Manchu Vishnu | విష్ణు కొత్త సినిమా ఫిక్స్.. గాలి నాగేశ్వరరావుగా మంచు వారబ్బాయ్

మంచు విష్ణు హీరోగా ఓ కొత్త సినిమా రూపొందుతోంది. ఇటీవల ఈ చిత్రం గురించి విష్ణు ఓ వీడియో ద్వారా తెలియజేశారు. తాజాగా ఈ సినిమా గురించి మరో అప్డేట్ ఇచ్చారు ఈ హీరో. గాలి నాగేశ్వరరావు అనే ఆసక్తికర పాత్రలో నటిస్తున్నట్లు ట్విట్టర్ వేదికగా తెలియజేశారు. అంతేకాకుండా త్వరలోనే ఈ చిత్రానికి సంబంధించి మరో క్రేజీ అప్డేట్ తెలియజేస్తానని విష్ణు స్పష్టం చేశారు. ఈ సినిమాకు కోన వెంకట్, చోటా కే నాయుడు అనూప్ రూబెన్స్ లాంటి స్టార్ టెక్నిషియన్స్ పనిచేస్తుండటం ఆసక్తికర విషయం. అవ ఎంటర్‌టైన్మెంట్స్ పతాకంపై విష్ణు మంచు హీరోగా ఇషాన్ సూర్య ఈ సినిమాకు దర్శకత్వం వహిస్తున్నారు.

డైరెక్టర్‌గా ఈషాన్ సూర్యకు ఇదే తొలి చిత్రం. ఇంతకు ముందు పలు సినిమాలకు రచయితగా పనిచేసిన ఆయన కొన్ని చిత్రాలకు సమర్పకుడిగా, నిర్మాతగానూ వ్యవహరించారు. తాజాగా మంచు విష్ణు నటిస్తోన్న ఈ సినిమాకు కథ జీ నాగేశ్వరరెడ్డి అందించారు. పక్కా కమర్షియల్‌ ప్లాట్‌లో తెరకెక్కుతున్న ఈ మూవీపైనే ఆయన ఆశలు పెట్టుకున్నాడు.

ఎందుకంటే హీరోగానే కాకుండా నిర్మాతగానూ బిజీగా ఉన్న మంచు విష్ణు ఇటీవల కాలంలో పెద్దగా సినిమాలు చేయడం లేదు. అంతేకాకుండా ఈ హీరోకు హిట్ వచ్చి చాలా రోజులైంది. గతేడాది విడుదలైన మోసగాళ్లు కూడా పెద్ద ప్రేక్షకుల ఆదరణ పొందలేదు. పబ్లిసిటీ బాగా చేసినప్పటికీ, పాన్ఇండియా స్థాయిలో విడుదల చేసినప్పటికీ ఈ సినిమాపై మిశ్రమ స్పందనలు వచ్చాయి. ఆ చిత్రం ఆశించిన స్థాయిలో సక్సెస్‌ను అందుకోలేకపోయింది. మరి గాలి నాగేశ్వరరావుగా విష్ణు ఎలా మెప్పిస్తారో.. అసలు ఈ సినిమాకు టైటిల్ ఇదే కాదో స్పష్టత రావాలంటే మరికొన్ని రోజులు వేచి చూడాల్సిందే.