Justin Trudeau : అటు ఆరోపణలు- ఇటు స్నేహం కోసం ప్రయత్నాలు.. కెనడా ప్రధాని మాటలకు అర్థమేంటి?

Justin Trudeau latest news : ఖలిస్థానీ ఉగ్రవాది హర్దీప్​ సింగ్​ నిజ్జార్​ హత్య నేపథ్యంలో భారత- కెనడా మధ్య బంధం బలహీన పడుతున్న వేళం.. పలు కీలక వ్యాఖ్యలు చేశారు ఆ దేశ ప్రధాని జస్టిన్​ ట్రూడో. భారత్​తో ఇప్పటికీ తాము మంచి బంధం కావాలని కోరుకుంటున్నట్టు వ్యాఖ్యానించారు. ఇంకా చెప్పాలంటే.. భారత్​తో బంధం ఈ సమయంలో చాలా ముఖ్యం అని కూడా అన్నారు.

కెనడా మాంట్రియల్​లో గురువారం జరిగిన ఓ మీడియా సమావేశంలో పాల్గొన్నారు జస్టిన్​ ట్రూడో. భారత్​తో బంధంపై ఈ మేరకు వ్యాఖ్యానించారు.

India Canada relation : "భారత్​.. వేగంగా వృద్ధిచెందుతున్న ఒక ఆర్థిక శక్తి. భౌగోళిక రాజకీయాల్లో ఆ దేశానిది కీలక పాత్ర. మా ఇండో-పెసిఫిక్​ స్ట్రాటెజీని గతేడాదే మీకు చూపించాము. దానిపై మేము చాలా సీరియస్​గా ఉన్నాము. అందుకే ఇండియాతో సత్సంబంధాలు కుదుర్చుకోవాలని చూస్తున్నాము. కెనడా ఒక్కటే కాదు! కెనడా మిత్రపక్షాలు కూడా భారత్​తో మంచి బంధాన్ని ఏర్పరచుకోవాలి," అని జస్టిన్​ ట్రూడో అన్నారు.

జూన్​లో హర్దీప్​ సింగ్​ నిజ్జార్​ హతమయ్యాడు. దీని వెనుక భారత ప్రభుత్వం హస్తం ఉందని సంచలన వ్యాఖ్యలు చేసి, ప్రపంచాన్ని షాక్​కు గురిచేశారు కెనడా ప్రధాని. ఈ వ్యవహారంతో ఇరు దేశాల మధ్య ఉద్రిక్త వాతావరణం నెలకొంది. అయితే.. ఆధారులున్నాయి, ఆధారులున్నాయి అంటున్నారు కానీ.. వాటిని ట్రూడో చూపించడం లేదు. ఈ తరుణంలో భారత్​తో స్నేహగీతం కోసం ఆయన ప్రయత్నిస్తుండటం చర్చలకు దారి తీసింది.

ఇదీ చూడండి:- Nijjar killing: ‘భారతీయ హిందువులు కెనడా నుంచి వెళ్లిపోవాలి’- భారతీయులకు ఖలిస్తాన్ అనుకూల నేతల హెచ్చరిక

అమెరికా గురించి..

Hardeep Singh Nijjar death : భారత్​పై తాము చేసిన ఆరోపణలకు అమెరికా మద్దతు లభిస్తుందని ఆశాభావం వ్యక్తం చేశారు జస్టిన్​ ట్రూడో.

"భారత్​తో మంచి సంబంధమే కావాలి. కానీ కెనడా దేశంలో కూడా కొన్ని చట్టాలు ఉంటాయి. అసలు నిజాలు తెలిసేందుకు ఇండియా.. మాతో కలిసి పనిచేయాలి. భారత విదేశాంగమంత్రి జై శంకర్​- అమెరికా విదేశాంగమంత్రి ఆంటోని బ్లింకెన్​ మధ్య సమావేశం జరిగింది. మేము చేసిన ఆరోపణలను ఆ సమావేశంలో ప్రస్తావిస్తామని బ్లింకెన్​ మాకు హామీనిచ్చారు," అని జస్టిన్​ ట్రూడో అన్నారు.

కాగా.. గురువారం జరిగిన సమావేశం అనంతరం మీడియాతో మాట్లాడారు జై శంకర్​, బ్లింకెన్​. కానీ కెనడా విషయాన్ని ఎవరు ప్రస్తావించలేదు.