పీసీఓఎస్ ఉన్నా పీరియడ్స్‌లో ఐరన్‌మ్యాన్ ట్రయథ్లాన్ పూర్తి చేసిన సయామీ ఖేర్: అసాధారణ విజయ గాథ

సయామీ ఖేర్ గుర్తున్నారు కదా. బాలీవుడ్ నటి. తెలుగులోనూ రేయ్, వైల్డ్ డాగ్, హైవే వంటి మూవీల్లో నటించారు. బాలీవుడ్ మెరుపులకు, సోషల్ మీడియా హడావుడికి దూరంగా సయామీ ఖేర్ ఓ అద్భుతమైన రికార్డును తన ఖాతాలో వేసుకున్నారు. ఏడాది వ్యవధిలో రెండుసార్లు కఠినమైన ఐరన్‌మ్యాన్ 70.3 ట్రయథ్లాన్‌ను పూర్తి చేసిన తొలి భారతీయ నటిగా నిలిచారు. ఈసారి ఆమె పీరియడ్స్‌లో ఉన్నప్పటికీ ఈ ఘనత సాధించారు. ఇది ఆమెకు మరింత సవాలుగా మారింది. కఠినమైన భూభాగం, కఠోర వాతావరణ పరిస్థితులకు పీరియడ్స్ అదనపు ఇబ్బందిని తెచ్చిపెట్టాయి.

తనకు పాలిసిస్టిక్ ఓవరీ సిండ్రోమ్ (పీసీఓఎస్) ఉందని, దీనివల్ల రుతుక్రమం క్రమరహితంగా ఉంటుందని సయామీ వెల్లడించారు. అయితే, "సెల్ఫ్-టాక్" (తనతో తాను మాట్లాడుకోవడం) తనను ముందుకు నడిపించడంలో ఎంతో సహాయపడిందని ఆమె చెప్పారు.

"ఈ ఏడాది ఒక అదనపు సవాలు ఎదుర్కొన్నాను. నాకు పీసీఓఎస్ ఉంది. కాబట్టి నా రుతుక్రమం ఊహించని విధంగా ఉంటుంది. సరిగ్గా రేసు ఉన్న వారంలోనే అది మొదలైంది. అదృష్టవశాత్తూ, అది నా పీరియడ్ చివరి రోజు కాబట్టి నొప్పి అంత తీవ్రంగా లేదు. కానీ నేను ఇంకా బరువుగా, ఉబ్బినట్లుగా, సాధారణం కంటే కొద్దిగా నెమ్మదిగా ఉన్నట్లు అనిపించింది. నిజంగానే అసౌకర్యం ఉంటుంది" అని సయామీ హెల్త్ షాట్స్ కు ఇచ్చిన ఎక్స్‌క్లూజివ్ 'షి స్లేస్' ఇంటర్వ్యూలో తెలిపారు.

సయామీ ఖేర్: అసౌకర్యం నుంచి ముందుకు సాగడం

ఇది ఆమె కోరుకోని మలుపు. కానీ ఆమె మానసికంగా సిద్ధమై ఉన్నారు. "నేను అబద్ధం చెప్పను. ఆ ఆలోచన నన్ను కలవరపెట్టింది... చాలా మంది మహిళలు పీరియడ్స్‌లో ఉన్నప్పటికీ పనికి, సంరక్షణకు, ప్రదర్శనలకు, లేదా పోటీలకు పూర్తి స్థాయిలో హాజరవుతారు. మనం తరచుగా ఎటువంటి హడావుడి లేకుండా ముందుకు సాగుతూనే ఉంటాం. అసౌకర్యంతో ఎలా ముందుకు సాగాలో మనమందరం నేర్చుకున్నాం" అని 'మిర్జియా' సినిమాతో 2016లో హిందీ సినీ రంగ ప్రవేశం చేసిన 33 ఏళ్ల సయామీ అన్నారు.

ఈసారి స్వీడన్‌లోని జొన్‌కోపింగ్‌లో జరిగిన ఐరన్‌మ్యాన్ 70.3 ట్రయథ్లాన్ శారీరకంగా చాలా డిమాండింగ్ ఉంటుంది. ఇది 1.9 కి.మీ. ఈత, 90 కి.మీ. సైకిల్, 21.1 కి.మీ. పరుగుతో కూడిన రేసును పూర్తి చేయాలి.

2024లో ఈ సవాలును స్వీకరించాలని నిర్ణయించుకున్నప్పుడు సయామీ ఖేర్ తన శారీరక ఆరోగ్యం కంటే మానసిక ఆరోగ్యానికి ఎక్కువ ప్రాధాన్యత ఇచ్చానని హెల్త్ షాట్స్ కు చెప్పారు. ఏడేళ్ల వయస్సు నుంచీ క్రీడలలో ఉన్న ఆమెకు అప్పటి జడత్వం నుంచి బయటపడాలనే తపనతో ఇది ప్రారంభమైంది.

"2023 జూన్‌లో నాకు సైకిల్ ప్రమాదం జరిగింది. తర్వాత నేను శారీరకంగా, మానసికంగా చాలా దెబ్బతిన్నాను. నా ముఖం, కాలుపై ఆరు కుట్లు పడ్డాయి. ఒక పక్కటెముక విరిగింది. అది చూడటానికి బాగాలేదు. అప్పుడు నాకు మానసికంగా ఏదో జరిగిందని అనిపిస్తుంది. నేను క్రీడలు, ఫిట్‌నెస్‌ల నుండి పూర్తిగా దూరమయ్యాను. ప్రమాదం తర్వాత 8 నెలల పాటు నేను ఏమీ చేయలేదు. ఆ తర్వాత నాకు నిజంగా అసౌకర్యంగా, చిరాకుగా అనిపించడం మొదలైంది. అప్పుడే నేను తిరిగి ట్రాక్ లోకి రావాలని అనుకున్నాను. దానికి ఏకైక మార్గం చాలా పెద్ద రేసులో నమోదు చేసుకోవడం" అని మాజీ బ్యాడ్మింటన్, క్రికెట్ క్రీడాకారిణి సయామీ పంచుకున్నారు.

పీరియడ్స్‌లో ఉన్నప్పుడు

పీరియడ్స్‌లో ఉన్నప్పుడు పూర్తి చేయడం కష్టంగా లేదా? అని అడిగితే ఆమె ఒప్పుకున్నారు. "అది మరింత కష్టంగా ఉంది. నా శరీరానికి మరింత శ్రద్ధ అవసరం. నా మనస్సుకు మరింత ఏకాగ్రత అవసరం. కానీ ఒకసారి నేను రేసు లయలో స్థిరపడిన తర్వాత, నా నరాలు శాంతించిన తర్వాత, నేను ఎందుకు చేస్తున్నానో నాకు గుర్తుకు వచ్చింది. గతంలో కంటే 32 నిమిషాలు వేగంగా పూర్తి చేశాను. అది నిశ్శబ్దంగా ఉన్నా శక్తివంతంగా అనిపించింది" అని వివరించారు.

"నాకు అసౌకర్యంగా చాలా విషయాలు ఉన్నాయి. నా పీరియడ్, వాతావరణ ఆందోళన, ఆత్మవిశ్వాసం లేకపోవడం. అయినా నేను పూర్తి చేశాను" అని సయామీ గర్వంగా చెప్పారు.

రేసు రోజున పీరియడ్స్‌ ఉన్నప్పుడు తీసుకున్న జాగ్రత్తలు

శారీరక సౌకర్యం కోసం సయామీ మెన్‌స్ట్రువల్ కప్‌ను ఎంచుకున్నారు. ఆమె దానిని ముందుగానే పరీక్షించి, దానితో శిక్షణ పొందారు. "నేను అదనపు మనశ్శాంతి కోసం డార్క్ ట్రై-సూట్‌ను కూడా ధరించాను. మీరు ప్రాక్టీస్ చేసిన దాన్ని ఉపయోగించడం ముఖ్యం అని నేను అనుకుంటున్నాను. రేసు రోజు ప్రయోగాలు చేయడానికి సమయం కాదు. మీరు మీ పరికరాలు, మీ శరీరాన్ని నమ్మాలి" అని ఆమె సూచించారు.

శక్తి స్థాయిలను పెంచడానికి ఇంకేం చేశారు?

"నేను తెలివిగా ఆహారం తీసుకోవడంపై, హైడ్రేటెడ్‌గా ఉండటంపై దృష్టి సారించాను. నేను కాస్త ఎక్కువగానే అల్పాహారం తీసుకున్నాను. బైక్‌పై నా ఎనర్జీ జెల్స్‌తో మరింత శ్రద్ధగా ఉన్నాను. ఇంకా నేను నాలో నేను మాట్లాడుకుంటూనే ఉన్నాను. 'నువ్వు ఇంతకు ముందు నొప్పిలో శిక్షణ పొందావు. తిమ్మిర్లు, అలసట, వంటి వాటిని అధిగమించావు..’ అని ఆ అంతర్గత స్వరం చెప్పింది. ఆ సెల్ఫ్-టాక్ చాలా సహాయపడుతుంది" అని సయామీ అన్నారు.

పీసీఓఎస్, పీరియడ్స్ శక్తిని ఆపలేవు

తరతరాలుగా మహిళలను నిశ్శబ్దం పాటించడానికి, సిగ్గుపడటానికి, పూర్తి స్థాయిలో కనిపించకుండా నిరోధించడానికి పీరియడ్స్‌ను ఒక కారణంగా ఉపయోగించారు. కానీ సయామీకి “మానసిక స్థితి ప్రతిదీ మారుస్తుంది”.

"రేసు రోజు ఉదయం నాకు బలంగా అనిపించలేదు. చల్లగా, అసౌకర్యంగా ఉంది. నా శరీరం అసాధారణంగా అనిపించింది. కానీ నేను ఈత ప్రారంభంలో నిలబడినప్పుడు.. ఒక దృష్టి లోపం ఉన్న అథ్లెట్‌ను చూశాను. ఆ వ్యక్తి చిరునవ్వుతో సిద్ధమవుతున్నారు. ఆ క్షణం నన్ను నిలబెట్టింది. శరీరంతో పోరాడటం మానేసి, దానిని నమ్మడం ప్రారంభించినప్పుడు ప్రతీదీ సాధ్యమవుతుంది. ఇది పీరియడ్స్‌లో అంత సులభం కాదు.. కానీ కఠినమైన రోజు మనకు చాలా నేర్పుతుంది.." అని వివరించారు.

మహిళల ఆరోగ్య సమస్యల గురించి మాట్లాడటానికి సయామీ వెనుకాడరు. అయినప్పటికీ, ట్రయథ్లాన్ తర్వాత సోషల్ మీడియా పోస్ట్ రాసినప్పుడు ఆమె తన పీరియడ్ గురించి చెప్పడానికి సందేహించారు.

సయామీకి ఒక ఫోటో గుర్తుకు వచ్చింది. రేసు మధ్యలో పీరియడ్ వచ్చినప్పటికీ, చెక్కుచెదరకుండా పరుగును కొనసాగించిన ఒక మహిళా అథ్లెట్ ఫోటో అది. "ఈ విషయాన్ని అపోహల నుండి దూరం చేయాలని చెప్పడం నాకు గుర్తుంది. ఆ ఇంటర్వ్యూ నాతోనే ఉండిపోయింది. తన పీరియడ్ గురించి ప్రస్తావించాలా? ప్రజలు దానిపై దృష్టి సారిస్తారా, ఐరన్‌మ్యాన్‌పై కాదా?’’ అని సయామీ ఆలోచించారు. కానీ తర్వాత, ఆమె సంకోచం కంటే నిజాయితీని ఎంచుకున్నారు.

"దాన్ని దాచిపెట్టడంలో అర్థం ఏమిటి? మనం దాని గురించి ఎంత ఎక్కువగా మాట్లాడితే, స్వరాలు వినడానికి అంత ఎక్కువ అవకాశాలు కల్పిస్తాం. అవును, నా పీరియడ్స్ మనం తెల్లటి దుస్తులలో తిరిగే సంతోషకరమైన రోజులు కావు. కానీ అవి నన్ను కుంగదీయలేవు కూడా. మనం దాచాల్సిన అవసరం లేదు. మనకు నిజాయితీగా ఉండటానికి స్థలం కావాలి. మహిళలు చాలా విషయాలను మౌనంగా దాచుకుంటారు. పీరియడ్స్ అందులో ఒక భాగం మాత్రమే" అని చెప్పారు.