాదిస్తున్నారు. తన ప్రచారంలో ఎక్కువ భాగం ఇదే ప్రణాళికను వివరిస్తున్నారు. అయితే, ఇది ఆచరణ సాధ్యం కాని, అవాస్తవికమైన ఆలోచన అని ఆర్థిక రంగ నిపుణులు తెలిపారు. ప్రభుత్వ ఆదాయం కోల్పోకుండా, ఆదాయపన్నును రద్దు చేయడానికి ఒకమార్గం ఉందని ట్రంప్ వాదిస్తున్నారు.

ఆదాయపు పన్ను రద్దు సాధ్యమేనా?

బ్రోంక్స్ లోని బార్బర్ షాప్ లో ఇటీవల కనిపించిన ట్రంప్, ఆల్ టారిఫ్ ప్లాన్ ను ఏర్పాటు చేయడం ద్వారా ప్రతి అమెరికన్ పౌరుడికి ఫెడరల్ ఆదాయ పన్నులను తొలగించడం సాధ్యమేనని వాదించారు. దీనిని ఎలా సాధించవచ్చని అడిగినప్పుడు, 1800 ల నాటి పన్ను విధానాలను తిరిగి తీసుకురావాలని సూచించారు. ‘‘మీకు తెలుసా, పాత రోజుల్లో, మనం తెలివైనవారిగా ఉన్నప్పుడు, 1890 లలో... అమెరికా సాపేక్షంగా అత్యంత ధనిక దేశాలలో ఒకటి. అప్పుడు అన్ని టారిఫ్ లు ఉన్నాయి. ఆదాయపు పన్ను మాత్రం లేదు" అని ఆయన అన్నారు.

ఆదాయ పన్నుతో కష్టాలు

ప్రస్తుత పరిస్థితిలో, అమెరికన్లకు తమ పన్నులను చెల్లించడం కష్టంగా ఉందని ట్రంప్ వ్యాఖ్యానించారు. ఆదాయ పన్ను (income tax) కారణంగా ప్రజలు చనిపోతున్నారని ట్రంప్ అన్నారు. ప్రజల వద్ద పన్ను చెల్లించడానికి డబ్బులు లేవన్నారు. లేదు, ‘‘పాత రోజుల్లో, 1890, 1880 లలో మన వద్ద చాలా డబ్బు ఉండేది. అప్పుడు మన సంపదను ఎలా ఖర్చు చేయాలని తెలుసుకోవడం కోసం బ్లూ రిబ్బన్ కమిటీ వంటి కమిటీలను ఏర్పాటు చేయాల్సి వచ్చింది’’ అని ట్రంప్ వివరించారు. అంత సంపదను ఎలా ఖర్చు చేయాలో అప్పట్లో అమెరికన్లకు తెలియలేదని మాజీ అధ్యక్షుడు పేర్కొన్నారు. ఆ తర్వాత ఆదాయపు పన్ను వ్యవస్థకు వెళ్లామని, దాంతో, ప్రజల వద్ద డబ్బులు మిగలడమే లేదని ట్రంప్ (donald trump) వ్యాఖ్యానించారు. ఇప్పుడు మళ్లీ పాత విధానానికి వెళ్లాలని సూచించారు.