18 Pages Pre Release Event: 18 పేజెస్ చూశాక సుకుమార్ నిర్మాణంలో చేయాలనుంది.. ప్రీ రిలీజ్ ఈవెంట్‌లో అల్లు అర్జున్

18 Pages Pre Release Event: టాలీవుడ్ యంగ్ హీరో నిఖిల్ నటించిన తాజా చిత్రం 18 పేజెస్. ఈ సినిమాలో అనుపమ పరమేశ్వరన్‌ హీరోయిన్‌గా చేసింది. పల్నాటీ సూర్యప్రతాప్ దర్శకత్వం వహించిన ఈ సినిమా ప్రపంచ వ్యాప్తంగా డిసెంబరు 23న ప్రేక్షకుల ముందుకు రానుంది. ప్రముఖ దర్శకుడు సుకుమార్ కథను అందించారు. ఇప్పటికే సినిమా నుంచి విడుదలైన పాటలు శ్రోతలను బాగా అలరించాయి. ఇటీవలే ట్రైలర్ కూడా వచ్చి ఆడియెన్స్‌లో అంచనాలను అమాంతం పెంచేసింది. తాజాగా ఈ సినిమా ప్రీ రిలీజ్ ఈవెంట్‌ను హైదరాబాద్‌లో నిర్వహించారు. ఈ కార్యక్రమానికి స్టైలిష్ స్టార్ అల్లు అర్జున్ ముఖ్య అతిథిగా హాజరయ్యారు.

ఈ సందర్భంగా మాట్లాడుతూ.. "ఒకప్పుడు సౌత్ చిత్రాలు ఇక్కడ వరకే పరిమితమయ్యేవి. కానీ ఇప్పుడు మన సినిమాలను ప్రపంచమంతా చూస్తున్నారు. ఇది మనం చాలా గర్వపడాల్సిన విషయం. ఈ సినిమా నా మనస్సుకు చాలా దగ్గరైంది. ఎందుకంటే నాకెంతో ఇష్టమైన సుకుమార్ చేసిన చిత్రమిది. ఇది చూశాక సుక్కూ నాతో కూడా నిర్మాతగా ఓ సినిమా చేస్తే బాగుంటుందనిపించింది. సూర్యప్రతాప్ మంచి చిత్ర ఇవ్వాలనే తపనతో నాలుగేళ్లు కష్టపడి ఈ సినిమా చేశాడు. నిఖిల్‌ను హ్యాపీ డేస్ నుంచి చూస్తున్నా.. మంచి కథలు చేసుకుంటూ ముందుకెళ్తున్నాడు." అని అల్లు అర్జున్ అన్నారు.

ఈ సినిమాలో పుష్ప-2 గురించి కూడా మాట్లాడారు మన స్టైలిష్ స్టార్. "పుష్ప-2 పనులు శరవేగంగా జరుగుతున్నాయి. ఈ సినిమా గురించి ఒక్క మాటే చెబుతున్నా. ఈ సారి అస్సలు తగ్గేదేలే. పుష్ప-2 మీ మనస్సుకు నచ్చాలని.. నచ్చుతుందని ఆశిస్తున్నా" అని అల్లు అర్జున్ స్పష్టం చేశారు.

నిఖిల్ సరసన ఈ చిత్రంలో అనుపమ పరమేశ్వరన్ హీరోయిన్‌గా చేసింది. కార్తికేయ 2తో సక్సెస్‌ఫుల్ పెయిర్‌గా గుర్తింపు తెచ్చుకున్న ఈ జోడీ 18 పేజెస్‌తో మరోసారి అలరించనుంది. జీఏ 2 పిక్చర్స్, సుకుమార్ రైటింగ్స్ బ్యానర్లు సంయుక్తంగా తెరకెక్కించాయి. బన్ని వాసు నిర్మాతగా వ్యవహరించారు. మెగా నిర్మాత అల్లు అరవింద్ సమర్పించగా.. పల్నాటీ సూర్యప్రతాప్ దర్శకత్వం వహించారు. పాన్ఇండియా దర్శకులు సుకుమార్ కథను అందించారు. డిసెంబరు 23న ప్రపంచ వ్యాప్తంగా ప్రేక్షకుల ముందుకు రానుందీ చిత్రం.