సింగిల్​ ఛార్జ్​తో 250 కి.మీ రేంజ్​- రెనాల్ట్​ క్విడ్​ ఈవీ ఇండియా లాంచ్​ ఎప్పుడు?

మచ్​ అవైటెడ్​ క్విడ్ ఈవీని అధికారికంగా ఆవిష్కరించింది ప్రముఖ అంతర్జాతీయ ఆటోమొబైల్ సంస్థ రెనాల్ట్. క్విడ్​ ఇ-టెక్​ పేరుతో ఇది బ్రెజిల్​ మార్కెట్​లో అందుబాటులోకి రానుంది. ఈ కొత్త మోడల్ డాసియా స్ప్రింగ్ ఈవీ అనే ఎలక్ట్రిక్​ కారుకు ఉపయోగించిన ప్లాట్‌ఫారమ్‌పైనే తయారైంది. రెనాల్ట్ సంస్థ విద్యుత్ వాహనాల వ్యూహంలో ఇది కీలక ముందడుగుగా చెప్పవచ్చు. ఆసక్తికరమైన విషయం ఏంటంటే.. ఈ క్విడ్ ఈవీకి సంబంధించిన టెస్ట్ వెహికిల్స్​ భారత రోడ్లపై ఇప్పటికే చాలాసార్లు కనిపించాయి. దీని బట్టి చూస్తే, ఈ ఎలక్ట్రిక్ కారు భారత మార్కెట్‌లోకి కూడా త్వరలోనే ప్రవేశించే అవకాశం ఉందని తెలుస్తోంది!

ఈ నేపథ్యంలో ఈ రెనాల్ట్​ క్విడ్​ ఈవీ రేంజ్​, ఫీచర్స్​ వంటి వివరాలను ఇక్కడ తెలుసుకుందాము..

రెనాల్ట్​ క్విడ్​ ఈవీ- డిజైన్, ఫీచర్లు..

డిజైన్:

రెనాల్ట్ క్విడ్ ఈవీ డిజైన్ డాసియా ఎలక్ట్రిక్​ కారు మోడల్ నుంచి స్ఫూర్తి పొందినట్టు స్పష్టంగా కనిపిస్తోంది.

ముందు భాగంలో సాంప్రదాయ గ్రిల్‌కు బదులుగా క్లోజ్డ్-ఆఫ్ గ్రిల్‌ను అమర్చారు. దీనికి వర్టికల్​ ప్లేట్స్​ జోడించి, కారుకు మరింత దృఢమైన రూపాన్ని ఇచ్చారు.

ప్రాజెక్టర్ హెడ్‌లైట్‌లు ఫ్రంట్ బంపర్‌కు ఇరువైపులా కిందకు రిజర్వ్ చేసి ఉన్నాయి.

కారు పక్క భాగాలు పాత క్విడ్ ఐసీఈ వెర్షన్‌ను పోలి ఉన్నాయి. దీనికి నలుపు రంగు వీల్ ఆర్చ్ క్లాడింగ్‌లు, ఓఆర్​వీఎంలలో అమర్చిన ఇండికేటర్ లైట్లు, బ్లాక్ సైడ్ క్లాడింగ్, 14-ఇంచ్​ డ్యూయల్-టోన్ అల్లాయ్ వీల్స్ కనిపిస్తాయి.

వెనుక భాగంలో వై- ఆకారపు ఎల్​ఈడీ డీఆర్​ఎల్​ (డేటైమ్ రన్నింగ్ లైట్), హాలోజెన్-ఆధారిత రివర్స్ లైట్లు ఉన్నాయి.

రెనాల్ట్​ క్విడ్​ ఈవీ- ఇంటీరియర్, టెక్నాలజీ..

క్విడ్ ఈవీ లోపలి భాగం రిఫ్రెష్‌గా, అత్యాధునిక టెక్నాలజీతో కనిపిస్తోంది. కొత్తగా డిజైన్ చేసిన క్యాబిన్‌లో 10.1-ఇంచ్​ టచ్‌స్క్రీన్ ఇన్ఫోటైన్‌మెంట్ సిస్టమ్ ఉంది. ఇది వైర్‌లెస్ ఆండ్రాయిడ్ ఆటో, యాపిల్ కార్‌ప్లే ఫీచర్లను సపోర్ట్ చేస్తుంది.

అదనంగా, 7-ఇంచ్​ డిజిటల్ ఇన్​స్ట్రుమెంట్ క్లస్టర్, రెండు యూఎస్‌బీ-సీ పోర్టులు, ఎత్తు సర్దుబాటు చేసుకునే స్టీరింగ్ వీల్ వంటి ఫీచర్లు ఉన్నాయి.

భద్రత (సేఫ్టీ):

భద్రత విషయంలో రాజీ లేకుండా, ఈ కారులో 6 ఎయిర్‌బ్యాగ్‌లు, ఏబీఎస్, ఈఎస్‌పీ (ఎలక్ట్రానిక్ స్టెబిలిటీ ప్రోగ్రామ్), హిల్-స్టార్ట్ అసిస్ట్, రేర్ కెమెరా, టీపీఎంఎస్ (టైర్ ప్రెజర్ మానిటరింగ్ సిస్టమ్), సీట్‌బెల్ట్ రిమైండర్, ఐఎస్‌ఓఎఫ్‌ఐఎక్స్ (ISOFIX) వంటి కీలక భద్రతా ఫీచర్లను చేర్చారు.

రెనాల్ట్​ క్విడ్​ ఈవీ- బ్యాటరీ, రేంజ్ వివరాలు..

క్విడ్ ఇ-టెక్​గా పేరొందిన రెనాల్ట్​ క్విడ్​ ఈవీలో 26.8 కేడబ్ల్యూహెచ్​ సామర్థ్యం గల లిథియం-అయాన్ బ్యాటరీ ప్యాక్​ని సంస్థ జోడించింది. ఒకే ఛార్జ్‌పై ఇది గరిష్టంగా 250 కిమీ రేంజ్ ఇస్తుందని కంపెనీ ప్రకటించింది. ఈ ఎలక్ట్రిక్ మోటారు సుమారుగా 65 హెచ్‌పీ (హార్స్ పవర్) వరకు గరిష్ట పవర్​ని ఉత్పత్తి చేయగలదు.

బ్రెజిల్​లో ఈ రెనాల్ట్​ క్విడ్​ ఇ-టెక్​ ధర 99,000 బ్రెజీలియన్​ రియల్​​. అంటే సుమారు రూ. 16.6 లక్షలు!

ఇక భారత్‌లో లాంచ్ అయిన తర్వాత, రెనాల్ట్ క్విడ్ ఈవీ అనేది టాటా టియాగో ఈవీ, సిట్రోయెన్ ఈసీ3 వంటి మోడళ్లకు గట్టి పోటీ ఇవ్వగలదని మార్కెట్ నిపుణులు భావిస్తున్నారు.

కాగా ఈ ఎలక్ట్రిక్​ కారు ఇండియా లాంచ్​పై సంస్థ ఇంకా ఎలాంటి ప్రకటన చేయలేదు. త్వరలోనే దీనిపై ఓ క్లారిటీ వచ్చే అవకాశం ఉంది.