Karnataka opinion poll 2023 : బీజేపీకి ఓటమి తప్పదా? ఏ సర్వే.. ఏం చెబుతోంది?

Karnataka opinion poll 2023 : 2023 కర్ణాటక ఎన్నికలకు ఇంకొన్ని రోజుల సమయమే ఉంది. ఈ క్రమంలో తుది దశ ఎన్నికల ప్రచారాలను మరింత విజయవంతం చేసేందుకు రాజకీయ పార్టీలు తీవ్రంగా శ్రమిస్తున్నాయి. హామీలతో ప్రజలను ఆకర్షించే పనిలో పడ్డాయి. మరోవైపు.. ఇప్పటికే దాదాపు అన్ని సర్వేలు బయటకొచ్చాయి. ఈ దఫా ఎన్నికల్లో కాంగ్రెస్​ విజయం సాధిస్తుందని అనేక సర్వేలు చెబుతున్నాయి. ఇంకొన్ని సర్వేలు మాత్రం.. బీజేపీ అతిపెద్ద పార్టీగా అవతరిస్తుందని స్పష్టం చేస్తున్నాయి. ఈ నేపథ్యంలో ఇప్పటివరకు వెలువడిన సర్వేలు, అవి చెబుతున్న వివరాలను తెలుసుకుందాము..

ఏ సర్వే.. ఏం చెబుతోంది..?

ఏబీపీ- సీఓటర్​ సర్వే ప్రకారం.. కర్ణాటకలో కాంగ్రెస్​(107-119) ప్రభుత్వాన్ని స్థాపిస్తుంది. బీజేపీ(74-86) ఘోర వైఫల్యాన్ని చూస్తుంది. జేడీఎస్​(23-35) ప్రదర్శన కూడా అంతంత మాత్రంగానే ఉంటుంది.

2023 Karnataka elections : ఇండియా టుడే- సీఓటర్​ సర్వే ప్రకారం.. కర్ణాటకలో బీజేపీ అధికారాన్ని కోల్పోతుంది. బీజేపీకి 74-86 సీట్లు మాత్రమే లభిస్తాయి. 2018తో పోల్చుకుంటే దాదాపు 25 సీట్లు తగ్గుతాయి. కాంగ్రెస్​కు 107-119 సీట్లు దక్కొచ్చు. జేడీఎస్​కు 23-35 సీట్లు రావొచ్చు.

ఇదీ చదవండి:- Karnataka elections : కర్ణాటకలో బీజేపీ- కాంగ్రెస్​ హామీల వర్షం.. ప్రజలకు ఆకర్షించేనా?

జీ న్యూస్​- మాట్రీజ్​ కర్ణాటక పోల్​ ప్రకారం.. బీజేపీ అతిపెద్ద పార్టీగా అవతరిస్తుంది. కాంగ్రెస్​, జేడీఎస్​లు రెండు, మూడు స్థానాల్లో నిలుస్తాయి. బీజేపీ 103-115 స్థానాల్లో గెలుస్తుంది. కాంగ్రెస్​ 79-91, జేడీఎస్​ 26-36 స్థానాల్లో విజయాన్ని దక్కించుకునే అవకాశం ఉంది. ఈ పోల్​లో 1.80లక్షల మంది పురుషులు, 1.12లక్షల మంది మహిళలు పాల్గొన్నారు.

Karnataka election results : కన్నడ వార్తా సంస్థ సువర్న న్యూస్​ 24X7, జన్​ కీ బాత్​ ప్రకారం.. బీజేపీ అతిపెద్ద పార్టీగా అవతరిస్తుంది. కానీ ఓటు షేరు విషయంలో బీజేపీ కన్నా కాంగ్రెస్​ ముందంజలో ఉంటుంది.

కన్నడలోని ఈదిన ప్రకారం కాంగ్రెస్​కు స్పష్టమైన మెజారిటీ వచ్చి, ప్రభుత్వాన్ని స్థాపిస్తుంది. 132-140 సీట్లల్లో గెలవచ్చు. బీజేపీకి 57-65 సీట్లే వస్తాయి.

సర్వేలు ఏం చెబుతున్నా.. గెలుపుపై ప్రధాన పార్టీలన్నీ ధీమాగా ఉన్నాయి. మరోమారు అధికారం తమదేనని బీజేపీ వ్యాఖ్యానిస్తుంటే.. ఈసారి మేము ప్రభుత్వాన్ని స్థాపిస్తామని కాంగ్రెస్​ అంటోంది. జేడీఎస్​ మాత్రం.. మరోమారు కింగ్​ మేకర్​ పాత్ర పోషించి, రాష్ట్ర రాజకీయాల్లో కీలకంగా ఉండాలని అభిప్రాయపడుతోంది.

కర్ణాటక ఎన్నికలు..

224 అసెంబ్లీ సీట్లున్న కర్ణాటకలో ఈ నెల 10న ఎన్నికలు జరగనున్నాయి. 13న ఫలితాలు వెలువడనున్నాయి. మరి ఈ సర్వేల విశ్లేషణలు నిజమవుతాయా? లేదా? అన్నది 13తో తేలిపోతుంది!