Anganwadi Posts : శ్రీస‌త్యసాయి జిల్లాలో 80 అంగన్ వాడీ పోస్టులు భ‌ర్తీ, ఇలా దరఖాస్తు చేసుకోండి

Anganwadi Posts : శ్రీస‌త్యసాయి జిల్లాలో అంగ‌న్‌వాడీ పోస్టుల భ‌ర్తీకి నోటిఫికేష‌న్ విడుద‌ల అయింది. ద‌ర‌ఖాస్తు దాఖ‌ల‌కు జనవరి 25 ఆఖ‌రు తేదీగా నిర్ణయించారు. ఆంధ్రప్రదేశ్‌లోని జిల్లా మ‌హిళ‌, శిశు సంక్షేమ, సాధికారిత అధికారి వారి కార్యాల‌యం నుంచి వివిధ ఐసీడీఎస్ ప్రాజెక్టుల ప‌రిధిలో ఖాళీగా ఉన్న 80 పోస్టుల‌ను ప‌దో త‌ర‌గ‌తి అర్హత‌తో భ‌ర్తీ చేసేందుకు అర్హులైన వారి నుంచి ద‌ర‌ఖాస్తులు కోరుతున్నారు.

పోస్టులు

సత్యసాయి జిల్లాలో 12 ఐసీడీఎస్‌ ప్రాజెక్టుల ప‌రిధిలో మొత్తం 80 పోస్టులు కాగా, అందులో 10 అంగ‌న్‌వాడీ కార్యక‌ర్తలు, 64 అంగ‌న్‌వాడీ హెల్పర్స్ (ఆయా), 6 మినీ అంగ‌న్‌వాడీ వ‌ర్కర్స్‌ పోస్టులు ఉన్నాయి. ఈ ఉద్యోగుల‌కు స్థానికంగా నివాసిస్తున్న వివాహిత మ‌హిళ అర్హులు. కాబ‌ట్టి ఎంపికైన వారు తాము నివసిస్తున్న ప్ర‌దేశంలోనే ఉద్యోగం చేయొచ్చు. అర్హత గ‌త వారు జ‌న‌వ‌రి 25 తేదీలోపు సంబంధిత ఐసీడీఎస్‌ కార్యాల‌యంలో ద‌ర‌ఖాస్తు చేసుకోవాల్సి ఉంటుంది.

అర్హతలు...వయో పరిమితి

అంగ‌న్‌వాడీ కార్యక‌ర్త ఉద్యోగాల‌కు ప‌దో త‌ర‌గ‌తి పూర్తి చేయ‌డం త‌ప్పనిస‌రి. అంగ‌న్‌వాడీ స‌హాయ‌కురాలు ఉద్యోగాల‌కు ఏడో త‌ర‌గ‌తి అర్హత ఉన్న వారు అర్హులు. క‌నీస వ‌య‌స్సు 2024 జూలై 1 నాటికి 21 సంవ‌త్సరాలు, గ‌రిష్ఠ వ‌య‌స్సు 35 సంవ‌త్సరాలు. ఎస్సీ, ఎస్టీ అభ్యర్థుల‌కు కేటాయించిన పోస్టులు ఉన్న ప్రాంతాల్లో 21 ఏళ్లు క‌లిగిన అభ్యర్థి లేక‌పోయిన‌ట్లుయితే 18 సంవ‌త్స‌రాలు నిండిన వారి అప్లికేష‌న్ కూడా ప‌రిగ‌ణ‌న‌లోకి తీసుకుంటారు. 10వ త‌ర‌గ‌తి ఉత్తీర్ణత సాధించిన వారు లేకుంటే దిగువ త‌ర‌గ‌తులు 9 లేదా 8 త‌ర‌గ‌తి వారు అర్హులుగా ప్రక‌టిస్తామ‌ని స్త్రీ, శిశు సంక్షేమ శాఖ ప్రాజెక్టు డైరెక్టర్ (పీడీ) వ‌ర‌ల‌క్ష్మి తెలిపారు.

జీతం

అంగ‌న్‌వాడీ కార్యకర్తకు రూ.11,500, అంగ‌న్‌వాడీ స‌హాయ‌కుల‌కు రూ.9,000, మినీ అంగ‌న్ వాడీ కార్యక‌ర్త‌కు రూ.9,000 నెల జీతం ఉంటుంది. ఇంట‌ర్వ్యూ, మెరిట్ ఆధారంగా ఎంపిక చేస్తారు. ఎటువంటి ప‌రీక్ష లేదు. ఎటువంటి అప్లికేష‌న్ ఫీజు లేదు. అభ్య‌ర్థి స్వ‌యంగా వెళ్లి సంబంధిత ఐసీడీఎస్‌ కార్యాల‌యంలో త‌మ అప్లికేష‌న్ అంద‌జేయాలి. బ‌యోడేటాతో పాటు అన్ని విద్యా అర్హ‌త, ఇత‌ర స‌ర్టిఫికేట్లు జెరాక్స్ కాపీల‌పై గెజిటెడ్ ఆఫీస‌ర్‌తో అటెస్టేష‌న్ చేయించి, ఐసీడీఎస్ ప్రాజెక్టు కార్యాల‌యాల్లో అప్లికేష‌న్ అంద‌జేయాలి.

ఎంపిక

ఈ పోస్టుల‌కు అభ్య‌ర్థుల‌ను జిల్లా క‌లెక్ట‌ర్ ఆధ్వర్యంలోని కమిటి ఎంపిక చేస్తోంది. ప‌దో త‌ర‌గ‌తి ఉత్తీర్ణ‌త పొందినందుకు 50 మార్కులు, ప్రీ స్కూల్ ట్రైనింగ్ పొందితే 5 మార్కులు, విడోకు 5 మార్కులు, చిన్న‌పిల్ల‌ల‌తో కూడిన విడోకు 5 మార్కులు, అనాధులుగా ఉండి అభ్య‌ర్థికి 10 మార్కులు, దివ్యాంగు అభ్య‌ర్థుల‌కు 5 మార్కులు, ఇంట‌ర్వ్యూకు 20 మార్కులు మొత్తం 100 మార్కులు ఉంటాయి.

కావాల్సిన ధ్రువీక‌ర‌ణ ప‌త్రాలు

1. పుట్టిన తేదీ ధ్రువీక‌ర‌ణ ప‌త్రం

2. ప‌దో త‌ర‌గ‌తి స‌ర్టిఫికేట్‌

3. కుల ధువ్రీక‌ర‌ణ ప‌త్రం

4. స్థానిక నివాస ధ్రువీక‌ర‌ణ ప‌త్రం

5. వివాహితురాలైతే వివాహ ధ్రువీక‌ర‌ణ ప‌త్రం

6. అనుభ‌వం ఉంటే, అనుభ‌వ ప‌త్రం

7. దివ్యాంగురాలైతే దానికి సంబంధించిన స‌ర్టిఫికేట్‌

8. వితంతువుల‌తే భ‌ర్త మ‌ర‌ణ ధ్రువీక‌ర‌ణ ప‌త్రం

9. ఆరో త‌ర‌గ‌తి నుంచి స్ట‌డీ స‌ర్టిఫికేట్స్‌

10. టెక్నిక‌ల్ క్వాలిఫికేష‌న్ ఉంటే, దాని స‌ర్టిఫికేట్‌

రిపోర్టింగ్ : జ‌గ‌దీశ్వర‌రావు జ‌ర‌జాపు, హిందుస్తాన్ టైమ్స్ తెలుగు