Pakistan crisis : పెట్రోల్​ ధర ఒకేసారి రూ. 35 పెంపు.. ప్రజలకు షాకిచ్చిన ప్రభుత్వం!

Pakistan petrol price today : ఆర్థిక సంక్షోభంతో కొట్టుమిట్టాడుతున్న పాకిస్థాన్​లో పరిస్థితులు రోజురోజుకు దిగజారిపోతున్నాయి! ఓవైపు రూపాయి విలువ కనిష్ఠ స్తాయికి పడిపోతుంటే.. మరోవైపు ప్రజలపై ప్రభుత్వం 'ధరల' భారం మోపుతోంది. తాజాగా.. పాకిస్థాన్​లో పెట్రోల్​, డీజిల్​ ధరలను భారీగా పెంచింది ప్రభుత్వం. 

'ఏం పర్లేదు.. తక్కువే పెంచాము..'

పెట్రోల్​, డీజిల్​పై లీటరుకు రూ. 35ను పెంచింది పాకిస్థాన్​ ప్రభుత్వం. కిరోసిన్​ ఆయిల్​, లైట్​ డీజిల్​ ఆయిల్​పై లీటరుకు రూ. 18 పెంచింది. ఈ విషయాన్ని పాకిస్థాన్​ ఆర్థికశాఖ మంత్రి ఇషక్​ దాస్​ ఆదివారం ప్రకటించారు. పెంచిన ధరలు ఆదివారమే అమల్లోకి వచ్చాయి.

Pakistan economic crisis : "పెట్రోల్​ ఉత్పత్తుల ధరలను ప్రభుత్వం పెంచింది. ఇవి 2023 జనవరి 29 ఉదయం 11 గంటలకే అమల్లోకి వచ్చాయి. హై స్పీడ్​ డీజిల్​ ధర.. లీటరుకు రూ. 262.80కి చేరింది. లీటరు ఎంఎస్​ పెట్రోల్​ ధర రూ. 249.80ని తాకింది. కిరోసిన్​ ఆయిల్​ ధర లీటరుకు 189.83కి పెరిగింది. లీటరు లైట్​ డీజిల్​ ఆయిల్​ ధర రూ. 187కి చేరింది," అని పాకిస్థాన్​ ఆర్థికమంత్రి ట్వీట్​ చేశారు.

పెట్రోలియం ధరలను చాలా తక్కువగానే పెంచినట్టు వ్యాఖ్యానించారు ఇషక్​ దాస్​. "అంతర్జాతీయంగా ధరలు పెరుగుతున్నాయి. పాకిస్థాన్​ రూపీ పడిపోతోంది. అయినప్పటికీ.. ప్రధాని షెహ్​బాజ్​ షరీఫ్​ ఆదేశాలతో పెట్రోలియం ధరలను చాలా తక్కువగానే పెంచాము," అని అన్నారు. గత నాలుగు నెలల్లో పెట్రోల్​, డీజిల్​ ధరలను పెంచలేదని గుర్తుచేశారు. ఆయా ధరలు తగ్గాయని వివరించారు.

Pakistan petrol and diesel price today : గత గురువారం నుంచి పాకిస్థానీ రూపీ అత్యంత దారుణ ప్రదర్శన చేస్తోంది. డాలరుతో పోల్చితే 34 రూపాయలు పతనమైంది. 1999లో ఎక్స్​ఛేంజ్​ రేట్​ సిస్టెమ్​ను ప్రవేశపెట్టినప్పటి నుంచి ఈ స్థాయిలో రూపాయి పడిపోవడం ఇదే తొలిసారి.

పాకిస్థాన్​ను ఆర్థిక సంక్షోభం నుంచి గట్టెక్కించేందుకు తమ సాయశక్తులా ప్రయత్నిస్తామని ప్రధాని షెహ్​బాజ్​ షరీఫ్​ తెలిపారు. రాజకీయంగా సమస్యలు ఎదురైనప్పటికీ.. ప్రజల సంక్షేమాన్ని దృష్టిలో పెట్టుకుని పలు కీలక నిర్ణయాలు తీసుకుంటామని స్పష్టం చేశారు.

Pakistan latest news : ఆర్థిక సంక్షోభం నేపథ్యంలో.. ఐఎంఎఫ్​ (అంతర్జాతీయ ద్రవ్య నిధి) నిధులపై భారీ ఆశలు పెట్టుకుంది పాకిస్థాన్​. ఈ క్రమంలోనే ఐఎంఎఫ్​ ఆశిస్తున్నట్టుగా.. పెట్రోల్​, డీజిల్​ ధరలను పెంచుతోంది. మరోవైపు పన్నులను కూడా భారిగా పెంచుతోంది. ఈ నేపథ్యంలో.. ఆ దేశంలో ద్రవ్యోల్బణం మరింత పెరిగే అవకాశం లేకపోలేదు.