Pathaan Sequel Update: పఠాన్ వసూళ్ల వర్షం.. సీక్వెల్‌పై బజ్.. షారుఖ్ ఆసక్తికర వ్యాఖ్యలు

Pathaan Sequel Update: బాలీవుడ్ బాద్‌షా షారుఖ్ ఖాన్‌ నాలుగేళ్ల నిరీక్షణకు ఫలితం పఠాన్ రూపంలో వచ్చింది. సిద్ధార్థ్ ఆనంద్ తెరకెక్కించిన ఈ సినిమా సాలిడ్ హిట్ అందుకోవడమే కాకుండా వసూళ్ల పరంగా సరికొత్త రికార్డులను క్రియేట్ చేస్తోంది. కలెక్షన్ల పరంగా బాహుబలి 2, కేజీఎఫ్ 2 సినిమాలను అధిగమిస్తూ సరికొత్త ఘనతలను అందుకుంటోంది. దీంతో పఠాన్ సీక్వెల్‌పై అందరి దృష్టి పడింది. సోషల్ మీడియా వేదికగా అభిమానులు ఈ సినిమాకు సీక్వెల్ గురించి చర్చ లేవనెత్తుతున్నారు. తాజాగా ఈ ప్రశ్నకు సమాధానం చెప్పింది చిత్రబృందం.

సోమవారం నాడు మీడియా ఇంటరాక్షన్ నిర్వహించిన పఠాన్ టీమ్.. ఈ చిత్ర సీక్వెల్ గురించి ఆసక్తికర విషయాలను పంచుకుంది. ఈ అంశంపై దర్శకుడు సిద్ధార్థ్ ఆనంద్ మాట్లాడుతూ.. "ప్రతి ఫిల్మ్ మేకర్ మాదిరిగానే షారుఖ్ ఖాన్‌తో ఒక్కసారైనా పనిచేయాలని నేను అనుకున్నాను. పఠాన్‌తో ఆ కోరిక తీరింది. షారుఖ్‌కు అద్భుతమైన కానుక ఇచ్చినందుకు ఆనందంగా ఉంది. పఠాన్ విడుదలైంది. హిట్ అయింది. తర్వాత ఏం జరుగుతుందో చూడాలి" అని సిద్ధార్థ్ ఆనంద్ తెలిపారు. పఠాన్ చిత్రానికి సీక్వెల్ గురించి అభిమానులు కేరింతలు కొట్టగా.. దేవుడి దయ (ఇన్షా అల్లా) ఉంటే జరుగుతుందని చెప్పారు సిద్ధార్థ్.

అనంతరం షారుఖ్ మాట్లాడుతూ.. "నాకు, నా కుటుంబానికి ఈ రోజు మేము మర్చిపోలేని రోజు. చాలా కాలం నుంచి మేము ఇంత సంతోషాన్ని అనుభవించ లేదు. సిద్ధార్థ్ ఎప్పుడు కావాలనుకుంటే అప్పుడు పఠాన్-2 చేయడానికి నేను సిద్ధం. ప్రజలు కూడా ఇదే కావాలనుకుంటే అది నేను గౌరవంగా భావిస్తున్నాను." అని షారుఖ్ తెలిపారు.

పఠాన్ చిత్రం ప్రపంచ వ్యాప్తంగా అదిరిపోయే వసూళ్లను సాధిస్తోంది. కేవలం ఐదు రోజుల్లోనే ఈ సినిమా రూ.542 కోట్లను వసూలు చేసింది. జనవరి 25న విడుదలైన ఈ సినిమా బాహుబలి2, కేజీఎఫ్ 2 రికార్డులను అధిగమించి అత్యంత వేగంగా 200 కోట్ల మార్కును అందుకున్న సినిమాగా రికార్డు సృష్టించింది. నాలుగు రోజుల్లోనే రూ.429 కోట్లను రాబట్టింది. సిద్ధార్థ్ ఆనంద్ దర్శకత్వం వహించిన ఈ సినిమాలో షారుఖ్ సరసన దీపికా పదుకొణె హీరోయిన్‌గా చేసింది. జాన్ అబ్రహం విలన్ పాత్రలో అలరించారు.