Blinkit Bistro: జెప్టో కెఫే, స్విగ్గీ బోల్ట్ లకు పోటీగా బ్లింకిట్ ‘బిస్ట్రో’ యాప్; 10 నిమిషాల్లో ఫుడ్ డెలివరీ..

Blinkit Bistro: జొమాటోకు చెందిన క్విక్ కామర్స్ ప్లాట్ఫామ్ బ్లింకిట్ కేవలం 10 నిమిషాల్లోపే ఫుడ్ డెలివరీలను అందించేలా రూపొందించిన బిస్ట్రో అనే కొత్త యాప్ ను లాంచ్ చేసింది. జెప్టో కేఫ్, స్విగ్గీ బోల్ట్ వంటివి ఇప్పటికే ఈ సెగ్మెంట్ లో సేవలను అందిస్తున్నాయి. ప్రస్తుతానికి ఈ యాప్ ద్వారా గురుగ్రామ్ పరిసర ప్రాంతాల్లో మాత్రమే సేవలను అందిస్తున్నారు.

బిస్ట్రో ఎలా పనిచేస్తుంది

ఆల్రెడీ మార్కెట్లో ఉన్న ప్రత్యర్థులకు గట్టి పోటీ ఇచ్చే ఉద్దేశంతో పక్కా ప్రణాళికతో బ్లింకిట్ ఈ బిస్ట్రోను రంగంలోకి దింపింది. వివిధ ప్రాంతాలలో ఏర్పాటు చేసిన తమ వంటగదుల్లో తయారుచేసిన భోజనం, స్నాక్స్, పానీయాలను బిస్ట్రో అందిస్తుంది. ప్రస్తుతం ఈ యాప్ టెస్టింగ్ దశలో ఉందని, గురుగ్రామ్ లోని ఎంపిక చేసిన ప్రాంతాల్లో మాత్రమే అందుబాటులో ఉందని తెలుస్తోంది. క్విక్ ఫుడ్ ఆప్షన్ కోసం చూస్తున్న యూజర్ల అవసరాలను తీరుస్తుందని ఈ యాప్ గురించి గూగుల్ ప్లే స్టోర్ లో యాప్ వివరణ ఇచ్చారు. ఈ యాప్ (apps) ద్వారా స్నాక్స్, భోజనం, పానీయాలతో సహా అనేక ఇతర ఫుడ్ వెరైటీలను కేవలం 10 నిమిషాల్లో అందిస్తామని ఇది హామీ ఇస్తుంది. "మీరు చిరుతిండి లేదా భోజనం కోసం ఆరాటపడుతున్నప్పుడు 10 నిమిషాల్లోనే మీకు బిస్ట్రో ఆ ఆహారాన్ని నేరుగా మీ ఇంటికి తీసుకువస్తాడు, వేగంగా" అని ఉంది.

బ్లింకిట్ డెలివరీ నెట్వర్క్

బిస్ట్రో యాప్ కోసం బ్లింకిట్ కు ప్రస్తుతం ఉన్న డెలివరీ నెట్వర్క్ ను ఉపయోగించనున్నారు. ఇందులో డార్క్ స్టోర్స్, ఇతర లాజిస్టిక్స్ ఇన్ఫ్రాస్ట్రక్చర్ ఉన్నాయి. ఇది బిస్ట్రోకు దాని ఇతర పోటీదారుల కంటే అధిక ప్రయోజనాన్ని ఇస్తుంది. ఈ వనరులను ఉపయోగించుకోవడం ద్వారా, బ్లింకిట్ వేగంగా డెలివరీ చేయగలదు. బిస్ట్రో యాప్ డిసెంబర్ 6, 2024 న గూగుల్ ప్లేలో అందుబాటులోకి వచ్చింది. కానీ ఆపిల్ (apple) ఐఓఎస్ స్టోర్లో ఇంకా లిస్ట్ కాలేదు. క్విక్-డెలివరీ ఫుడ్ సెక్టార్ లో ప్రజాదరణ పొందిన జెప్టో కేఫ్ కోసం ప్రత్యేక యాప్ ను ప్రవేశపెట్టనున్నట్లు మరో క్విక్-కామర్స్ సంస్థ జెప్టో ప్రకటించిన మరుసటి రోజే ఇది ప్రారంభమైంది.

బిస్ట్రో వర్సెస్ జెప్టో కేఫ్

జెప్టో కేఫ్ ఇంకా తమ ఔట్ లెట్ ల సంఖ్యను పెంచుకునే దశలో ఉంది. మరోవైపు, బిస్ట్రో మోడల్ దాని 10 నిమిషాల డెలివరీ వాగ్దానాన్ని నెరవేర్చడానికి క్లౌడ్ కిచెన్లు, ఆప్టిమైజ్డ్ ప్రక్రియలపై ఆధారపడుతుంది. స్విగ్గీ (swiggy) బోల్ట్ తో పాటు బిస్ట్రో, జెప్టో కేఫ్ రెండూ కాఫీ, శాండ్ విచ్ లు, పేస్ట్రీలు, పిజ్జాలు, సమోసాలు వంటి శీఘ్ర ఆహార మెనూను అందిస్తాయి. త్వరితగతిన ఫుడ్ డెలివరీని అందించేందుకు జొమాటో (zomato) చేస్తున్న తొలి ప్రయత్నం ఇది కాదు. గతంలో జొమాటో ఇన్ స్టంట్ పేరుతో ఓ సర్వీసును ప్రారంభించింది.