Darshan Thoogudeepa: కుక్కల దాడి: కన్నడ స్టార్ నటుడిపై కేసు

Darshan Thoogudeepa: కన్నడ సినీ ఇండస్ట్రీలో ‘దర్శన్ తూగుదీప’ సీనియర్ స్టార్ నటుడిగా ఉన్నారు. తాజాగా ఆయనపై ఓ కేసు నమోదైంది. ఓ మహిళ దర్శన్‍పై ఎఎఫ్ఐఆర్ నమోదు చేశారు. ఆయనకు చెందిన పెంపుడు కుక్కలు తనపై దాడి చేసి, కరిచాయని ఆ 48 ఏళ్ల మహిళ పోలీసులకు ఫిర్యాదు చేశారు. దీంతో దర్శన్‍పై కేసు నమోదైంది. ఆ వివరాలివే..

బెంగళూరులోని దర్శన్ ఇంటి సమీపంలో ఖాళీ స్థలంలో తాను కారు పార్క్ చేసిన సమయంలో ఆయన పెంపుడు కుక్కలు తనపై దాడి చేశాయని ఓ మహిళ కంప్లైట్ ఇచ్చారు. ఆర్ఆర్ నగర్‌లో ఓ ఫంక్షన్‍కు హాజరై తాను తన కారు వద్దకు తిరిగివచ్చానని ఫిర్యాదులో ఆ మహిళ పేర్కొన్నారు. ఆ సమయంలో తన కారు వద్ద ఓ వ్యక్తి మూడు కుక్కలతో ఉన్నారని తెలిపారు. కుక్కలను దూరంగా తీసుకెళితే తాను కారులో వెళ్లాలని ఆ కేర్ టేకర్‌ను అడిగానని ఆ మహిళ తెలిపారు. అయితే, అక్కడ కారు ఎందుకు పార్క్ చేశారని ఆ కేర్ టేకర్ తనతో వాదనకు దిగారని, ఆ సమయంలో కుక్కలు తనపైకి దూసుకొచ్చి కరిచాయని ఆ మహిళ తన ఫిర్యాదులో పేర్కొన్నారు. ఖాళీగా ఉన్న ప్లాట్‍లోనే తాను కారు పార్కింగ్ చేసినట్టు తెలిపారు. అక్టోబర్ 28న ఈ ఘటన జరిగింది.

ఆ పెంపుడు కుక్కలు దర్శన్‍కు చెందినవి కావటంతో ఆయనపై కూడా కేసు నమోదైంది. కుక్కల దాడిలో తనకు గాయాలయ్యాయని, తన డ్రెస్ కూడా చిరిగిపోయేలా అవి కరిచాయని ఆ మహిళ తన ఫిర్యాదులో తెలిపారు. ఈ వివరాలను పోలీసులు వెల్లడించారు.

“మహిళ చేసిన ఫిర్యాదు మేరకు యాక్టర్ (దర్శన్)తో పాటు కుక్కల కేర్ టేకర్‌పై సెక్షన్ ఐపీసీ 289 కింద కేసు నమోదు చేశాం” అని ఓ పోలీసు అధికారి వెల్లడించారు.

కాగా, పులి గోరు ఉన్న నెక్లెస్ ధరించారని ఇటీవల దర్శన్‍పై ఆరోపణలు వచ్చాయి. దీంతో అటవీ శాఖ అధికారులు ఆయన ఇంట్లో సోదాలు కూడా చేశారు. అలాగే, ఓ వివాదాస్పద ఆడియో క్లిప్ విషయంలో దర్శన్‍పై కన్నడ మీడియా రెండేళ్ల నిషేధాన్ని కూడా గతంలో విధించింది. ఆయన చిత్రాలపై వార్తలను, ప్రమోషన్లు ప్రసారం చేయలేదు. అది ఇటీవలే ముగిసింది. ప్రస్తుతం దర్శన్ తూగుదీప.. గారడి, కాటీరా అనే రెండు సినిమాలు చేస్తున్నారు.