LPG Price hike: మళ్లీ పెరిగిన ఎల్పీజీ సిలిండర్ల ధరలు; ఒక్కో సిలిండర్ పై ఎంతంటే..?

ఎల్పీజీ ధరలను ప్రభుత్వ రంగ చమురు కంపెనీలు మరోసారి పెంచాయి. అలాగే, విమానాలకు ఉపయోగించే జెట్ ఫ్యుయెల్ లేదా ఏవియేషన్ టర్బైన్ ఫ్యూయల్ (ATF) ధర 2 శాతం పెరిగింది. అంతర్జాతీయ చమురు ధరల ధోరణులకు అనుగుణంగా భారత్ లోని ప్రభుత్వ రంగ చమురు కంపెనీలు నెలవారీగా చమురు ధరలను సమీక్షిస్తుంటాయి. అందులో భాగంగా ఆగస్ట్ 1న జరిపిన సమీక్షలో కమర్షియల్ ఎల్పీజీ 19 కిలోల సిలిండర్ రేటును రూ .6.5 పెంచారు. ఏవియేషన్ టర్బైన్ ఫ్యూయల్ (ATF) కిలో లీటర్ ధర రూ .1,827.34 పెరిగి రూ .97,975.72 కు చేరుకుంది. ముంబైలో ఏటీఎఫ్ ధర రూ.89,908.31 నుంచి రూ.91,650.34కు పెరిగింది.

వరుసగా రెండోసారి..

జెట్ ఇంధనం లేదా ఏవియేషన్ టర్బైన్ ఫ్యూయల్ (ATF) రేట్లు పెరగడం ఇది వరుసగా రెండోసారి కావడం గమనార్హం. జూలైలో ఏటీఎఫ్ ధరలు 1.2 శాతం (కిలో లీటరుకు రూ.1,179.37) పెరగగా, జూన్ 1న 6.5 శాతం (కిలో లీటరుకు రూ.6,673.87) తగ్గాయి. ఈ ధరలు స్థానిక పన్నులను బట్టి రాష్ట్రాల వారీగా మారుతూ ఉంటాయి.

వాణిజ్య ఎల్పీజీ రేట్లు

చమురు సంస్థలు వాణిజ్య ఎల్పీజీ ధరను 19 కిలోల సిలిండర్ కు రూ .6.5 పెంచాయి. దాంతో, 19 కిలోల కమర్షియల్ ఎల్పీజీ సిలిండర్ ధర రూ .1,652.50 కు పెరిగింది. ముంబైలో కమర్షియల్ ఎల్పీజీ సిలిండర్ (LPG) ధర రూ.1,605 ఉండగా, కోల్ కతాలో రూ.1,764.50, చెన్నైలో రూ.1,817 గా ఉంది. ఈ ధరలు స్థానిక పన్నులను బట్టి రాష్ట్రాల వారీగా మారుతూ ఉంటాయి.

నెలవారీ సమీక్ష

ప్రభుత్వ యాజమాన్యంలోని ఇండియన్ ఆయిల్ కార్పొరేషన్ (IOC), భారత్ పెట్రోలియం కార్పొరేషన్ లిమిటెడ్ (BPCL), హిందుస్థాన్ పెట్రోలియం కార్పొరేషన్ లిమిటెడ్ (HPCL) ప్రతి నెలా ఒకటో తేదీన అంతర్జాతీయ ఇంధనం, విదేశీ మారకపు రేటు సగటు ధర ఆధారంగా ఈ ధరలను సవరిస్తుంటాయి.