2025 మహీంద్రా బొలెరో వేరియంట్లు, వాటి ఫీచర్స్​, ధరల వివరాలు ఇవే..

2025 బొలెరోని ఇటీవలే సంస్థ లాంచ్​ చేసింది. అంతేకాదు, బొలెరో శ్రేణిలో కీలకమైన మార్పులు చేస్తూ, కొత్తగా టాప్-స్పెక్ బీ8 ట్రిమ్‌ను సైతం విడుదల చేసింది. దీంతో ఇప్పుడు బొలెరో మొత్తం నాలుగు వేరియంట్లలో లభిస్తోంది. ఈ నేపథ్యంలో ఈ కారు వేరియంట్లు, వాటి ఫీచర్స్, ధరలు వంటి​ వివరాలను ఇక్కడ తెలుసుకోండి..

అన్ని వేరియంట్లలో ఉండే ముఖ్య ఫీచర్లు..

2025 మహీంద్రా బొలెరో కఠినమైన నిర్మాణాన్ని కలిగి ఉన్నప్పటికీ, అన్ని వెర్షన్లలో తప్పనిసరి భద్రతా ఫీచర్లను మహీంద్రా జోడించింది. వాటిలో:

• ఏబీఎస్​తో పాటు ఈబీడీ
• డ్యూయల్ ఫ్రంట్ ఎయిర్‌బ్యాగ్‌లు
• రివర్స్ పార్కింగ్ సెన్సార్లు
• ఇంజిన్ ఇమ్మొబిలైజర్
• సీట్ బెల్ట్ రిమైండర్‌లు

ఇవే కాకుండా, ఇంధన సామర్థ్యాన్ని పెంచడానికి మహీంద్రా మైక్రో-హైబ్రిడ్ స్టార్ట్/స్టాప్ సిస్టమ్, డిజిటల్ డ్రైవర్ ఇన్ఫర్మేషన్ క్లస్టర్ కూడా అన్ని వేరియంట్లలో ప్రామాణికంగా లభిస్తాయి.

2025 మహీంద్రా బొలెరో- వేరియంట్లు, వాటి ఫీచర్స్​, ధరలు..

1. మహీంద్రా బొలెరో: బీ4 వేరియంట్ (ధర: రూ. 7.99 లక్షలు)

డిజైన్: సాధారణ నలుపు రంగు గ్రిల్, క్యాప్‌లు లేని స్టీల్ వీల్స్ వంటివి ఉంటాయి. ఫాగ్ ల్యాంప్‌లు లేకపోవడం వల్ల దీని ధర తక్కువగా ఉంటుంది.

ఇంటీరియర్: సీట్లలో వినైల్ అప్‌హోల్‌స్టరీ, మ్యాన్యువల్ ఎయిర్-కండిషనింగ్, పవర్ స్టీరింగ్, ఫ్లిప్ కీ వంటి ప్రాథమిక ఫంక్షన్లు మాత్రమే ఉంటాయి.

టార్గెట్: మెకానికల్ సరళత, తక్కువ నిర్వహణ ఖర్చును కోరుకునే కొనుగోలుదారులు, ముఖ్యంగా ఫ్లీట్ ఆపరేటర్లు, గ్రామీణ వినియోగదారుల కోసం ఈ వెర్షన్ సరైన ఎంపిక.

2. మహీంద్రా బొలెరో: బీ6 వేరియంట్ (ధర: రూ. 8.69 లక్షలు)

డిజైన్: గ్రిల్‌పై క్రోమ్ డీటైలింగ్, వీల్ క్యాప్‌లు జోడించారు, ఇది కొంచెం మెరుగైన లుక్‌ను ఇస్తుంది.

ఫీచర్లు: ఇందులో పవర్ విండోస్, సెంట్రల్ లాకింగ్, రిమోట్-కీ వంటి ఫీచర్లు బీ4లో లేని అదనపు సౌలభ్యాన్ని అందిస్తాయి.

ఇంటీరియర్: 17.8 సెం.మీ టచ్‌స్క్రీన్ ఇన్ఫోటైన్‌మెంట్ డిస్‌ప్లే, స్టీరింగ్-మౌంటెడ్ కంట్రోల్స్ ఉన్నాయి. వినైల్ సీట్లకు బదులుగా ఫ్యాబ్రిక్ సీట్లు పొందుపరచడంతో సుదూర ప్రయాణాలకు సౌకర్యం మెరుగుపడుతుంది. యూఎస్​బీ టైప్-సీ ఛార్జింగ్, 12వీ సాకెట్ వంటి సౌకర్యాలు కూడా ఉన్నాయి.

3. మహీంద్రా బొలెరో: బీ6(ఓ) వేరియంట్ (ధర: రూ. 9.09 లక్షలు)

బీ6(ఓ) కేవలం అలంకరణ మార్పుల కంటే, నిజ జీవితంలో ఉపయోగపడే ఫీచర్లపై దృష్టి సారించింది.

విజిబిలిటీ: ముఖ్యంగా చీకటి రోడ్లపై మలుపుల చుట్టూ మెరుగైన దృశ్యమానతను అందించే స్టాటిక్ బెండింగ్ హెడ్‌ల్యాంప్‌లు ఇందులో ఉన్నాయి. మెటాలిక్ ఫినిషింగ్‌తో కూడిన ఫాగ్ ల్యాంప్‌లు కూడా జత చేశారు.

మౌలిక సౌకర్యాలు: వెనుక భాగంలో వాష్-అండ్-వైపర్ సెటప్ ఉంది. ఇది దుమ్ము రోడ్లపై లేదా వర్షాకాలంలో చాలా ఉపయోగకరంగా ఉంటుంది.

టార్గెట్: తరచుగా తక్కువ విజిబిలిటీ పరిస్థితుల్లో లేదా సెమీ-అర్బన్ (పాక్షిక-పట్టణ) మార్గాల్లో ప్రయాణించే కొనుగోలుదారులకు, టాప్-స్పెక్ వెర్షన్‌కు వెళ్లకుండానే, ఈ ట్రిమ్ ఒక తెలివైన ఆప్షన్​గా నిలుస్తుంది.

4. మహీంద్రా బొలెరో: బీ8 వేరియంట్ (ధర: రూ. 9.69 లక్షలు)

బీ8 వేరియంట్ బొలెరో క్లాసిక్ అత్యంత పూర్తి స్థాయి, ప్రీమియం వెర్షన్.

డిజైన్: ఇందులో క్రోమ్ అప్డేటెడ్​ గ్రిల్, ఫ్యాక్టరీ-ఫిట్టెడ్ ఫాగ్ ల్యాంప్‌లు, డైమండ్-కట్ అల్లాయ్ వీల్స్ ఉన్నాయి. ఇవి ఎస్‌యూవీకి కొంత ఆకర్షణీయమైన రూపాన్ని ఇస్తాయి.

కొత్త రంగు: ఈ వేరియంట్​కు ప్రత్యేకంగా ‘స్టీల్త్ బ్లాక్’ అనే కొత్త పెయింట్ షేడ్‌ను కూడా మహీంద్రా ప్రవేశపెట్టింది. డైమండ్ వైట్, రాకీ బీజ్, DSAT సిల్వర్ రంగుల్లో కూడా ఇది లభిస్తుంది.

ఇంటీరియర్: ఫ్యాబ్రిక్ సీట్లకు బదులుగా లెదరెట్ అప్‌హోల్‌స్టరీని ఉపయోగించారు. ఇది క్యాబిన్‌కు ప్రీమియం అనుభూతిని ఇస్తుంది. పవర్ విండోస్, సెంట్రల్ లాకింగ్, టచ్‌స్క్రీన్ ఇన్ఫోటైన్‌మెంట్ వంటి అన్ని సౌకర్యాలు యథావిధిగా ఉంటాయి. దృశ్యమానత మెరుగుదలలు, వెనుక వాష్-వైప్ ఫంక్షనాలిటీ కూడా ఇందులో ఉన్నాయి.

కఠినత్వం, మన్నికపై రాజీ పడకుండా, ప్రాథమిక సౌకర్యాలు, మెరుగైన లుక్ కోరుకునే వ్యక్తిగత కొనుగోలుదారులకు బీ8 వేరియంట్ అత్యంత అనుకూలమైన బొలెరోగా నిలుస్తుంది.