Tirumala Darshan Tickets : తిరుమల శ్రీవారి భక్తులకు అలర్ట్, జనవరి కోటా దర్శనం టికెట్లు జారీ తేదీలు ఇవే
17 October 2024, 22:00 IST
Share
- Tirumala Darshan Tickets : తిరుమల శ్రీవారి ఆర్జిత, వర్చువల్, అంగప్రదక్షిణం సహా ఇతర దర్శనం, గదుల బుకింగ్ టికెట్లకు సంబంధించి జనవరి నెల కోటాను అక్టోబర్ 19 నుంచి 24వ తేదీ వరకు విడుదల చేయనున్నట్లు టీటీడీ ప్రకటించింది. అక్టోబర్ 19న ఆర్జిత సేవా టికెట్ల కోటాను విడుదల చేయనుంది.
తిరుమల శ్రీవారి భక్తులకు అలర్ట్, అక్టోబరు 19న ఆర్జితసేవా ఆన్లైన్ టికెట్ల జనవరి కోటా విడుదల
తిరుమల శ్రీవారి ఆర్జిత సేవా ఆన్ లైన్ టికెట్లకు సంబంధించి వచ్చే ఏడాది జనవరి నెల కోటాను అక్టోబరు 19న ఉదయం 10 గంటలకు టీటీడీ ఆన్‌లైన్‌లో విడుదల చేయనుంది.
ఈ సేవాటికెట్ల ఎలక్ట్రానిక్ డిప్ కోసం అక్టోబరు 21వ తేదీ ఉదయం 10 గంటల వరకు ఆన్‌లైన్‌లో నమోదు చేసుకోవచ్చని టీటీడీ ప్రకటించింది. ఈ టికెట్లు పొందిన భక్తులు అక్టోబర్ 21 నుంచి 23వ తేదీ మధ్యాహ్నం 12 గంటల లోపు సొమ్ము చెల్లించాల్సి ఉంటుంది. వారికి లక్కీడిప్‌లో టికెట్లు మంజూరవుతాయి.
అక్టోబర్ 22న ఆర్జిత సేవా టికెట్లు విడుదల
కల్యాణోత్సవం, ఊంజల్ సేవ, ఆర్జిత బ్రహ్మోత్సవం, సహస్రదీపాలంకార సేవా టికెట్లను అక్టోబర్ 22వ తేదీ ఉదయం 10 గంటలకు విడుదల చేయనున్నట్లు టీటీడీ ప్రకటించింది.
అక్టోబర్ 22న వర్చువల్ సేవల కోటా విడుదల
వర్చువల్ సేవలు, వాటి దర్శన స్లాట్లకు సంబంధించి వచ్చే ఏడాది జనవరి నెల కోటాను అక్టోబరు 22వ తేదీ మధ్యాహ్నం 3 గంటలకు టీటీడీ ఆన్‌లైన్‌లో విడుదల చేయనుంది.
అక్టోబరు 23న అంగప్రదక్షిణం టోకెన్లు విడుదల
2025 జనవరి నెల‌కు సంబంధించిన అంగప్రదక్షిణం టోకెన్ల కోటాను అక్టోబర్ 23న ఉదయం 10 గంటలకు టీటీడీ ఆన్‌లైన్‌లో విడుదల చేయనున్నారు.
శ్రీవాణి టికెట్ల ఆన్ లైన్ కోటా
శ్రీవాణి టికెట్లకు సంబంధించిన జనవరి నెల ఆన్ లైన్ కోటాను అక్టోబరు 23వ తేదీ ఉదయం 11 గంటలకు విడుదల చేయనున్నట్లు టీటీడీ ప్రకటించింది.
వృద్ధులు, దివ్యాంగుల దర్శన కోటా
వ‌యోవృద్ధులు, దివ్యాంగులు, దీర్ఘకాలిక వ్యాధులున్నవారు తిరుమల శ్రీ‌వారిని ద‌ర్శించుకునేందుకు వీలుగా జనవరి నెల ఉచిత ప్రత్యేక దర్శనం టోకెన్ల కోటాను అక్టోబరు 23వ తేదీ మధ్యాహ్నం 3 గంటలకు టీటీడీ ఆన్‌లైన్‌లో విడుదల చేయనుంది.
అక్టోబరు 24న ప్రత్యేక ప్రవేశ దర్శన టికెట్ల కోటా విడుదల
జనవరి నెల‌కు సంబంధించిన ప్రత్యేక ప్రవేశ దర్శన టికెట్ల కోటాను అక్టోబరు 24వ తేదీ ఉదయం 10 గంటలకు టీటీడీ ఆన్‌లైన్‌లో విడుదల చేయనుంది.
తిరుమల, తిరుప‌తిల‌లో గదుల కోటా
తిరుమల, తిరుపతిలో 2025 జనవరి నెల గదుల కోటాను అక్టోబరు 24వ తేదీ మధ్యాహ్నం 3 గంటలకు ఆన్‌లైన్‌లో విడుదల చేయనున్నట్లు తిరుమల తిరుపతి దేవస్థానం ప్రకటించింది. భక్తులు టీటీడీ వెబ్ సైట్ https://ttdevasthanams.ap.gov.in ద్వారా శ్రీవారి ఆర్జిత‌సేవ‌లు, దర్శన టికెట్లు బుక్ చేసుకోవాల‌ని కోరింది.
అక్టోబరు 17న పౌర్ణమి గరుడ సేవ
తిరుమల శ్రీవారి ఆల‌యంలో అక్టోబరు 17న పౌర్ణమి గరుడసేవ వైభ‌వంగా నిర్వహించనున్నట్లు టీటీడీ ప్రకటించింది. ప్రతినెలా పౌర్ణమి రోజున టీటీడీ గరుడ సేవ నిర్వహిస్తున్న విషయం తెలిసిందే. ఇందులో భాగంగా రాత్రి 7 నుంచి 9 గంటల మధ్య శ్రీమలయప్ప స్వామి గరుడునిపై తిరుమాడ వీధులలో విహ‌రించి భక్తులకు దర్శనమిస్తారు.