Manchu Vishnu: దిల్ రాజుతో ‘మా’ ప్రెసిడెంట్‌ మంచు విష్ణు సమావేశం - కారణం ఏమిటంటే

గ‌త కొద్ది రోజులుగా టాలీవుడ్ అనేక స‌మ‌స్య‌ల‌తో స‌త‌మ‌త‌మ‌వుతోంది. థియేట‌ర్ల‌కు వ‌చ్చే ప్రేక్ష‌కుల సంఖ్య రోజురోజుకు త‌గ్గుతుండ‌టంతో ద‌ర్శ‌క‌నిర్మాత‌ల్లో ఆందోళ‌న వ్య‌క్త‌మ‌వుతోంది. మ‌రోవైపు టాలీవుడ్ హిట్ అనే మాట విని రెండు నెల‌లు దాటిపోయింది. ఈ ప‌రాజ‌యాల‌కు తోడు ఓటీటీ మాధ్యమాల పోటీ, పెరుగుతున్న నిర్మాణ వ్య‌యాల‌తో నిర్మాత‌లు అనేక క‌ష్టాల‌ను ఎదుర్కొంటున్నారు. ఈ స‌మ‌స్య‌ల‌కు ప‌రిష్కార మార్గాల‌ను అన్వేషించే వ‌ర‌కు తెలుగు సినిమా షూటింగ్ ల‌కు బంద్ చేస్తున్న‌ట్లుగా ఇటీవ‌లే టాలీవుడ్ ప్రొడ్యూస‌ర్ గిల్డ్ పిలుపునిచ్చింది.

ప్ర‌స్తుతం ఫిలింఛాంబ‌ర్ తో పాటు ఓటీటీ ప్ర‌తినిధులు,ఇతర విభాగాల‌తో నిర్మాత‌లు గ‌త కొద్ది రోజులుగా చ‌ర్చ‌లు జ‌రుపుతున్నారు. స‌మ‌స్య‌ల ప‌రిష్కారానికై స‌రైన మార్గాల‌ను అన్వేషిస్తున్నారు. తాజాగా గురువారం టాలీవుడ్ నిర్మాత‌ల‌తో మూవీ ఆర్టిస్ట్ అసోసియేష‌న్ అధ్య‌క్షుడు మంచు విష్ణు బేటీ అయ్యారు. టాలీవుడ్ సినిమాల్లో మూవీ ఆర్టిస్ట్ అసోసియేష‌న్ లోని స‌భ్యులు,తెలుగు ఆర్టిస్ట్ ల‌కు అధికంగా ప్రాముఖ్య‌త‌నివ్వాల‌నే అంశంపై నిర్మాత‌ల‌తో స‌మావేశ‌మైన‌ట్లు మంచు విష్ణు పేర్కొన్నాడు.

మూవీ ఆర్టిస్ట్ అసోసియేష‌న్ స‌భ్య‌త్వ సంఖ్య‌ను పెంచ‌డంతో పాటు కొత్త నటీనటులకు అవ‌కాశాలు ఇచ్చి ప్రోత్స‌హించాల‌ని అసోసియేష‌న్ త‌రఫున నిర్మాత‌ల‌ను కోరనున్నట్లు మంచు విష్ణు పేర్కొన్నారు. గ‌త ఏడాది జ‌రిగిన మా ఎన్నిక‌ల్లో ప్ర‌కాష్‌రాజ్‌పై మంచు విష్ణు విజ‌యాన్ని సాధించిన సంగ‌తి తెలిసిందే.